|
 Mayın
30-da Azərbaycan Müəllimlər İnstitutunun Şamaxı
filialında IV kurs tələbələrinin istehsalat təcrübəsinin
yekununa həsr olunmuş konfrans keçirilmişdir. Tədbiri
giriş sözü ilə filialın direktoru, filologiya üzrə
fəlsəfə doktoru Tünzalə Yusifova açaraq qeyd etmişdir
ki, müstəqil respublikamızın inkişafında,
möhkəmlənməsində və hüquqi-demokratik, dünyəvi dövlət
kimi dünyaya inteqrasiya olunmasında təhsil siyasətinin
müstəsna rolu vardır.
Məhz buna görədir ki, ulu öndər Heydər Əliyev xüsusi
olaraq qeyd edirdi ki, məktəb, maarif, təhsil işi ilə
həmişə sıx bağlı olmuşam. Hesab edirəm ki, cəmiyyət
haradan olursa-olsun kəsib təhsilə xərcləməli, gənc
nəslin təhsilinə, müəllimə kömək etməlidir. Ümummilli
liderin fikrincə, hər bir Azərbaycan gənci öz həyat
yolunu müstəqil Azərbaycan Respublikasının gələcək yolu
kimi qəbul etməlidir. Gənclərin əsas vəzifəsi isə özünü
ölkəmizin inkişafına, müstəqil Azərbaycan
Respublikasının yaşamasına və əbədi olmasına həsr
etməkdən ibarət olmalıdır.
Bildirilmişdir ki, ulu öndərin tövsiyələrini rəhbər
tutan pedaqoji kollektiv milli tərbiyə işinin məzmununun
ilk növbədə gənclərin dövlətçilik, müstəqillik, azadlıq
və onların qorunması uğrunda mübarizlik ruhunda tərbiyə
olunmasından ibarət olduğu prinsipi ilə çalışır.
İstehsalat təcrübəsinin nəticələri bir daha təsdiqləyir
ki, pedaqoji kollektiv bu işdə uğurla fəaliyyət
göstərir. İkinci semestrin tədris qrafikinə müvafiq
olaraq müxtəlif ixtisaslar üzrə tələbələr Şamaxı şəhər
məktəblərində pedaqoji təcrübə keçmişlər.
 Təcrübəyə
yüksək ixtisaslı pedaqoq, psixoloq, metodist və müəllim
kadrları cəlb edilmişdir.
Sonra istehsalat təcrübəsi rəhbəri Zərifə Əsədova, dil,
ədəbiyyat və onların tədrisi metodikası kafedrasının
müəllimi Əlistan Əkbərov, M.Hadi adına şəhər 9 nömrəli
orta məktəbin direktoru Xasay İsayev, S.M.Qənizadə adına
1 nömrəli orta məktəbin direktor müavini Şura İsmayılova
çıxış edərək istehsalat təcrübəsində tələbələrin
elmi-nəzəri və pedaqoji hazırlığından, uğurla keçən
sınaq dərslərindən, hazırladıqları tədbirlərdən bəhs
etmişlər. Xasay İsayev daha sonra çıxışında pedaqoji
kollektiv adından filialın rəhbərliyinə,
professor-müəllim heyətinə təşəkkür etmişdir.
Tələbələrdən Tehran Səfərəliyev, Xədicə Orucova, Aygün
Abdullayeva çıxış edərək istehsalat təcrübəsində onlara
göstərilən qayğıya, yaradılan şəraitə görə məktəb
direktorlarına, metodist və fənn müəllimlərinə
minnətdarlıqlarını bildirmişlər.
Tədbirin sonunda istehsalat təcrübəsi zamanı ən fəal
tələbələrin hazırladıqları əyani vəsaitlərə baxış
keçirilmiş və ən yaxşı tələbə-müəllimin "açıq dərs"i
olmuşdur.
Samirə KƏRİMOVA |
