Löymanov Şahin Malik oğlu 1999-cu il avqustun 17-də
Mingəçevir şəhərində anadan olmuşdur. O, birinci sinfə
Mingəçevir şəhər 7 nömrəli tam orta məktəbdə getmişdir.
2008-ci ildə ailəsi Bakı şəhərinə köçdüyü üçün
təhsilini Bakı şəhəri 19 nömrəli tam orta məktəbdə
davam etdirmişdir. Şahin özü haqqında bunları dedi:
-
Orta məktəbdə dərslərimi "əla" qiymətlərlə oxuyuram.
Əvvəl riyaziyyat məni cəlb edirdi. Sonra isə sevimli
fənnim həyat bilgisi oldu. Təbiət elmləri məni daha çox
maraqlandırır. Anamın dediyinə görə, mən çox zəif, amma
çox cəld və çevik uşaq olmuşam. Lap kiçik yaşlarımdan
isə allergik bronxit ilə xəstələnmişəm. Amma bununla
yanaşı idmana böyük həvəsim olmuşdur. Bir gün atam məni
əlbəyaxa döyüş klubuna apardı. Məşqçi məni yoxlayandan
sonra cılız olmağıma baxmayaraq, ayaq və əl zərbələrimin
güclü olduğunu söylədi və mənimlə ciddi məşğul olmağa
başladı.
Kompüter oyunları ilə maraqlanır, velosiped sürürəm.
Demək olar ki, daha çox vaxtım atamla keçir. Məncə,
mənim ən yaxın dostum atamdır. Atam hər bir işimdə mənə
arxa və dayaqdır. Çünki qazandığım hər bir uğurun
arxasında atamın mənə olan inamı dayanır. Atam mənimlə
fəxr edir və bu da məni yeni qələbələrə ruhlandırır.
Məncə, idman sahəsində zirvələri fəth edə biləcəyəm
inşallah.
Yaxşı idmançı olmaq istəyirəm. Amma sənət seçməyə
gəldikdə isə atamın yolunu davam etdirəcəm, stomatoloq
olmaq istəyirəm. İstəyirəm ki, vətənim və xalqım mənimlə
fəxr etsin. Olimpiadada Azərbaycanın bayrağını zirvələrə
qaldırmaq arzusundayam. Çünki vətənim hər şeyin ən
yaxşısına layiqdir. Onun adı daim yüksəklərdən
gəlməlidir. Mənim də bir vətəndaş kimi bunda kiçik bir
rolum olsa çox sevinərəm
Qalib olduğum turnirlərsə bunlardır. 2009-cu il yanvarın
18-də 20 Yanvar şəhidlərinin əziz xatirəsinə həsr
olunmuş əlbəyaxa döyüş növü üzrə klublararası yarışda
I, pankration idman növü üzrə narkomaniya ilə
mübarizəyə həsr edilmiş turnirdə I, 2009-cu il mayın
25-də Respublika gününə həsr olunmuş Fri-Faytinq idman
növü üzrə turnirdə I, 2009-cu il dekabrın 20-də 31
dekabr - Dünya Azərbaycanlılarının Həmrəylik Gününə həsr
olunmuş Fri-Faytinq idman növü üzrə beynəlxalq turnirdə
I yeri tutmuşam. Heç yadımdan çıxmayan yarışlardan biri
2010-cu il fevralın 17-də oldu. Belə ki, kunq-funun
Çou-Li-Fut döyüş növü üzrə İran İslam Respublikasının
paytaxtı Tehran şəhərində 40-a yaxın ölkənin iştirakı
ilə keçirilən dünya kuboku uğrunda yarışlarda rəqib
idmançıları məğlub edərək I yeri tutdum. Bundan başqa,
fəxrlə adını çəkəcəyim yarış Sankt-Peterburq şəhərində
keçirilən Şərq-Qərb döyüş növləri olimpiadası oldu. Bu
yarışda 50 ölkənin idmançıları iştirak edirdi. Final
yarışında məndən iki yaş böyük, 5 kq artıq çəkidə olan
erməni idmançısı Arsen Şahnazaryanla görüşdüm. Bu
görüşdə doğrudan da çox həyəcanlı və əsəbi idim. Həmin
anda erməni qəsbkarlarının xalqımıza qarşı törətdiyi
soyqırımı gözümün önünə gəldi. Öz-özümə dedim ki, nəyin
bahasına olursa-olsun, ermənini məğlub edib hirsimi bir
az da olsa azaldım. Bəli, həmin yarışda erməniyə aman
vermədim ki, nəfəs alsın. Onu vaxtından əvvəl məğlub
etdim. Bundan başqa, 2010-cu il aprelin 17-də Şərq -
Qərb döyüş növləri olimpiadasının uşu-sanda döyüş növü
üzrə 50-ə yaxın ölkənin iştirakı ilə keçirilən yarışda
da I yeri tutaraq fəxri kürsünün ən yüksək pilləsinə
qalxdım. Dəfələrlə Bakı kuboku və respublika
çempionatında I yeri tutmuşam. Ən böyük arzum ölkəmizin
üçrəngli bayrağını beynəlxalq yarışlarda daha yüksək
zirvələrə qaldırmaqdır.
