|
İyunun 18-də Azərbaycan Dövlət Pedaqoji Universitetində
şair Oqtay Rzanın tələbələrlə görüşü keçirilmişdir.
Ziyalıların, şair və yazıçıların iştirak etdikləri bu
görüşdə ADPU-nun filologiya fakültəsinin dekanı,
professor Buludxan Xəlilov, Prezident təqaüdçüsü, şair
İlyas Tapdıq, universitetin Azərbaycan ədəbiyyatı və
onun tədrisi metodikası kafedrasının müdiri, əməkdar
müəllim, professor Zahid Xəlil və başqaları şairin həyat
və yaradıcılığından, Azərbaycan poeziyasına verdiyi
töhfələrdən danışmışlar.
Çıxış edənlər bildirmişlər ki, Azərbaycan poeziyasının
tanınmış nümayəndələrindən biri olan ADPU-nun dosenti
O.Rza həyatında çox çətin günlər yaşamasına baxmayaraq,
yaradıcılığını daim inkişaf etdirmişdir. Son illərdə
yazdığı rübailər şairin poeziyasının zənginliyindən
xəbər verir. Həmin rübailərdə elmi, əxlaqi, mədəniyyət,
ədəbiyyat məsələləri, eləcə də Azərbaycanın inkişafı ilə
bağlı çox dəyərli fikirlər öz əksini tapmışdır.
Görüşdə şairin şeirlərindən parçalar səsləndirilmiş,
sözlərinə bəstələnmiş mahnılar ifa olunmuşdur.
Sonda Oqtay Rza görüşün təşkilatçılarına və
iştirakçılarına öz minnətdarlığını bildirmiş və
sualları cavablandırmışdır.
Tədbir diskussiya şəklində başa çatmışdır.
Şakir CƏFƏROV |
