Mayın
22-də Azərbaycan Respublikasının Prezidenti yanında
Dövlət İdarəçilik Akademiyasında Azərbaycan Xalq
Cümhuriyyətinin 95 illiyinə həsr edilmiş "Azərbaycan
Xalq Cümhuriyyəti - müsəlman Şərqində ilk Respublika"
mövzusunda respublika elmi konfransı keçirilmişdir.
Tədbiri giriş sözü ilə açan Dövlət İdarəçilik
Akademiyasının rektoru, akademik Urxan Ələkbərov
dövlətçilik salnaməmizin şərəfli tarixi olan Azərbaycan
Xalq Cümhuriyyətinin yaranmasından, onun az vaxt ərzində
süquta uğramasının səbəblərindən, müstəqilliyimizin
bərpası və qorunub saxlanılması ilə bağlı ölkəmizdə
görülən işlərdən danışmışdır. Rektor ümummilli lider
Heydər Əliyevin böyük çətinliklər bahasına
müstəqilliyimizin qorunması istiqamətində həyata
keçirdiyi müdrik siyasətdən ətraflı söz açmış, həmçinin
bugünkü irəliləyişə nail olmağımızın səbəblərini diqqətə
çatdırmış, Azərbaycan Respublikasının Prezidenti cənab
İlham Əliyevin xalqımızın tərəqqisi naminə gördüyü
işlərin əhəmiyyətini qeyd etmişdir.
Konfransın plenar iclasında tarix elmləri doktoru,
professor Anar İsgəndərov "Azərbaycan Xalq Cümhuriyyəti
dünənin və bu günün şərəfli tarixi", tarix elmləri
doktoru, professor Pərvin Darabədi "Azərbaycan Xalq
Cümhuriyyətinin hərbi quruculuq siyasəti", tarix elmləri
üzrə fəlsəfə doktoru, dosent Firdovsiyyə Əhmədova
"Azərbaycan Xalq Cümhuriyyətinin yaranması ərəfəsində
geosiyasi vəziyyət" mövzusunda məruzələrlə çıxış
etmişlər.
Sonra konfrans öz işini bölmə iclaslarında davam
etdirmişdir.
S.KƏRİMOVA |