|
Azərbaycan Respublikasının Prezidenti yanında Dövlət
İdarəçilik Akademiyasında "Elektron hökumət" istiqaməti
üzrə qısamüddətli ixtisasartırma kursu keçirilmişdir.
Kursa dövlət hakimiyyətinin mərkəzi, şəhər, rayon
miqyaslı orqanlarının, müvafiq nazirlik, komitə və
idarələrinin rəhbər işçiləri cəlb olunmuşlar.
Kursun əsas məqsədi Azərbaycanda informasiya cəmiyyəti
quruculuğu, elektron hökumət - dövlət orqanlarının
fəaliyyətinin təşkilinin yeni forması kimi, elektron
hökumətin normativ-hüquqi təminatı, dövlət informasiya
sistemləri və ehtiyatları, reyestrlər, minilliyin yeni
inkişaf məqsədləri və s. problemlərlə bağlı biliklərin
dinləyicilərə çatdırılması və onlarla fikir
mübadiləsinin aparılması idi.
Kurs ərzində DİA-nın rektoru, akademik Urxan Ələkbərov,
akademiyanın tədris işləri üzrə prorektoru, professor
Əlikram Abdullayev, rabitə və informasiya
texnologiyaları nazirinin müavini Elmir Vəlizadə, Rabitə
və İnformasiya Texnologiyaları Nazirliyinin şöbə müdiri
Bəxtiyar Məmmədov, Məlumat Hesablama Mərkəzinin şöbə
müdiri İlqar Abdullayev, DİA-nın inzibati idarəetmə
fakültəsinin dekanı Eldar Azadov problemə dair müxtəlif
mövzularda mühazirələrlə çıxış etmişlər.
Sonda kurs üzrə dinləyicilərin buraxılış mərasimi
keçirilmişdir. Akademiyanın rektoru, akademik Urxan
Ələkbərov dinləyicilərə kursu müvəffəqiyyətlə
bitirdiklərinə görə sertifikatlar təqdim etmiş, gələcək
işlərində uğurlar arzulamışdır.
Şakir CƏFƏROV |
