|
 Rusiya
Təhsil və Elm Nazirliyində qurumun tabeçiliyində olan
ali məktəb rektorları ilə müşavirə keçirilmişdir.
Müşavirənin gündəliyində müəllimlərin əməkhaqları, qəbul
sayı, eləcə də ali məktəblərin keyfiyyətinin
monitorinqi kimi məsələlər olmuşdur. Yaxın həftələr
ərzində ali məktəblərin rektorları əməkdaşlarının
tarif və ştat cədvəllərini təqdim etməlidirlər.
Təhsil və elm naziri Dmitri Livanov qeyd etmişdir ki, bu
il ali məktəblərə tələbə qəbulu planında hər hansı
dəyişiklik gözlənilmir. Buna baxmayaraq, ali məktəblərin
rəhbərlikləri büdcə yerlərinə qəbulun gedişinə görə
məsuliyyət daşıyırlar. Nazir qeyd etmişdir ki, yerlərin
bölüşdürülməsi şəffaf, ədalətli və açıq olmalıdır.
Şəffaflığı təmin etmək üçün bu il avtomatlaşdırılmış
sistem tətbiq olunacaq. Qəbul kampaniyası gedişində əldə
olunan bütün məlumatlar bu sistemdə əksini tapacaq.
Ali məktəblərin keyfiyyəti məsələlərinin müzakirəsinə
gəlincə, iclasda qeyd olunmuşdur ki, əməkhaqları və
təhsilin keyfiyyətinə görə bütün məsuliyyət rektorların
üzərinə düşür. Nazir qeyd etmişdir ki, sentyabr ayından
başlayaraq müəllimlərin əməkhaqlarının baza hissəsi
artırılacaq. Onun sözlərinə görə, ölkənin təhsil
sistemində tələbə çatışmazlığı özünü göstərəcək.
2017-ci ildə tələbələrin sayı indikindən 27 faiz az
olacaq. Buna görə də ali məktəblərin keyfiyyəti məsələsi
aktuallıq kəsb edir.
İclasda bildirilmişdir ki, avqustun 15-də ali
məktəblərin keyfiyyətinin monitorinqinə başlanılacaq.
Monitorinqdə nazirlik tabeçiliyində olan ali məktəblərin
və onların filiallarında təhsilin gedişi, keyfiyyət
göstəriciləri, elmi tədqiqatların səviyyəsi,
məqalələrin yazılması, xarici tələbələrlə əhatə olunması
kimi məsələlər diqqətdə saxlanılacaq.
"Uçitelskaya qazeta"dan |
