Astara
şəhərində Azərbaycan xalqının ümummilli lideri Heydər
Əliyevin 90 illik yubileyinə həsr olunan
"İnformasiya-kommunikasiya texnologiyaları və
qloballaşma" mövzusunda beynəlxalq elmi konfrans
keçirilmişdir.
Astara Rayon İcra Hakimiyyətinin və Astara Pedaqoji
Kollecinin birgə təşkilatçılığı ilə keçirilmiş
beynəlxalq konfransda Azərbaycanın görkəmli elm
xadimləri ilə yanaşı, Rusiyadan, Özbəkistandan,
Türkiyədən və Hindistandan gəlmiş tanınmış alimlər də
iştirak etmişlər.
Beynəlxalq konfransın iştirakçıları xalqımızın ümummilli
lideri Heydər Əliyevin həyat və fəaliyyətindən bəhs edən
guşəyə baxmış və ulu öndərin portreti önünə tər gül
dəstələri qoymuşlar. Pedaqoji kollektivin üzvləri və
tələbələrlə səmimi söhbət edən xarici ölkələrdən gələn
alimlər tələbələrin əl işlərindən ibarət sərgiyə baxmış
və xatirə şəkilləri çəkdirmişlər.
Beynəlxalq elmi konfransın iştirakçıları Astara
şəhərinin mərkəzində ulu öndər Heydər Əliyevin abidəsi
önünə gül dəstələri qoymuş, Heydər Əliyev Mərkəzində
ümummilli liderin zəngin və mənalı ömür yolunu əks
etdirən eksponatlarla tanış olmuş, mərkəzin xatirə
kitabında öz rəylərini yazmışlar.
Sonra "Şindan" sarayında beynəlxalq elmi konfrans öz
işinə başlamışdır. Konfransı giriş sözü ilə Astara
Pedaqoji Kollecinin direktoru, fəlsəfə doktoru, əməkdar
müəllim, dosent, Rusiya Fəlsəfə Cəmiyyətinin üzvü
Əlihəsən Həmzəyev açaraq qeyd etmişdir ki, xalqımızın
xilaskarı, müstəqil Azərbaycan dövlətinin yaradıcısı,
ümummilli liderimiz Heydər Əliyevin 90 illik yubileyi
ölkəmizin hər yerində böyük şövq və ruh yüksəkliyi ilə
qeyd olunur. Yubiley tədbirləri təkcə respublikamızda
deyil, dünyanın əksər ölkələrində yaşayan
azərbaycanlılar və Heydər Əliyevi sevən digər xalqların
nümayəndələri tərəfindən böyük məhəbbətlə qeyd edilir.
Qeyd edilmişdir ki, Azərbaycan dünyada öz mövqeyi olan,
hərtərəfli inkişaf edən müstəqil respublikadır. Bütün bu
uğurların təməlini ulu öndər Heydər Əliyev qoymuşdur.
Ulu öndərin "Bu torpağın özü bərəkətli, insanları
zəhmətkeş, təbiəti də gözəldir" kəlamını xatırladan
Əlihəsən Həmzəyev qeyd etmişdir ki, bu gün gördüyünüz
inkişaf və tərəqqiyə görə astaralılar ulu öndər Heydər
Əliyevə və onun layiqli davamçısı ölkə Prezidenti cənab
İlham Əliyevə minnətdardırlar.
Konfransda vurğulanmışdır ki, müstəqillik illərində
Azərbaycana rəhbərlik edən tarixi şəxsiyyət Heydər
Əliyevin informasiya və kommunikasiya texnologiyalarının
imkanlarından faydalanmaq məqsədi ilə həyata keçirdiyi
məqsədyönlü işlər indi öz real bəhrəsini verir.
Beynəlxalq konfrans iştirakçıları ulu öndər Heydər
Əliyevin ömür yolundan bəhs edən "Əbədiyyət yolu" adlı
videoçarxa maraqla baxmışlar.
Sonra Astara Rayon İcra Hakimiyyətinin başçısı Qəzənfər
Ağayev çıxış edərək qeyd etmişdir ki, ümummilli
liderimiz Heydər Əliyevin memarı və qurucusu olduğu
müasir müstəqil Azərbaycan son 20 ildə həyatımızın bütün
sahələrində misilsiz inkişaf yolu keçmiş, dünyada
özünəməxsus yeri və nüfuzu olan dövlətlərdən birinə
çevrilmişdir. Ulu öndər Heydər Əliyevin ideyalarını
böyük uğurla yerinə yetirən, onun siyasətini ləyaqətlə
davam etdirən Azərbaycan Respublikasının Prezidenti
cənab İlham Əliyevin müdrik rəhbərliyi ilə dövlətimiz ən
mötəbər beynəlxalq təşkilatların aparıcı üzvlərindən
biri olmuşdur.
Diqqətə çatdırılmışdır ki, bu gün Azərbaycan
Respublikasında informasiya-kommunikasiya
texnologiyaları sahəsindəki fəaliyyət ümummilli lider
Heydər Əliyevin müəyyənləşdirdiyi strateji xətt üzrə
uğurla davam etdirilir. Heydər Əliyevin 2003-cü ildə
təsdiq etdiyi "Azərbaycan Respublikasının inkişafı
naminə informasiya-kommunikasiya texnologiyaları üzrə
Milli Strategiya" (2003-2012-ci illər) bu istiqamətin
ölkəmiz üçün vacibliyini və əhəmiyyətini vurğulayan ilk
rəsmi sənəd olmuşdur. Qloballaşma dövründə və gələcəkdə
İKT-nin əhəmiyyəti ön plana keçir. Müasir rabitə və
informasiya texnologiyaları, ölkəmizin hərtərəfli
inkişafı, əhalinin intellektinin yüksəldilməsi, həmçinin
dünyada baş verən inteqrasiya proseslərinə daha aktiv
cəlb olunması istiqamətində respublikamızın qarşısında
yeni imkanlar açmışdır. Regionun ən dinamik inkişaf edən
ölkəsi kimi Azərbaycan bu gün İKT sahəsinin
genişləndirilməsi üçün böyük imkanlara malikdir.
