|
 İyulun
10-da Bakı Pedaqoji Kadrların İxtisasartırma və
Yenidənhazırlanma İnstitutunda "Məzun-2013" adlı tədbir
keçirilmişdir. Tədbirdə institutun professor-müəllim
heyəti, məzunlar, valideynlər və qonaqlar iştirak
etmişlər. Öncə iştirakçılar institutda yaradılmış Heydər
Əliyev muzey-lektoriyası ilə tanış olmuşlar.
Azərbaycan Respublikasının Dövlət himni
səsləndirildikdən sonra tədbiri giriş sözü ilə açan
institutun rektoru, professor Asəf Zamanov iyirmi
birinci yüzilliyin problemlərinin həlli üçün hər bir
cəmiyyətdə yeniləşmiş ali təhsilin zəruriliyini diqqətə
çatdırmışdır. Təhsilin əhəmiyyətindən söz açan rektor
bildirmişdir ki, təhsilsiz heç bir millətin və dövlətin
nə mədəni, nə sosial, nə də texniki inkişafı mümkündür.
Müasir təhsilin uğurlarının daim dəyişən şəraitdə çevik
uyğunlaşma qabiliyyəti ilə müəyyənləşdirildiyi, bu işdə
yenidənhazırlanma yolu ilə mütəxəssislərin
hazırlanmasının xüsusi əhəmiyyəti olduğu bildirilmişdir.
Nəzərə çatdırılmışdır ki, 2012-2013-cü tədris ilində
"riyaziyyat və informatika müəllimliyi", "təhsildə
sosial-psixoloji xidmət", "Azərbaycan dili və ədəbiyyatı
müəllimliyi", "məktəbəqədər təlim və tərbiyə"
ixtisasları üzrə 118 nəfər institutu müvəffəqiyyətlə
bitirmişdir.
Əsası ümummilli lider Heydər Əliyev tərəfindən qoyulan
gənclər siyasətinin hazırda Azərbaycan Respublikasının
Prezidenti İlham Əliyevin rəhbərliyi ilə uğurla davam
etdirildiyini bildirən A.Zamanov qeyd etmişdir ki,
institut kollektivi bu uğurlu siyasətdən bəhrələnərək
gənclərimizin intellektual potensialının artırılması
üçün daim çalışır, təhsil müəssisələrinin ixtisaslı və
yüksək səviyyəli kadr potensialı ilə təmin olunması üçün
bütün imkanlardan maksimum istifadə edir. Rektor məzun
adını qazanmış bütün tələbələri, onların müəllimlərini,
o cümlədən bu işdə əməyi olan hər bir şəxsi təbrik
edərək, məzunlara gələcək həyatlarında və peşə
fəaliyyətlərində uğurlar arzulamışdır.
Tədbirdə çıxış edən Milli Məclisin deputatı, psixologiya
elmləri doktoru, professor Bəxtiyar Əliyev institutun
fəaliyyətini yüksək qiymətləndirərək onun əldə etdiyi
uğurlarının son illər daha da artdığını və təhsil
müəssisəsində elmi və ziyalı mühitinin yüksək səviyyədə
formalaşdığını diqqətə çatdırmışdır. O, məzunları təbrik
edərək, bu günün onların həyatında əlamətdar gün
olduğunu nəzərə çatdırmışdır.
Binəqədi Rayon İcra Hakimiyyəti başçısının müavini Vüsal
İsmayılov tədbirdə çıxış edərək məzunları təbrik etmiş,
onlara uğurlar arzulamışdır.
Tədbirdə institutu yüksək nailiyyətlə bitirən 14 nəfər
məzun təhsil uğurlarına və institutun ictimai həyatında
fəal iştirak etdiklərinə görə Elmi Şuranın qərarına
əsasən diplomlar və fəxri fərmanlarla təltif edilmişdir.
Bundan başqa, institutun professor-müəllim heyətinin bir
qrup üzvünə də diplomlar verilmişdir.
Tədbirdə çıxış edən məzunlar qazandıqları bilik və
bacarıqlara, təhsil aldıqları müddətdə onlara göstərilən
diqqət və qayğıya görə institut rəhbərliyinə və
professor-müəllim heyətinə minnətdarlıqlarını
bildirərək, onlara göstərilən etimadı doğruldacaqlarını
söyləmişlər.
Sonda məzunlarla xatirə şəkli çəkilmişdir.
Niyazi RƏHİMOV |
