İyunun 12-də Azərbaycan Müəllimlər İnstitutunda (AMİ) 15
iyun - Milli Qurtuluş Gününə həsr olunmuş "dəyirmi masa"
keçirilmişdir. Dövlət himni səsləndirildikdən sonra
institutun rektoru, Milli Məclisin deputatı, professor
A.Naxçıvanlı çıxış edərək tədbir iştirakçılarını bayram
münasibətilə təbrik etmiş və 15 iyun tarixinin hər il
respublikamızda təntənəli şəkildə qeyd olunduğunu
vurğulamışdır. Bildirilmişdir ki, ölkəsi üçün
əhəmiyyətli məsələlərin həllində əvəzsiz xidmətlər
göstərmiş tarixi şəxsiyyət - ümummilli lider Heydər
Əliyev bütün həyatı boyu gördüyü böyük işləri və
əməlləri hesabına xalqın məhəbbətini qazanmış və
yaddaşlara əbədi həkk olunmuşdur.
Qeyd edilmişdir ki, məhz 1993-cü ildə hakimiyyətə
qayıdışından sonra ümummilli lider Heydər Əliyev
Azərbaycan xalqının milli inkişafının, bütövlüyünün
qorunmasının, etibarlı sabahının təməl prinsiplərini
formalaşdırdı. Ulu öndər Heydər Əliyev dövlətimizə
rəhbərlik etdiyi illərdə həyata keçirdiyi daxili və
xarici siyasəti ilə ölkəmizin nüfuzunu artırmış,
hərtərəfli inkişafa nail olmuşdur. Hazırda dövlət
başçısı cənab İlham Əliyev tərəfindən uğurla davam
etdirilən bu siyasət xalqımızın rifahının yüksəlməsinə,
dövlətimizin dünyada daha böyük nüfuz qazanmasına imkan
verir.
Tədbirdə çıxış edən ibtidai və məktəbəqədər təhsilin
metodikası kafedrasının müdiri, YAP-ın AMİ təşkilatının
sədri, professor Mircəfər Həsənov vurğulamışdır ki, 15
iyun tarixi Azərbaycan xalqının, dövlətinin,
iqtisadiyyatının, Azərbaycan gənclərinin gələcəyinin
qurtuluş günüdür. Azərbaycan ulu öndərin sayəsində çox
qüdrətli bir ölkəyə çevrilib, xalqın milli mənəvi
dəyərləri qorunub, Azərbaycan dili dövlət dili elan
edilib, yeni konstitusiya yaradılıb.
Daha sonra filologiya və təhsildə psixoloji xidmət
fakültəsinin I kurs tələbəsi Əli Nadirli "Heydər Əliyev
mənim üçün kimdir?", I kurs tələbəsi Əfsanə Məsimli "Mən
fəxr edirəm ki, azərbaycanlıyam", III kurs tələbəsi
Elnarə İsazadə "Heydər Əliyev və Azərbaycanda idman
siyasəti" mövzularında məruzə ilə çıxış etmişlər.
Pedaqoji fakültənin II kurs tələbəsi Xanım Babayeva
Zəlimxan Yaqubun "Ata Heydər - Atatürk" şeirini
səsləndirmişdir. Tədbirin sonunda ümummilli lider Heydər
Əliyevin həyat və fəaliyyətini əks etdirən film nümayiş
olunmuşdur.
AMİ-nin Mətbuat xidməti |