|
Mayın 3-də Bakıdakı 179 nömrəli tam orta məktəbdə ulu
öndər Heydər Əliyevin anadan olmasının 90 illik
yubileyinə həsr olunmuş tədbir keçirilmişdir. Tədbirdə
məktəbin müəllim-şagird kollektivi ilə birgə Təhsil
Nazirliyindən, Binəqədi Rayon İcra Hakimiyyətindən, Bakı
Şəhəri üzrə Təhsil İdarəsindən nümayəndələr, KİV
təmsilçiləri, valideynlər və digər şəxslər iştirak
etmişlər. Azərbaycanın Dövlət himni səsləndikdən sonra
Üzeyir Hacıbəylinin "Koroğlu" operasının uvertürasının
sədaları altında Dövlət bayrağı səhnəyə gətirilmişdir.
İştirakçılar ulu öndər Heydər Əliyevin əziz xatirəsini
bir dəqiqəlik sükutla yad etmişlər.
Məktəbin həyətində bayram əhvali-ruhiyyəsi yaşanmışdır.
Divarlar bir-birindən fərqli gözəl güllərlə
bəzədilmişdir. Şagirdlərin əl işlərindən ibarət sərgi
nümayiş olunmuşdur. Tədbiri açıq elan edən təhsil
ocağının direktoru Kəmalə Abdullayeva diqqətə
çatdırmışdır ki, Azərbaycan Respublikasının müasir
inkişaf tarixi dahi şəxsiyyət Heydər Əliyevin adı, onun
dövlətçilik siyasəti ilə bağlıdır. Müstəqilliyimizin
xilaskarı və müasir Azərbaycanın yaradıcısı kimi tarixə
düşən Heydər Əliyevin siyasi irsi bugünkü uğurlarımızın
əsasını təşkil edir.
Tədbirin aparıcıları bildirmişlər ki, Azərbaycan
tarixində əbədi və uca yer tutan ulu öndərimizin
bənzərsiz tarixi şəxsiyyət kimi dövlətçiliyimizin
təşəkkülündə və inkişafında müstəsna rolu olmuşdur.
Onlar ulu öndərin Vətən və xalq naminə gördüyü nəhəng
işləri vurğulamış, bu fenomenal şəxsiyyətin şərəfli
ömrünün və dövlət quruculuğu sahəsində titanik
fəaliyyətinin indiki və gələcək nəsillərə nümunə
olduğunu, işıqlı xatirəsinin xalqımızın yaddaşında əbədi
yaşayacağını söyləmişlər.
Çıxış edənlər ümummilli lider Heydər Əliyevin elmin,
təhsilin inkişafına hər zaman böyük diqqət və qayğı ilə
yanaşdığını, ulu öndərin siyasi kursunun onun layiqli
davamçısı, Azərbaycan Prezidenti İlham Əliyev tərəfindən
uğurla davam etdirildiyini diqqətə çatdırmışlar.
Sonra ümummilli liderin şərəfli və mənalı ömür
yolundan, zəngin dövlətçilik təcrübəsindən və misilsiz
xidmətlərindən bəhs edən film nümayiş olunmuşdur.
Şagirdlər ümummilli lider Heydər Əliyevə həsr olunmuş
şeirlərlə, ifa etdikləri musiqi nömrələri, səhnədə
yaratdıqları gül fiqurları, bayrağımızın rənglərini
əhatə edən parçalardan ibarət səhnələrlə həmin günü daha
da maraqlı və yaddaqalan etmişlər.
Rəşad ZİYADOV |
