Moskvada
dövlət federal məktəbəqədər təhsil standartları
layihəsinin təqdimatı keçirilmişdir. Layihənin
müəllifləri müəllimlərin, valideynlərin və uşaqların
özlərinin yeni sənədlə bağlı gözləntiləri, layihənin
unikallığı və onun ölkədə məktəbəqədər təhsil sisteminin
təkmilləşdirilməsində rolu barədə danışmışlar.
Təhsilin İnkişafı Federal İnstitutunun direktoru,
layihənin işçi qrupunun rəhbəri Aleksandr Asmolov
bildirmişdir ki, digər təhsil standartlarından fərqli
olaraq məktəbəqədər təhsil standartları ilk dəfədir ki,
hazırlanır. "Standartların işlənib hazırlanması ilə
peşəkarlardan ibarət bütöv qrup məşğul olmuşdur.
Onların yanaşmaları, baxışları müxtəlifdir, lakin onlar
məhz uşaqlara yönəlik standartların işlənib
hazırlanmasını qarşıya məqsəd qoymuşlar. Standartların
hazırlanması gedişində biz "zərər vurma" prinsipinə əməl
etmişik. Biz sosial-mədəni planda bir çox riskləri
hesablamışıq və onları nəzərə almağa çalışmışıq",-deyə
Asmolov bildirmişdir.
Məktəbəqədər təhsil standartlarının hazırlanması, ilk
növbədə, yeni təhsil qanununun qəbulu ilə bağlıdır.
Məktəbəqədər təhsil yeni qanunda ayrıca səviyyə kimi
gözdən keçirilir. Təqdimat iştirakçıları qeyd etmişlər
ki, məktəbəqədər təhsil və onun kriteriyalarının ifadə
olunmasına diqqət təkcə qanunvericilik dəyişiklikləri
ilə bağlı deyildir. Bu gün bir sıra sosial çağırışlar
mövcuddur ki, onlar yeni məktəbəqədər təhsil
standartlarının işlənib hazırlanmasını şərtləndirir.
Standartlarda məktəbəqədər təhsil sahəsində çalışan
pedaqoqlara verilən tələblər də əksini tapmışdır. İlk
dəfə olaraq sənəddə müəyyən olunmuşdur ki, məktəbəqədər
yaşlı uşaqlarla işləmək nə deməkdir, ona qarşı hansı
tələblər irəli sürülür, onun effektivliyini və
keyfiyyətini təmin etmək üçün hansı şərait yaradılır.
Moskva Şəhər Psixoloji-Pedaqoji İnstitutunun rektoru
Vitali Rubçovun sözlərinə görə, məktəbəqədər təhsil
sistemi üçün kadr hazırlığı onların psixoloji hazırlığı
nəzərə alınmaqla aparılmalıdır.
Sənəddə qeyd olunmuşdur ki, bu gün bütün uşaqların
məktəbəqədər təhsillə əhatə olunması zəruri şərtdir.
Beynəlxalq normaya görə, bir pedaqoq 15 uşaqla məşğul
olmalıdır. Aparılmış sosioloji araşdırmalar bu normanı
təsdiq etmişdir. Standartların unikal aspektlərindən
biri odur ki, bu proqram təhsil sisteminin digər
standartlarında olduğu kimi biliklər əldə olunmasını
deyil, psixoloji-pedaqoji dəstək, pozitiv sosiallaşma,
uşağın fərdi inkişafı proqramları kimi müəyyən olunur.
Standartlarda uşağın inkişaf dinamikasının
monitorinqindən bəhs olunur. Monitorinq qiymət
verilməsi kimi yox, pedaqoqa uşağın inkişafını təmin
etməkdə kömək edəcək üsulların üzə çıxarılması,
uşaqlarda qabiliyyətlərin müəyyən olunması və
problemləri aradan qaldırmaq üçün vacibdir. Bu cür
monitorinqlərlə məhz psixoloq-müəllimlər məşğul
olmalıdırlar. Bu cür tədqiqatlar yalnız valideynlərin
və ya uşağın qanuni nümayəndəsinin razılığı əsasında
aparıla bilər. Bütün bu məqamların yeni məktəbəqədər
təhsil standartlarının işlənib hazırlanmasında innovativ
yanaşmalardır.
Rusiya Təhsil və Elm Nazirliyinin ümumi təhsil sahəsində
dövlət siyasəti Departamentinin direktoru
A.Zıryanovanın sözlərinə görə, işçi qrupu tərəfindən 3
ay ərzində hazırlanmış sənəd müzakirələrdən və bir sıra
mümkün əlavə və dəyişikliklərdən sonra qəbul olunacaq.
"Uçitelskaya qazeta"dan |