Bakı
Pedaqoji Kadrların İxtisasartırma və Yenidənhazırlanma
İnstitutunda Azərbaycan Respublikası Silahlı
Qüvvələrinin yaradılmasının 95-ci ildönümü münasibətilə
tədbir keçirildi. Tədbirdə institutun professor-müəllim
heyəti, Bakı şəhər tam orta məktəblərinin gənclərin
çağırışaqədər hazırlıq rəhbərləri, Azərbaycanın Milli
Qəhrəmanı Mirəsgər Seyidovun anası Zemfira Seyidova və
digər qonaqlar iştirak edirdilər.
İnstitutun Heydər Əliyev muzey-lektoriyasında Azərbaycan
Respublikasının Dövlət himni səsləndirildikdən sonra
rektor, professor Asəf Zamanov tədbiri giriş sözü ilə
açaraq Silahlı Qüvvələrin müstəqil dövlətimizin
qurulmasında, inkişafında və möhkəmləndirilməsində
misilsiz xidmətlərindən danışdı.
A.Zamanov keçmişə nəzər salaraq bildirdi ki, milli
ordumuzun yaranma tarixi Azərbaycan Cümhuriyyətinin bir
dövlət kimi təşəkkül tapması, məmləkətimizin dövlətlər
arasında, bayrağımızın bayraqlar sırasında var olması
uğrunda canını belə əsirgəməyən, bu yolda "Vətən
mücahidləri" adını özlərinə şərəf bilən ölməz oğulların
qanı ilə suvarıldığı, ruhu ilə mayalandığı mübarizlik
yolundan başlayır.
Vurğulandı ki, Azərbaycan Respublikası Silahlı
Qüvvələrinin 95 illik uzun və şərəfli bir mübarizə yolu
keçib bu günümüzə qovuşması, müasir dünya təcrübəsi ilə
ayaqlaşa bilmək bacarığına malik güclü və yenilməz bir
orduya çevrilməsi xalqımızın ümummilli lideri Heydər
Əliyevin adı ilə bağlıdır. Qeyri-adi siyasi gücə, iradi
qüvvəyə, yüksək sərkərdəlik məharətinə və insani
keyfiyyətlərə malik bu böyük şəxsiyyətin hakimiyyətə
gəldiyi 1969-cu ildən başlanan tarixi mərhələ həm də
Azərbaycanın nizami ordusunun formalaşdırılması kimi
səciyyələnir. Bu mənada Heydər Əliyev Milli Ordunun və
hərbi məktəblərin daha müasir səviyyədə yaradılması
istiqamətlərini dəqiq müəyyənləşdirərək xalqın təkidli
tələbi ilə ikinci dəfə hakimiyyətə gəlişinin ilk
günündən nizami ordu yaradılmasını ön plana çəkdi.
Ölkənin müdafiə gücünün əsas istiqaməti kimi, bu işin
uğurla həyata keçirilməsi üçün hər cür şərait yaratdı.
Diqqətə çatdırıldı ki, Azərbaycan Respublikası
Prezidentinin 22 may 1998-ci il tarixli qərarına əsasən
26 iyun Silahlı Qüvvələr Günü elan edilib və hər il
xalqımız həmin günü təntənəli şəkildə bayram edir.
Azərbaycan Respublikasının Prezidenti, Ali Baş Komandan
möhtərəm İlham Əliyevin xüsusi diqqət və qayğısı
sayəsində son illərdə ordumuzun döyüş qabiliyyəti
yüksəlmiş, maddi-texniki bazası möhkəmləndirilmiş,
hərbçilərin sosial vəziyyətlərinin yaxşılaşdırılması
istiqamətində mühüm addımlar atılmış və bu proses uğurla
davam etdirilir.
Xalqımızın Ramil Səfərov, Mübariz İbrahimov, Fərid
Əhmədov, Əhməd Abdullayev kimi oğullarımızın xidmət
etdiyi Azərbaycan ordusu ilə fəxr etdiyini deyən natiq
Azərbaycanın beynəlxalq aləmdə gündən-günə artan
nüfuzunun zəfər bayrağının tezliklə işğal olunmuş
torpaqlarımızda dalğalanacağına inam yaratdığını
söylədi.
Sonra Azərbaycanın Milli Qəhrəmanı Mirəsgər Seyidovun
anası Zemfira Seyidova oğlunun ömür və döyüş yolundan
danışaraq bir ana kimi onunla qürur duyduğunu və belə
bir övlad böyütdüyü üçün iftixar hissi keçirdiyini dedi.
Həmçinin bugünkü tədbirin təşkilinə və onu dəvət
etdiklərinə görə institut rəhbərliyinə minnətdarlığını
bildirdi.
Tədbirdə institutun əməkdaşları - Nurəddin Hüseynov,
Fikrət Əliyev, Qarabağ müharibəsi veteranları, gənclərin
çağırışaqədər hazırlıq rəhbərləri - Abdulla Seyidov və
İbrahim Allahverdiyev çıxış edərək bu əlamətdar günün
respublikamızın tarixindəki əhəmiyyətindən və ümumi
təhsil müəssisələrində yeniyetmələrə vətənpərvərlik
ruhunun aşılanmasından söz açdılar.
Sonda institutun rektoru, professor Asəf Zamanov tədbir
iştirakçılarını bayram münasibətilə təbrik edib
fəaliyyətlərində uğurlar arzuladı.
Tural QULİYEV |