Mayın 31-də Lerik rayon Rvarud kəndində "son zəng" və
"məzun günü" keçirilmişdir. "Məzun günü" bir
əlamətdarlığı ilə də seçilmişdir. Belə ki, 30 il öncə
-1983-cü ildə bu orta məktəbi başa vurmuş və indi
istehsalatın müxtəlif sahələrində özlərini doğrultmuş
insanlar tədris ocağına təşrif gətirmişdilər. Onları və
digər qonaqları şəhid Səxavət Hacıyev adına tam orta
məktəbin direktoru, "Tərəqqi" medallı Zöhrab Salayev
salamlamışdır.
Qocaman müəllimlərdən Barat Abbasov, Ağabəy Vəliyev,
Şəkər Həsənov, Ağababa Babayev həm XI-ləri, həm də 30 il
əvvəlki məzunları təbrik etmişlər. Müəllimlərdən Gülab
Abbasov, İlham Dədəcanov, Feyruz Abdullayev ürək
sözlərini söyləmişlər.
30 il əvvəlki məzunlar onbirincilərə və birincilərə
hədiyyələr bağışlamışlar. Onların adından çıxış edən
M.Allahverdiyev demişdir:
- Sevincimin həddi-hüdudu yoxdur. Bu gün 30 il əvvələ
qayıtmışam, uşaq olmuşam. Mənə oturduğum köhnə partanı
göstərdilər. Bərk kövrəldim. Bu nostalji hissləri təkcə
mən yox, Əlövsət də, Bəxtiyar da, İlqar da, digər keçmiş
sinif yoldaşlarım da keçirirlər. Bir daha bütün bunlar
üçün müəllimlərimə "sağ olun" deyirəm. Onların etimadını
doğrultduğum üçün xoşbəxtəm.
Sonda tanınmış şair Ağacəfər Həsənli məzunları təbrik
etmiş, iştirakçılar qarşısında yeni şeirlərini
söyləmişdir.
Bəxtiyar HÜSEYNOV |