|
Yaponiya hökumətinin "Ot kökləri və insan təhlükəsizliyi
qrant yardımı" proqramı çərçivəsində həyata keçirilən
"Göyçay şəhərində məktəbin gigiyenik şəraitinin
yaxşılaşdırılması" layihəsinin icrası başa çatmışdır.
Göyçay Rayon Təhsil Şöbəsindən aldığımız məlumata görə,
bu münasibətlə iyunun 14-də keçirilən mərasimdə
Yaponiyanın ölkəmizdəki səfiri Şusuke Vatanabe, BMT-nin
Uşaq Fondunun (YUNİSEF) Azərbaycan nümayəndəliyinin
rəhbəri Mark Herevard, Göyçay Rayon İcra Hakimiyyətinin
başçısı Mənsur Məmmədov, RTŞ müdiri Asif Nəbiyev və
başqaları iştirak etmişlər. Mərasim iştirakçıları öncə
pilot layihə əsasında Göyçay şəhərindəki 6 nömrəli
məktəbdə və internat məktəbində inşa edilən müasir
sanitar qovşağı ilə tanış olmuş, orada müəllim və
şagirdlər üçün yaradılmış şəraitlə maraqlanmışlar.
Mərasimdə layihə barədə geniş məlumat verilərək
bildirilmişdir ki, "Yerli İdarəetməyə Yardım" İctimai
Birliyinin təşəbbüsü ilə Azərbaycanda ilk dəfə olaraq
Göyçaydakı M.Füzuli adına şəhər 6 nömrəli tam orta
məktəbdə və S.Vurğun adına internat məktəbində müasir
standartlara cavab verən yeni sanitar qovşağı tikilməklə
müəllim və şagirdlər üçün gigiyenik şərait xeyli
yaxşılaşdırılmışdır.
Qeyd olunmuşdur ki, bu məktəblərdə sanitar-gigiyenik
şəraitin yaxşılaşdırılmasına çox böyük ehtiyac var idi.
Bu ilin fevralında icrasına başlanılan layihə
çərçivəsində həmin təhsil ocaqlarında müasir
sanitar-gigiyenik standartlara cavab verən sanitar
qovşaqları və hamam tikilmiş, onlar davamlı olaraq isti
və soyuq su ilə təmin olunmuş, uşaqların bu sahədə
maarifləndirilməsi üçün görüşlər keçirilmiş, məlumat
kitabçaları paylanılmış, fiziki qüsurlu şagirdlər üçün
zəruri şərait yaradılmışdır. Ümumilikdə 806 şagird və
306 müəllim məktəbdə onlar üçün yaradılan şəraitdən
bəhrələnəcəkdir.
Məlumat verilmişdir ki, bu, Yaponiya səfirliyinin,
BMT-nin Uşaq Fondunun, valideyn-müəllim
assosiasiyalarının birgə həyata keçirdikləri pilot
layihədir. Ümumi dəyəri 123 min 342 ABŞ dolları olan bu
sınaq layihənin uğurundan asılı olaraq gələcəkdə
Azərbaycanın digər rayonlarında da bu cür işlərin həyata
keçirilməsi planlaşdırılır.
RTŞ-dan aldığımız məlumatda o da qeyd olunur ki,
Yaponiya hökumətinin "Ot kökləri və insan təhlükəsizliyi
qrant yardımı" proqramı çərçivəsində bu günədək Göyçay
rayonunda sel və daşqınların nəticələrinin aradan
qaldırılması, şəhərin su təchizatı sisteminin
yaxşılaşdırılması, Alpoud kənd məktəbi üçün yeni binanın
tikintisi, təcili və təxirəsalınmaz tibbi yardım
stansiyasının inzibati binasının əsaslı təmiri və
məktəblərin gigiyenik şəraitinin yaxşılaşdırılması üçün,
ümumilikdə, 444 min 203 dollar vəsait ayrılmışdır.
Yusif ƏLİYEV |
