İyunun
29-da Xaçmaz rayonunun Nabran qəsəbəsində Azərbaycan
Təhsil İşçiləri Azad Həmkarlar İttifaqı Respublika
Komitəsi tərəfindən inşa olunan "Təhsil" istirahət
mərkəzinin açılış mərasimi olmuşdur.
Mərasimdə Azərbaycan Həmkarlar İttifaqları
Konfederasiyasının sədri, Milli Məclisin deputatı Səttar
Mehbalıyev, Xaçmaz Rayon İcra Hakimiyyətinin başçısı
Şəmsəddin Xanbabayev, Azərbaycan Təhsil İşçiləri Azad
Həmkarlar İttifaqı Respublika Komitəsinin məsul
şəxsləri, yerli icra hakimiyyətinin nümayəndələri, sahə
həmkarlar ittifaqları və ATİAHİ-nin üzv təşkilatları
olan rayon, şəhər komitələrinin sədrləri və başqaları
iştirak etmişlər.
Azərbaycan Həmkarlar İttifaqları Konfederasiyasının
sədri, Milli Məclisin deputatı Səttar Mehbalıyev açılış
mərasimində çıxış edərək əsası ümummilli lider Heydər
Əliyev tərəfindən qoyulmuş strateji inkişaf kursunu
əzmlə həyata keçirən ölkə başçısı cənab İlham Əliyevin
yürütdüyü məqsədyönlü siyasətin uğurları sayəsində bu
gün Azərbaycanın sosial-iqtisadi inkişaf tempinə görə
dünyanın öncül ölkələrindən birinə çevrildiyini,
əhalinin sosial-rifah halının yüksəldilməsi,
respublikamızda işsizliyin, yoxsulluğun aradan
qaldırılması istiqamətində davamlı olaraq mühüm işlərin
həyata keçirildiyini xüsusi vurğulamışdır.
Bildirilmişdir ki, istər Bakı şəhərində, istərsə də
respublikanın bütün bölgələrində abadlıq, quruculuq
işləri geniş vüsət almışdır. Hər il yeni istehsal
müəssisələri, idman, əyləncə, istirahət mərkəzləri inşa
olunaraq vətəndaşlarımızın ixtiyarına verilir.
Milli Məclisin deputatı Səttar Mehbalıyev çıxışında
Azərbaycanda əldə olunan davamlı inkişafın həmkarlar
ittifaqı təşkilatlarının da fəaliyyətinə öz müsbət
təsirini göstərdiyini demişdir. Qeyd olunmuşdur ki, öz
üzvlərinin əmək, sosial, iqtisadi hüquqlarının və qanuni
mənafelərinin müdafiəçisi olan Azərbaycan Təhsil
İşçiləri Azad Həmkarlar İttifaqı Respublika Komitəsi
təhsil işçilərinin müalicə və istirahətinin səmərəli
təşkil edilməsini daim diqqətdə saxlayır.
"Təhsil" istirahət mərkəzi haqqında danışan AHİK-in
sədri qeyd etmişdir ki, bu mərkəzi inşa etdirməklə
ATİAHİ Respublika Komitəsi hər il daha çox sayda ittifaq
üzvünün istirahətini təmin etmək niyyətindədir.
Çıxışının sonunda Azərbaycan Həmkarlar İttifaqları
Konfederasiyasının sədri Səttar Mehbalıyev adıçəkilən
istirahət mərkəzinin inşa olunmasında göstərdikləri
dəstəyə görə şəhər, rayon həmkarlar ittifaqı
komitələrinə təşəkkürünü bildirmiş və yeni bir istirahət
məkanının açılması münasibəti ilə ittifaq üzvlərini
təbrik etmişdir.
Çıxış üçün söz alan Xaçmaz Rayon İcra Hakimiyyətinin
başçısı Şəmsəddin Xanbabayev Nabranda hər cür şəraitə
malik istirahət mərkəzinin istifadəyə verilməsini
dövlətimizin təhsil işçilərinə diqqət və qayğısının daha
bir parlaq təzahürü kimi qiymətləndirmişdir.
Sonra mərasim iştirakçıları "Təhsil" istirahət
mərkəzində yaradılmış şəraitlə tanış olmuşlar. Tanışlıq
zamanı diqqətə çatdırılmışdır ki, təbiətin qoynunda
salınmış istirahət mərkəzi eyni vaxtda 230 nəfərdən
artıq ittifaq üzvünə xidmət etmək imkanına malikdir.
İstirahət mərkəzinin yerləşdiyi əraziyə üçmərtəbəli
sanatoriya binası, koteclər, yeməkxana, konfrans və
idman zalları, müxtəlif oyun meydançaları, üzgüçülük
hovuzu, İnternet klub və digər tikililər daxildir.
Məlumat üçün bildirək ki, "Təhsil" istirahət mərkəzi
təhsil işçilərinə əsasən yay məzuniyyəti dövründə xidmət
göstərəcəkdir. Qış mövsümündə də xidmət göstərilməsi
üçün mərkəzdə müvafiq işlər görülməkdədir.
Samirə KƏRİMOVA |