|
 Mayın
21-də Azərbaycan Dillər Universitetində ADU-nun
İnformasiya Resurs Kompleksi və BMT-nin Bakıdakı
nümayəndəliyinin birgə təşkil etdiyi "21 May-Dialoq və
inkişaf naminə ümumdünya mədəni müxtəliflik günü"nə həsr
olunmuş tədbir keçirilmişdir.
Tədbirdə Azərbaycandakı müxtəlif Avropa və Asiya
ölkələrinin səfirləri və səfirliklərin nümayəndələri,
Azərbaycan Diplomatik Akademiyası (ADA) və Bakı Slavyan
Universitetindən (BSU) qonaqlar iştirak etmişlər.
Tədbirdə ADU-nun rektoru, Milli Məclisin deputatı,
professor Səməd Seyidov çıxış edərək bu günün tarixi
əhəmiyyətindən söz açmış və eyni zamanda ölkədəki mədəni
müxtəlifliyin mövcudluğunun beynəlxalq əlaqələrin
inkişafında mühüm rol oynadığını vurğulamışdır.
Gənclərin hər bir dövlətin mədəniyyəti ilə yaxından
tanış olduqlarını söyləyən rektor bu istiqamətdə ADU-da
bir çox mədəniyyət mərkəzlərinin uğurlu
fəaliyyətlərindən danışmışdır. Səməd Seyidov
bildirmişdir ki, ADU mədəni müxtəlifliyi özündə
birləşdirən bir mərkəzdir. Bu təhsil ocağında hələ
fəaliyyətinin başlanğıc mərhələsində yalnız ingilis,
fransız və alman dilləri tədris olunduğu halda, indiki
dövrdə 15-ə yaxın ölkənin dilləri tələbələrə öyrədilir.
BMT-nin Azərbaycandakı rezident əlaqələndiricisi
Antonius Bruk çıxış edərək bu günün tarixindən və
vacibliyindən danışmışdır. Bildirilmişdir ki, mədəni
müxtəliflik əməkdaşlığı daha da gücləndirir və mövcud
olan stereotiplərin aradan qaldırılmasına kömək edir. O,
BMT-nin bu istiqamətdə gördüyü işlərdən, keçirilən bir
sıra tədbirlərdən söz açmışdır.
Sonra tələbələrin ifasında V.Şekspirin əsərlərindən
monoloqlar söylənmişdir.
ADU-da fəaliyyət göstərən norveçli müəllim Roqnhild
Torinin ingilis dilinə tərcümə etdiyi Nizami Gəncəvinin
"Leyli və Məcnun" poemasının qısa təqdimat mərasimi
keçirilmişdir.
Tədbirdə 169 nömrəli orta məktəbin şagirdləri "Leyli və
Məcnun" poemasından ingilis dilində səhnəciklər
göstərmişlər.
Tədbirin ikinci hissəsi isə universitetin həyətində mini
festival şəklində keçirilmişdir. Festivalda 20-ə yaxın
ölkənin mədəniyyətini əks etdirən guşələr göstərilmiş,
rəqslər, mahnılar ifa olunmuşdur.
Şakir CƏFƏROV |
