Javascript DHTML Drop Down Menu Powered by dhtml-menu-builder.com

ARXİV

21 İyun 2013 - №23

 

Bayrağımızı yüksəklərə qaldıran Azərbaycan gənci

 

Naxçıvan Müəllimlər İnstitutunun tələbəsi beynəlxalq türk dili olimpiadasında qızıl və gümüş medal qazanmışdır

Müstəqil fəaliyyətinin 10 illiyini qeyd etməyə hazırlaşdığımız Naxçıvan Müəllimlər İnstitutu son dövrlərdə bir sıra uğurlara imza atmışdır. İstər tədrisin keyfiyyətinin yüksəldilməsi, istər elmi - nəzəri biliklərin qazanılması, istərsə də dünyaya inteqrasiya sahəsində müəllim və tələbələrimizin uğurları getdikcə artır.

Maarifləndirici tədbirlərin nəticəsi olaraq təlim texnologiyalarına əsaslı surətdə yiyələnməyə çalışan tələbələrimiz həm də İnternet vasitəsi ilə dünya gənclərinin forum və simpozium çağırışlarına qatılır, dəvətlər alır və Azərbaycanımızı, o cümlədən doğma Naxçıvanımızı ləyaqətlə təmsil edirlər. Xarici ölkələrin universitet tələbələri cərgəsində öz sözlərini deyən, institutumuza başucalığı gətirən belə gənclərimizdən təhsildə sosial-psixoloji xidmət ixtisası üzrə IV kurs tələbələri Murad Məmmədov və Yaqut Rəhimovanın adlarını fəxrlə çəkmək olar. Son vaxtlar onlar beynəlxalq tələbə yarışmalarına qatılmışlar və uğurlu nəticələr əldə etmişlər.

Yaqut Rəhimova Avropada ən böyük tələbə assosiasiyası olan "Avropa tələbə forumu"na (AEÇEE) "Şəbəkə görüşü"nə  dəvət alaraq 18-21 aprel 2013-cü il tarixlərində İstanbul şəhərində keçirilmiş bu tədbirə qatılmışdır.

O, Avropanın 43 ölkəsinin 240 şəhərindən olan 15000-dək tələbənin qatıldığı "Dünya bir səma altında toplansın" adlı tədbirin "Mədəniyyət gecəsi"ndə yurdumuzu uğurla təmsil etmişdir.

Murad Məmmədov isə XI Beynəlxalq Türk dili Olimpiadasında "Hacı Zeynalabdin Tağıyev - sevdamın adı millət" mövzusunda təqdim etdiyi yazısı ilə birinci turda iştirak etmişdir. Albaniya, Əfqanıstan, Azərbaycan, Belarus, Bosniya-Herseqovina, Xorvatiya, Kosovo, Misir, Monqolustan, Rumıniya, Tacikistan, Türkmənistan, Ukrayna, Yunanıstan və Krım Muxtar Vilayəti ali təhsil müəssisələrinin tələbələri son tura vəsiqə almışlar. Naxçıvan Müəllimlər İnstitutunun tələbəsi  Murad Məmmədov Azərbaycan universitetləri arasında birinci yerə çıxaraq bu ölkələr içərisindən seçilən  15  universitet üzrə keçiriləcək son turda iştirakçı olmaq haqqı qazanmış və mükafat almışdır. 

Beynəlxalq Türk dili Olimpiadasına vəsiqə alan Murad Məmmədov 31 may 2013-cü il tarixdə son tura qatılmaq üçün Ankara şəhərinə yola düşmüşdür.

Türk dili yarışması şifahi və yazılı (inşa) olmaqla iki istiqamətdə keçirilmişdir.

Azərbaycanı əsas iştirakçı kimi Naxçıvan Müəllimlər İnstitutu təmsil edirdi.

Yarışmanın final turunda Murad Məmmədov iki nominasiya üzrə iştirak edirdi. O, türk şifahi nitqi üzrə keçirilən yarışmada qızıl, inşa yazıdan isə gümüş medal alaraq Azərbaycan himninin sədaları altında bayrağımızın ən yüksək yerə qalxmasını təmin etmişdir.

Murad Məmmədovun yüksək mükafata layiq görülməsi təkcə Naxçıvan Müəllimlər İnstitutunun qələbəsi deyil, eyni zamanda Azərbaycan gəncliyinin və dövlətimizin gənclərin təhsilinə göstərdiyi qayğının bariz nümunəsidir. Tələbələrimizin bu cür yarışmalarda iştirakı təsadüfi deyildir.

Ümumilikdə götürdükdə isə bütün bunlar institutumuzun, Naxçıvanda təhsil alan tələbə gənclərimizin də dünya gənclik  forumlarında iştirakının nümunəsi deməkdir. Bu həm də gənclərimizin gələcəkdə daha fəal olmalarına, daha ciddi forumlarda iştirak etmələrinə zəmin yaradır.

Dünya səviyyəsində bu cür tədbirlərin keçirilməsinin əhəmiyyəti hər bir tələbənin öz yaşadığı ölkənin mədəniyyəti, iqtisadiyyatı, milli mənəvi dəyərləri ilə ora gələn iştirakçıları tanış etmək və digər ölkələrin tələbələrinin çıxışlarını dinləmək və o ölkələri öyrənməkdən ibarətdir.

Eyni zamanda bu cür tədbirlərin keçirilməsi dünyanın məhəlli müharibələr və sabitsizliklə çalxalandığı indiki dövrdə dünya gənclərini bir araya gətirmək, onlar arasında dostluq əlaqələri və münasibətlərini yaratmaq, bu gün daha da kiçilən dünyamızı gələcək bəlalardan qurtarmaq yolunda ən vacib addımdır.

Ankaradaki  mötəbər yarışmadan qızıl və gümüş medalla qayıdan Murad Məmmədovu iki yüksək mükafat alması münasibəti ilə təbrik edirik. 

Həsənəli EYVAZLI,
filologiya üzrə fəlsəfə doktoru, Naxçıvan Müəllimlər İnstitutu  Xarici əlaqələr şöbəsinin müdiri

 
 
 
Səhifənin başına qalx Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov