|
İyunun 21-də S.Vurğun adına Azərbaycan Dövlət Rus Dram
Teatrında rus dili və ədəbiyyatı üzrə respublika
olimpiadasına təntənəli şəkildə yekun vurulmuşdur.
AzərTAc xəbər verir ki, Rusiyanın Azərbaycandakı
səfirliyi, "Rossotrudniçestvo" agentliyinin Bakı
nümayəndəliyi, Azərbaycanın Rus İcması və Azərbaycanın
Rusdilli Təhsil Müəssisələrinin Müəllimləri
Assosiasiyası tərəfindən keçirilmiş olimpiadada rus və
Azərbaycan dillərində təhsil alan 6-11-ci sinif
şagirdləri iştirak etmişlər.
Bu il ətraf mühitin mühafizəsi ilinə həsr olunmuş
olimpiada "Birlikdə rus dilində danışırıq" devizi
altında keçirilmişdir.
Rusiyanın Azərbaycandakı səfiri Vladimir Doroxin
olimpiadada mükafata layiq yer tutmuş şagirdləri təbrik
edərək bildirmişdir ki, Azərbaycanda rus dilini
öyrənməklə bağlı problemlər yoxdur. Burada tədbir
keçirmək asandır, çünki heç kəsi dilə tutmağa ehtiyac
yoxdur. Burada rus dilinə maraq azalmır və bu da
düzgündür, çünki dünya elminin və biliklərinin
açarlarından biri rus dilidir. Səfir bütün rus dili
müəllimlərinə minnətdarlığını bildirmişdir.
Səfir Vladimir Doroxin, xalq yazıçısı Çingiz Abdullayev,
Azərbaycanın Rus İcmasının başçısı Mixail Zabelin
olimpiadada birinci üç yeri tutmuş iştirakçılara fəxri
fərman və xatirə hədiyyələri təqdim etmişlər.
Olimpiadada ilk yerləri tutanlar Rusiyaya
ekskursiya-tanışlıq səfərində iştirak etmək imkanı
qazanmışlar.
Şagirdləri olimpiadada fərqlənmiş müəllimlərə də fəxri
fərman və xatirə hədiyyələri təqdim olunmuşdur.
"Rossotrudniçestvo"nun Azərbaycandakı nümayəndəliyinin
rəhbəri Valentin Denisov onları təbrik edərək demişdir
ki, "Rossotrudniçestvo" Rusiya İnformasiya və Mədəniyyət
Mərkəzində Azərbaycanda Rus Dili və Ədəbiyyatı
Qalereyasının təsis edilməsi barədə qərar qəbul
etmişdir. Qalereyada respublikanın ən yaxşı rus dili
müəllimlərinin portretləri nümayiş etdiriləcək, habelə
onların adları Şərəf kitablarına yazılacaqdır.
Tədbir çərçivəsində maraqlı konsert proqramı olmuşdur.
Konsertdə məktəblilər, eləcə də peşəkar artistlər musiqi
və rəqs nömrələri ilə çıxış etmişlər.
Mərasimdə xarici ölkələrin Bakıda akkreditə olunmuş
diplomatik missiyalarının, Azərbaycan Təhsil
Nazirliyinin nümayəndələri, Milli Məclisin deputatları,
ictimai və mədəniyyət xadimləri iştirak etmişlər. |
