|
Naxçıvan Dövlət Universitetində dövlət imtahanlarının
elektron test üsulu ilə keçirilməsinə hazırlıq və
qarşıda duran vəzifələrlə bağlı yığıncaq keçirilmişdir.
Tədbiri universitetin tədris işləri üzrə prorektoru,
dosent Seyid Surə açaraq Naxçıvan Muxtar Respublikası
Ali Məclisində "Naxçıvan Muxtar Respublikasında təhsilin
vəziyyəti və qarşıda duran vəzifələr" mövzusunda 18
oktyabr 2012-ci il tarixində keçirilmiş müşavirədə qəbul
edilən tədbirlər planının IV və VIII müddəalarına
müvafiq olaraq NDU-da elektron təhsilin təşkili ilə
bağlı layihənin həyata keçirilməsindən danışmışdır.
Çıxışda elektron təhsilin həyata keçirilməsi, tədrisdə
müasir informasiya texnologiyalarından istifadə, dünya
təhsil sisteminə inteqrasiya, Boloniya prosesinin tam
tətbiqinə nail olmaq baxımından imtahanların elektron
test üsulu ilə keçirilməsinin əhəmiyyətindən,
universitetdə bu sahədə qazanılan təcrübədən bəhs
olunmuşdur. Bu il dövlət imtahanlarının da elektron test
üsulu ilə keçiriləcəyi, imtahan suallarının ixtisaslara
uyğun kafedralarda tərtib olunub əvvəlcədən
universitetin rəsmi İnternet səhifəsində yerləşdirilməsi
barədə məlumat verilmişdir. Tədris işləri üzrə
prorektor, dosent Seyid Surə dövlət imtahanlarının tam
obyektiv və şəffaf keçiriləcəyini bildirmiş, ali təhsil
diplomu almaq üçün dövlət imtahanlarının
müvəffəqiyyətlə verilməsinin zəruriliyini vurğulayaraq
tələbələrə uğurlar arzulamışdır. Universitetin Tədris
şöbəsinin müdiri, tarix üzrə fəlsəfə doktoru, dosent
Rafiq Rəhimov dövlət imtahanlarının elektron test üsulu
ilə keçirilməsi ilə bağlı iki aya yaxın aparılan
hazırlıq prosesindən bəhs etmişdir. Qeyd olunmuşdur ki,
bu il 30 ixtisas üzrə 168 tələbə elektron test üsulu ilə
dövlət imtahanı verəcəkdir.
Elektron təhsil şöbəsinin müdiri Hüseyn Qasımov dövlət
imtahanlarının elektron test üsulu ilə keçirilməsi üçün
universitetdə hazırlanan və semestr imtahanlarında
uğurla tətbiq olunan bir sıra üstünlüklərə malik proqram
təminatı, imtahan gedişində onun imkanlarından istifadə
barədə tələbələri məlumatlandırmışdır.
İnformasiya-kommunikasiya texnologiyaları şöbəsinin
müdiri Xaliq Babayev universitetin rəsmi İnternet
səhifəsində dövlət imtahanlarının sualları, imtahanların
keçirilməsi barədə məlumatların yerləşdirilməsindən
danışmışdır.
Sonda tələbələrin sualları cavablandırılmışdır.
Mehriban SULTAN |
