"Təhsildə
İKT-nin rolu; İKT-dən istifadə etməklə erkən təhsildən
yayınmanın qarşısının alınması" layihəsi ilə bağlı
nümayəndə heyəti Azərbaycan Müəllimlər İnstitutunda
olmuşdur.
Azərbaycan Müəllimlər İnstitutunda (AMİ) Təhsil üzrə
Avropa Həmkarlar İttifaqı Komitəsinin "Təhsildə İKT-nin
rolu; İKT-dən istifadə etməklə erkən təhsildən
yayınmanın qarşısının alınması" layihəsi çərçivəsində
xarici ekspertlər araşdırma aparmışlar. AMİ-nin rektoru,
Milli Məclisin deputatı, professor Aqiyə Naxçıvanlı
layihənin baş koordinatoru, Təhsil üzrə Avropa Həmkarlar
İttifaqı Komitəsinin direktoru Martin Romerin rəhbərlik
etdiyi, tərkibində həmçinin Danimarka və Rusiyadan olan
ekspertlərin olduğu nümayəndə heyətini qəbul etmiş,
onlara Azərbaycan Müəllimlər İnstitutu haqqında ətraflı
məlumat vermişdir. Rektor A.Naxçıvanlı Prezident İlham
Əliyevin "Azərbaycan Respublikasında 2013-cü ilin
"İnformasiya-kommunikasiya texnologiyaları ili" elan
edilməsi ilə bağlı Tədbirlər Planı"nı təsdiq etməsini,
Azərbaycanın ilk telekommunikasiya peykinin orbitə
çıxarılmasını ölkəmizin İKT sahəsində əldə olunmuş böyük
nailiyyəti kimi dəyərləndirmiş və bu uğurların daha da
artacağına inandığını bildirmişdir.
Görüş zamanı layihə rəhbəri vurğulamışdır ki, bu layihə
Təhsil üzrə Avropa Həmkarlar İttifaqı Komitəsi
tərəfindən Avropa Komissiyasının maliyyə dəstəyi ilə
həyata keçirilir. Rusiya, Danimarka, Portuqaliya,
Niderland, Yunanıstan, Slovakiya kimi Avropa ölkələrinin
də iştirak etdiyi layihənin məqsədi təhsil işçilərinin
və təhsil alanların motivasiya edilməsi və yenidən
təhsilə cəlb olunmasında İKT-nin rolu ilə bağlı təhsil
müəssisələrində araşdırmalar aparmaq, müəllimlərin
İKT-nin potensialından pedaqoji nöqteyi-nəzərdən necə
istifadə etdiyini araşdırmaqdır. Bundan əlavə, müəyyən
olunmuş ən yaxşı təcrübələrin ölkələr arasında
transformasiyasının nəzərdən keçirilməsi, müxtəlif
Avropa ölkələrində müəllim təşkilatlarının təhsildə İKT
sahəsindəki işinə və onların milli-mədəni təhsil
kontekstlərinə müvafiq olan ən yaxşı metodik nümunələrin
qəbul olunmasına töhfələr verilməsi də layihənin
məqsədləri sırasındadır. Hazırda layihə üzvləri
tərəfindən yuxarıda adları göstərilən ölkələrdə İKT-nin
təhsildə rolu barədə araşdırma aparılır.
Layihənin təmsilçilərindən olan Azərbaycan Təhsil
İşçiləri Azad Həmkarlar İttifaqı Respublika Komitəsi
sədrinin müavini Mirzə Cəfərzadə də görüşdə iştirak
etmişdir. Layihə üzrə ekspertlər Azərbaycanda yalnız bir
ali təhsil müəssisəsində - imkanların daha geniş
olduğuna, təhsil səviyyəsinə, bölgələrdə filialları
fəaliyyət göstərdiyinə, filiallarla elektron əlaqələri
qurulduğuna görə Azərbaycan Müəllimlər İnstitutunda və
iki orta məktəbdə görüş keçirməyi nəzərdə tutmuşlar.
Ekspertlərə əlavə olaraq məlumat verilmişdir ki, AMİ
Təhsil islahatlarının, Milli Təhsil Konsepsiyasının
qarşıya qoyduğu tələblərin uğurla həyata keçirilməsi
istiqamətində öz fəaliyyətini qurmuşdur. Ölkəmiz
Boloniya təhsil sisteminə qoşulduqdan sonra institut bu
təlim texnologiyalarını tədris işinə tətbiq edən, yeni
qiymətləndirmə mexanizmini, kredit sistemi prinsiplərini
uğurla yerinə yetirən öncül ali məktəblərdən sayılır.
AMİ və onun filiallarının əlavə təhsil sistemində
aparıcı müəssisə hesab olunması ilə bağlı da ekspertlərə
məlumat verilmişdir.
AMİ-də apardıqları araşdırma zamanı ekspertlər
institutun müəllim və tələbə heyəti ilə fikir mübadiləsi
apararaq institut daxilində İKT-dən necə istifadə barədə
məlumat toplamış, onlara ünvanlanmış sualları
cavablandırmışlar. Görüşdən sonra qonaqlar institutun
nəzdində olan Heydər Əliyev Mərkəzini ziyarət etmiş,
sonra isə kompüter mərkəzi, elektron lövhə ilə təchiz
olunmuş auditoriyalar və konfrans zallarında da olmuş və
çox razı qalmışlar.
AMİ-nin Mətbuat xidməti |