Azərbaycan
Respublikasının Prezidenti yanında Dövlət İdarəçilik
Akademiyasında (DİA) bu ali təhsil müəssisəsinin nəşri
olan "Dövlət idarəçiliyi: nəzəriyyə və təcrübə"
jurnalının ümummilli lider Heydər Əliyevin anadan
olmasının 90 illik yubileyinə həsr edilmiş xüsusi
buraxılışının təqdimatı keçirilmişdir.
AzərTAc xəbər verir ki, mərasimi açan DİA-nın rektoru,
akademik Urxan Ələkbərov bu günlərdə dünyanın müxtəlif
yerlərində müstəqil dövlətimizin qurucusu, Azərbaycanın
XX əsrdə yetirdiyi dahi şəxsiyyət Heydər Əliyevin anadan
olmasının 90 illik yubileyinin böyük ruh yüksəkliyi ilə
qeyd edildiyini, ulu öndərin xalq, Vətən qarşısındakı
xidmətlərinin bir daha xatırlandığını, əziz xatirəsinin
dərin ehtiramla yad olunduğunu diqqətə çatdırmışdır.
Ümummilli liderin irsini Azərbaycan xalqının milli
sərvəti kimi qiymətləndirən U.Ələkbərov Heydər Əliyevin
zəngin dövlətçilik təcrübəsinin öyrənilməsinin
zəruriliyini, onun böyük əhəmiyyətə malik olduğunu qeyd
etmiş, bu siyasi kursun layiqli davamçısı Prezident
İlham Əliyevin gördüyü işlər nəticəsində Azərbaycanın bu
gün sürətlə inkişaf etdiyini söyləmişdir.
Bildirilmişdir ki, DİA-nın nəşri olan "Dövlət
idarəçiliyi: nəzəriyyə və təcrübə" jurnalında əsasən
dövlət idarəçiliyinin səmərəliliyi, idarəetmə sistemində
elm və inkişafın planlaşdırılması, davamlı inkişaf,
ekoloji sivilizasiya və s. bu kimi mövzular prioritet
təşkil etməkdədir.
Prezident Administrasiyasının ictimai-siyasi məsələlər
şöbəsinin müdiri Əli Həsənov "Dövlət idarəçiliyi:
nəzəriyyə və təcrübə" jurnalının xüsusi buraxılışının
ümummilli lider Heydər Əliyevin 90 illik yubileyinə həsr
olunmasını əhəmiyyətli hadisə kimi qiymətləndirmişdir.
Əli Həsənov ümummilli liderin əvəzolunmaz xidmətlərindən
söz açaraq Azərbaycanın dövlətçilik tarixinə adı qızıl
hərflərlə həkk olunan Heydər Əliyev irsinin hər bir
azərbaycanlı üçün daim öyrəniləsi bir məktəb olduğunu
bildirmişdir.
Prezident Administrasiyasının şöbə müdiri bu gün ulu
öndərin layiqli davamçısı Prezident İlham Əliyevin
apardığı daxili və xarici siyasət nəticəsində ölkəmizin
dünyanın diqqət mərkəzində olduğunu vurğulamış,
Azərbaycanın beynəlxalq aləmdə sabit və qüdrətli bir
dövlət kimi yer tutduğunu demişdir.
Mərasimdə Nizami Rayon İcra Hakimiyyətinin başçısı Tahir
Budaqov, İordaniya Haşimilər Krallığının Azərbaycan
Respublikasındakı səfiri Adel Mohammad Adaileh və digər
çıxış edənlər də bütün dünyada tanınan görkəmli
siyasətçi, müstəqil Azərbaycan dövlətinin memarı və
qurucusu, həyatını xalqına, Vətəninə həsr etmiş ulu
öndər Heydər Əliyevin Azərbaycan tarixində, müasir
müstəqil dövlətimizin yaranmasında, inkişafında və
dünyaya tanınmasında misilsiz xidmətlərindən danışmış,
böyük xilaskarlıq rolunu vurğulamışlar. Ulu öndərin 90
illiyi ərəfəsində jurnalda ümummilli liderin həyat və
fəaliyyətinə həsr edilmiş məqalələrin elmi
əsaslanmalarının əhəmiyyəti vurğulanmış, elmi-akademik
dairələr, tədqiqatçılar, dövlət idarəçiliyi sahəsində
ixtisaslaşan gənc kadrlar üçün dəyərli mənbə olduğu
bildirilmişdir. |