|
Respublikamızda ekologiya ilə bağlı məsələlərin ölkə
Prezidentinin daim diqqət mərkəzində olması ətraf
mühitin yaxşılaşdırılması istiqamətində aparılan işlərə
böyük təkan verir, iri layihələr uğurla həyata
keçirilir. Aprelin 25-də Azərbaycan Müəllimlər
İnstitutunda (AMİ) Ekologiya və Təbii Sərvətlər
Nazirliyinin mütəxəssisləri tərəfindən tələbələrin ətraf
mühitin birgə mühafizəsinə cəlb olunması və ulu öndərin
ideyalarının təbliği məqsədi ilə seminar keçirilmişdir.
Nazirliyin təbliğat şöbəsinin məsləhətçisi Şövkət
Bəkirovun təqdimatında ümummilli liderin ideyalarının
gənclərin ekoloji bilik və bacarıqlarının artırılması
sahəsində əhəmiyyəti vurğulanmışdır. Tədbir
iştirakçılarına ətraf mühit, su ehtiyatlarının idarə
olunması, xüsusi müdafiə olunan təbiət ərazilərinin
inkişafı, iqlim dəyişmələri, Azərbaycan Respublikasının
ekoloji vəziyyəti, Xəzər dənizinin mühafizəsi və s.
mövzularda geniş informasiya verilmişdir.
Aprelin 30-da institutda "Mavi planet, Yer kürəsi və
ekosfera" mövzusunda seminar keçirilmişdir. Gənclərin
Mənəvi İnkişafı İctimai Birliyinin nümayəndələrinin
keçirdiyi təqdimatda mühazirəçi Ramil Rüstəmov Yer
kürəsi, planetimizdəki həssas tarazlıqlar və ekosistem,
ətraf mühit problemləri, biotexnologiya,
biomühəndisliyin faydaları və gənclərimizin yaşadığımız
planet haqqında daha geniş təsəvvürlərinin
formalaşmasının vacibliyi haqqında danışmışdır. Sonra
canlıların daşlaşmış qalıqları olan fosillərin sərgisi
təşkil olunmuşdur. Təşkilatın nümayəndəsi Savalan
Məmmədli milyonlarla il yaşı olan bəzi fosil nümunələri
ilə iştirakçıları yaxından tanış etmişdir.
Ekologiya ilə bağlı keçirilən bu təlimlər Ekologiya və
Təbii Sərvətlər Nazirliyi və Azərbaycan Müəllimlər
İnstitutu tərəfindən qarşılıqlı əməkdaşlıq çərçivəsində
institutun Tələbə Gənclər Təşkilatının nəzdində
yaradılmış "Ekoklub"un təşkilatçılığı ilə baş tutmuşdur.
Bu seminarların əsas məqsədi tələbə gəncləri daha da
maarifləndirmək, cəmiyyətimizdə yaşadığımız planet və
ətraf mühitlə bağlı bilikləri artırmaqdır.
"Ekoklub"ların yaradılmasının əsas məqsədi ətraf mühit
və təbii sərvətlərin mühafizəsinin təbliğindən
ibarətdir. Hər iki tədbir iştirakçılar tərəfindən
maraqla qarşılanmış və tələbələri maraqlandıran suallar
cavablandırılmışdır.
AMİ-nin Mətbuat xidməti |