Cəmiyyətimiz bu imkanlardan maksimum bəhrələnərək dünya
birliyinə inteqrasiyanı özünün başlıca vəzifəsi kimi
görür.
Vurğulanmışdır ki, ulu öndər Heydər Əliyevin
ideyalarının ən böyük təntənəsi kimi Azərbaycanın ilk
telekommunikasiya peykinin orbitə çıxarılması, idarə
olunması və istismarını göstərmək olar. Kosmosda peyki
olan azsaylı ölkələrdən biri Azərbaycanda bu sahə üzrə
yerli mütəxəssislərin hazırlanması işi diqqət
mərkəzindədir.
Konfransda çıxış edən Rusiya Fəlsəfə Cəmiyyətinin
birinci vitse-prezidenti, fəlsəfə elmləri doktoru,
professor Aleksandr Nikolayeviç Çumakov və Özbəkistan
Fəlsəfə Cəmiyyətinin prezidenti, fəlsəfə elmləri
doktoru, akademik Səid Şermuxamedov ulu öndər Heydər
Əliyevlə bağlı xatirə və görüşlərindən danışmış,
haqqında yüksək fikirlər söyləmiş, onu təkcə Azərbaycan
xalqının ümummilli lideri deyil, bütün sülhsevər
bəşəriyyətin aparıcı simalarından biri, dünya
sivilizasiyasında özünəməxsus yeri olan dahi şəxsiyyət
adlandırmışlar.
AMEA-nın Fəlsəfə, Sosiologiya və Hüquq İnstitutunun
direktoru, professor İlham Məmmədzadə, "Braxma Kumaris
Sankt-Peterburq Mərkəzi" Regional mədəni-maarifçilik
ictimai təşkilatının baş direktoru, fəlsəfə elmləri
doktoru, professor Didi Santoş Kukredja (Hindistan),
Mirzə Uluqbəy adına Özbəkistan Milli Universitetinin
kafedra müdiri, fəlsəfə elmləri doktoru, professor
Niginaxon Şermuxamedova (Özbəkistan), Rusiya Elmlər
Akademiyasının Fəlsəfə İnstitutunun bölmə müdiri,
fəlsəfə elmləri doktoru, akademik Valentina Fedotova
(Rusiya), AMEA-nın müxbir üzvü, akademik Südeyf
İmamverdiyev, AMEA-nın Fəlsəfə, Sosiologiya və Hüquq
İnstitutunun böyük elmi işçisi, Rusiya Fəlsəfə Cəmiyyəti
vitse-prezidentinin beynəlxalq işlər üzrə müavini,
Rusiya Kulturologiya İnstitutunun böyük elmi işçisi,
fəlsəfə doktoru Ariz Gözəlov (Rusiya), professor Mirzə
Rəhimov, Milli Aviasiya Akademiyasının kafedra müdiri,
hüquq elmləri doktoru, professor İbrahim Quliyev,
Türk-rus Mədəni Mərkəzinin baş direktoru Arif Asalıoğlu
(Türkiyə), Moskva Dövlət Beynəlxalq Münasibətlər
İnstitutunun sosiologiya kafedrasının dosenti, sosioloji
elmlər doktoru Nadejda Fedotova (Rusiya), hüquq elmləri
doktoru, professor İsaxan Vəliyev, Bakı Dövlət
Universitetinin kafedra müdiri, biologiya elmləri
doktoru, professor Xudaverdi Qəmbərov, Bakı Musiqi
Akademiyasının professoru, fəlsəfə elmləri doktoru Mina
Hacıyeva, AMEA-nın Fəlsəfə, Sosiologiya və Hüquq
İnstitutunun professoru, fəlsəfə elmləri doktoru Aydın
Əlizadə, Azərbaycan Müəllimlər İnstitutunun dosenti,
pedaqogika üzrə fəlsəfə doktoru Şahrza Ağayev, Bakı
Musiqi Akademiyası incəsənət nəzəriyyəsi və tarixi
kafedrasının müdiri, əməkdar incəsənət xadimi, fəlsəfə
elmləri doktoru, professor Telman Hacıyev konfransda
çıxış etmişlər.
Beynəlxalq konfransın işində fəallıq göstərən
iştirakçılara və çıxış edənlərə ən yaxşı məruzəyə görə
fəxri diplom, sertifikat və I dərəcəli diplomlar
verilmişdir. Xaricdən gəlmiş qonaqlara Azərbaycan milli
ornamentlərini əks etdirən suvenir-xalçalar hədiyyə
edilmişdir.
Konfransın işini yekunlaşdıran Astara Pedaqoji
Kollecinin direktoru, fəlsəfə doktoru, dosent Əlihəsən
Həmzəyev qeyd etmişdir ki, ulu öndər Heydər Əliyevin
ideyaları bizi xoşbəxt gələcəyə aparır. Onun adı yüz
illər bundan sonra da qəlbimizdə yaşayacaq, ideyaları
daim bizə doğru yol göstərəcəkdir. Biz həmişə Heydər
Əliyevin parlaq dühası, dərin zəkası, möhtəşəm və dəmir
iradəsi, pak adı ilə fəxr edəcəyik.
Azad ABDULLAYEV |