|
 İyunun
28-də AMİ-nin Şamaxı filialında məzun günü keçirilmişdir.
Bu münasibətlə təşkil olunan tədbiri giriş sözü ilə açan
filialın direktoru, filologiya elmləri üzrə fəlsəfə
doktoru Tünzalə Yusifova qeyd etmişdir ki, müstəqil
Azərbaycan dövlətinin uğurlu gələcəyi gənc nəslin bu gün
aldığı bilik, təhsil və tərbiyədən asılıdır. Ümummilli
lider Heydər Əliyev Azərbaycanda güclü iqtisadiyyatın
yaradılması ilə bərabər, cəmiyyətin tərəqqisinin əsas
hərəkətverici qüvvəsi hesab olunan təhsilin inkişafına
da böyük diqqət və qayğı göstərmişdir. Ölkəmizdə təhsil
islahatlarına başlanması, Dünya Bankının islahatlar
prosesinə cəlb edilməsi, təhsil sahəsində öz həllini
gözləyən problemlərin aradan qaldırılmasına yönəlmiş bir
sıra dövlət proqramlarının qəbulu birmənalı şəkildə
ümummilli lider Heydər Əliyevin təşəbbüsü və qətiyyətli
mövqeyi sayəsində mümkün olmuşdur. Ulu öndər Heydər
Əliyevin öz həmvətənlərinə əmanət qoyduğu müstəqil
Azərbaycan ölkə Prezidenti İlham Əliyev cənablarının
rəhbərliyi ilə gələcəyə doğru inamla addımlayır.
T.Yusifova gənclərə müraciətlə demişdir: "Siz çox
xoşbəxtsiniz ki, müstəqil Azərbaycan dövlətində ali
təhsil alaraq gənc nəslin təlim-tərbiyəsi ilə məşğul
olacaq, əsl vətənpərvərlər yetişdirəcəksiniz. Bu gün
sizlər, bizim məzunlar ölkəmizi, müstəqil respublikamızı
dövlət başçımızın rəhbərliyi ilə əldə olunmuş
nailiyyətlərin üzərində gələcək uğurlara apara bilən
ümidlərimizsiniz. Artıq siz ulu öndərimiz Heydər
Əliyevin ondan yüksək ad tanımadığı şərəfli müəllimlik
adını qazanmısınız. Bu münasibətlə sizləri və sizin
simanızda bu il məzun olan bütün gəncləri təbrik edirəm".
Tədbirdə təhsildə və filialın ictimai işlərində
fərqlənən bir qrup tələbə fəxri fərmanla təltif
olunmuşdur.
Sonra Tünzalə Yusifova bu il magistraturaya qəbul olan
filialın yeddi nəfər tələbəsi və üç gənc işçisini ayrıca
təbrik edərək onlara gələcək elmi işlərində yeni-yeni
nailiyyətlər arzulamışdır.
Tədbirdə Şamaxı Rayon İcra Hakimiyyətinin məsul işçiləri
Elmar Kərimov, Məleykə Kamilova, dosentlər Mayıl
Alıcanov, Eyvaz Eminalıyev çıxış edərək məzunlara
uğurlar diləmişlər.
Niyazi RƏHİMOV |