Bakıdakı 19 nömrəli tam orta məktəbin direktoru Məmməd
Qəmbərov: -
Şahin məktəbimizin 8 "a" sinfində təhsil alır. Sakit,
tərbiyəli və çalışqan bir oğlan kimi özünü tanıtmışdır.
Dərslərinə qarşı çox ciddidir, dərsi mükəmməl öyrənməyə
çalışır, çoxlu suallar verməyi sevir. Müəllimlər də
Şahin haqqında müsbət rəydədirlər. Onlar Şahinin sakit
və dərslərdə diqqətli olduğunu söyləyirlər. Məktəbdə
qoyulan bütün nizam-intizam qaydalarına riayət edir. Öz
həmyaşıdları və sinif yoldaşları ilə səmimi və mehriban
münasibət qura bilir. Zarafat etməyi çox sevir. İdmanda
göstərdiyi böyük uğurlarına baxmayaraq, özünü heç vaxt
öymür, sinif yoldaşlarından seçilməyi xoşlamır. Şahin
məktəbin ictimai işlərində də iştirak etməyi xoşlayır.
Şahində ən sevdiyim cəhət onun öz yoldaşlarına və
dərslərinə qarşı diqqətli olmağıdır. Atası Malik
Löymanov: - Şahinin adını mən qoymuşam. Onun şahin
kimi göylərdə pərvaz etməyini arzulamışam.
Körpəlikdə çox zəif idi. Tez-tez xəstələnirdi. Buna
baxmayaraq çevik idi. Yaş yarıma qədər anasının
ətəyindən əl çəkmirdi. Tədricən mən onunla məşğul olmağa
başladım. İşdən evə gələn kimi onu Mingəçevir şəhər
stadionuna aparırdım. Kiçik yaşlarından ona idmanı
sevdirməyə başladım. 5 yaşında o artıq müəyyən akrobatik
hərəkətlər edirdi. Məktəbəqədərki dövrdə yay ayları hər
gün yelləncəklərə minməyi, tir atmağı, bir də ki,
qucağımda oturub maşının rolunu tutmağı çox xoşlayırdı.
Bir gün Şahini babasıgilə apardım. İşdən çıxanda Şahini
götürməyə getdim. Onda onun 4 yaşı vardı. Babası onu
həyətə, binanın qabağına oynamağa buraxmışdı. Mən Şahini
soruşanda həyətdə heç kəs onu görmədiyini söylədi.
Binaya yaxın yerdə təxminən 300-400 metr aralı təzə 9
mərtəbəli bina tikintisi üçün quraşdırılmış kran var
idi. Gözüm birdən həmin krana sataşdı. Şahinin həmin
kranın yarıdan da yuxarı çıxdığını görüb çox qorxdum.
Onu yavaş-yavaş aşağı düşməyə səslədim. Şükürlər olsun
ki, o heç bir xətasız aşağıya düşdü.
Şahin haqda maraqlı hadisələr çox danışmaq olar. 2010-cu
il aprel ayının 14-ü səhərə yaxın Sankt-Peterburqda
keçiriləcək döyüş növlərinin Olimpiadasına getmək üçün
hava limanına gedirdik. O, evin qapısından çölə çıxıb
yenidən içəri qayıtdı. Anasına dedi - əgər erməni ilə
qarşılaşsam qanun-qaydaya baxmayaraq onu əzəcəyəm. Elə
oldu ki, sərbəst döyüş növü üzrə rəqibi özündən 2 yaş
böyük, çəkidə isə 5 kq artıq olan erməni oldu. Şahinə
onun erməni olduğunu dedim. "Ata, sən onda seyr et", -
dedi. "Mən ona göstərəcəyəm". O, rəqibini vaxtından çox
əvvəl 23 saniyə ərzində sındırıcı fəndə salaraq məğlub
etdi.
Rəşad ZİYADOV |