İyunun 17-də Azərbaycan Müəllimlər İnstitutunda "18 iyun
- Azərbaycanda insan hüquqları günü"nə həsr olunmuş
"dəyirmi masa" keçirilmişdir. Tədbiri giriş sözü ilə
açan institutun rektoru, Milli Məclisin deputatı,
professor Aqiyə Naxçıvanlı bildirmişdir ki, ölkəmizdə
insan hüquqlarının qorunması sahəsinə çox ciddi diqqət
və qayğı ilə yanaşılır. Azərbaycanda bununla bağlı bir
sıra islahatlar aparılmış, dövlət qurumları
yaradılmışdır.
Qeyd edilmişdir ki, ümummilli lider Heydər Əliyevin
ölkəmizdə insan hüquqlarının müdafiəsi sahəsində gördüyü
işlər və insan hüquqlarının müdafiəsi üzrə apardığı
hüquqi islahatlar Prezident İlham Əliyev tərəfindən
uğurla inkişaf etdirilir. 1995-ci il noyabrın 12-də
qəbul edilmiş Azərbaycan Respublikası Konstitusiyası
dövlətimizin gələcək inkişaf prioritetlərini
müəyyənləşdirmiş, insan hüquq və azadlıqlarının dövlətin
ali məqsədi kimi ön plana çıxarmışdır. Rektor
A.Naxçıvanlı vurğulamışdır ki, dövlət başçısının 17 iyun
2007-ci il tarixli sərəncamı ilə 18 iyun tarixinin
Azərbaycanda "İnsan hüquqları günü" elan edilməsi bu
sahədə görülmüş işlərin davamı kimi qiymətləndirilə
bilər. Bununla əlaqədar olaraq, Azərbaycan Respublikası
insan hüquqları üzrə müvəkkilinin təşəbbüsü ilə cari
ildə də 18 may - 18 iyun tarixləri "İnsan hüquqları
aylığı" kimi qeyd edilir. Bu münasibətlə bütün
müəssisələrdə insan hüquqlarını təbliğ edən mövzularda
tədbirlərin keçirilməsi, o cümlədən bu "dəyirmi masa" da
mühüm əhəmiyyət daşıyır.
Tədbirdə institutun ictimai fənlər kafedrasının müdiri,
professor Qafar Cəbiyev, həmin kafedranın dosenti Telman
Haqverdiyev və dosent əvəzi Namiq Əliyev geniş məruzə
ilə çıxış etmişlər. Çıxış edənlər ölkəmizdə insan
hüquqlarının qorunması istiqamətində aparılan işlərdən,
xüsusilə də ümummilli lider Heydər Əliyevin Azərbaycan
Respublikasının insan hüquqları üzrə müvəkkili
(ombudsman) təsisatını yaratmasının, insan hüquq və
azadlıqlarının müdafiəsinin səmərəliliyini artırmaq
sahəsində Prezident İlham Əliyev tərəfindən qəbul
edilmiş mühüm sənədlərin əhəmiyyətindən danışmışlar.
Sonra Azərbaycan Respublikası Konstitusiya Məhkəməsinin
keçirdiyi ümummilli lider Heydər Əliyevin 90 illik
yubileyinə həsr olunmuş hüquq olimpiadasında
fərqləndiyinə görə fəxri fərmana layiq görülmüş təhsildə
sosial-psixoloji xidmət ixtisası üzrə III kurs tələbəsi
Günay Bayramova da mövzu ilə bağlı çıxış etmişdir.
AMİ-nin Mətbuat xidməti |