|
 2012-2013-cü
tədris ili başa çatır. Bu gün - mayın 31-də ölkəmizin
ümumtəhsil məktəblərinin builki məzunları üçün onların
həyatında ən əlamətdar hadisə kimi qalacaq son zəng
çalınacaq. Bütün təhsil ocaqlarında ənənəvi, məzunlara
kövrək anlar yaşadan "Son zəng" tədbirləri keçiriləcək.
Doğma, əziz müəllimləri müstəqil həyata qədəm qoyan
gənclərə son məsləhət və tövsiyələrini verəcək, gələcək
təhsillərində və həyatlarında onlara uğurlar
arzulayacaqlar.
Məlumat üçün bildirək ki, 2012-2013-cü tədris ilində
respublikanın ümumtəhsil məktəbləri üzrə 216734 şagird,
o cümlədən IX sinif üzrə 125250, XI sinif üzrə isə 91484
nəfər məzun olacaq. Xatırladaq ki, ötən il ölkənin
ümumtəhsil müəssisələrinin XI siniflərini 92178 şagird
bitirmişdir.
Paytaxtın ümumtəhsil müəssisələrində bu il XI sinif üzrə
20721, XII siniflərlə birlikdə isə 21428 şagird məzunlar
sırasına qoşulacaq.
"Son zəng" həm də digər təhsil pillələri üzrə
müəssisələrdə də tədris ilinin başa çatdığını xəbər
verir. Bu il ilk peşə-ixtisas təhsili müəssisələrini
16635 məzun bitirir. Təhsil Nazirliyinin tabeliyində
olan ali təhsil müəssisələrindən tələbələrin gözlənilən
buraxılışı 26137 nəfər, nazirliyin tabeliyindəki orta
ixtisas təhsili müəssisələrindən isə 10399 nəfər təşkil
edir.
Ümumtəhsil məktəblərinin və ali təhsil müəssisələrinin
məzunlarını qarşıda son sınaq - buraxılış imtahanları
gözləyir. Onlara bu sınaqdan uğurla çıxmalarını
diləyirik. Bütün məzunları təbrik edir, onlara
cansağlığı və müstəqil həyatlarında müvəffəqiyyətlər
arzulayırıq. |
