Naxçıvan Dövlət Universitetində Azərbaycan hökuməti və
Beynəlxalq İnkişaf Assosiasiyasının birgə həyata
keçirdiyi "Dövlət İnvestisiyaları üzrə Kadr
Potensialının Gücləndirilməsi" layihəsi çərçivəsində
növbəti təlim kursu keçirilmişdir.
"Reform - Centre" Məhdud Məsuliyyətli Cəmiyyəti və
Azərbaycan Respublikasının Prezidenti yanında Dövlət
İdarəçilik Akademiyası tərəfindən "Dövlət və özəl sektor
arasında tərəfdaşlıq" mövzusunda keçiriləcək təlim
kursunun açılış mərasimində giriş sözü ilə universitetin
beynəlxalq əlaqələr üzrə prorektoru, riyaziyyat üzrə
fəlsəfə doktoru Anar Kazımov çıxış edərək müxtəlif
mövzulara həsr olunmuş 11 təlim kursunun uğurla
reallaşdırılmasından bəhs etmişdir. Qeyd olunmuşdur ki,
regionun bütün dövlət strukturlarının və nazirliklərin
əməkdaşlarını, habelə universitetin müxtəlif ixtisaslar
üzrə müəllim və tələbələrini əhatə edən bu təlim
kursları kadr hazırlığı baxımından mühüm əhəmiyyət kəsb
edir.
Universitetin rektoru, biologiya elmləri doktoru,
professor Saleh Məhərrəmov çıxışında təlim kurslarının
təşkilini muxtar respublika rəhbərliyinin dövlət
idarəçiliyi sahəsində milli kadr potensialının
artırılmasına, mütəxəssis hazırlığına növbəti qayğısı
kimi qiymətləndirmişdir. Rektor beynəlxalq ekspertlərin
təcrübələrinin öyrənilməsi və tətbiqinin zəruriliyindən
danışmışdır.
Təlim kursunun koordinatoru, "Reform - Centre" Məhdud
Məsuliyyətli Cəmiyyəti və Azərbaycan Respublikasının
Prezidenti yanında Dövlət İdarəçilik Akademiyasının
əməkdaşı Asif Nəsibov bildirmişdir ki, təlim kursunun
məqsədi iştirakçıları dövlət və özəl sektor arasında
tərəfdaşlığa dair konsepsiyalar, qaydalar və
strategiyalar haqqında əsas məlumatlarla, müvafiq
təlimatlarla tanış etməkdir.
Ekspert təlimçi, Varşava İqtisadiyyat İnstitutunun
məzunu, Polşa və digər Avropa ölkələrində icra olunmuş
20-dək dövlət və özəl sektor arasında tərəfdaşlıq
layihəsinin hazırlanmasında iştirak etmiş Bartosz
Mysiorski bu sahədə olan dünya təcrübəsi, təlim kursunda
bəhs olunacaq mövzular barədə məlumat vermişdir.
6 günlük təlim kursunda müxtəlif dövlət strukturlarında
çalışan mütəxəssislər, eləcə də universitetin sosial
idarəetmə və hüquq, iqtisadiyyat fakültələrinin
tələbələri də iştirak edəcək.
Mehriban SULTAN,
NDU-nun Mətbuat şöbəsinin müdiri |