|
 Azərbaycan
Respublikası Prezidentinin 7 iyul 2011-ci il tarixli
sərəncamı ilə təsdiq edilmiş "Azərbaycant gəncliyi
2011-2015-ci illərdə" Dövlət Proqramının həyata
keçirilməsi məqsədilə 2013-cü il iyulun 14-dən Sumqayıt
şəhərində yaşayan və fəaliyyət göstərən yaradıcı,
istedadlı və ictimai fəal gənclər, o cümlədən gənc
müəllimlər, gənc təbiblər, gənc kimyaçılar və digər
təşkilatların nümayəndələri üçün "Vətənimizi gəzək,
öyrənək, sevək!" devizi altında "Yay məktəbi" öz işinə
başlamışdır. Gənclərin vətənpərvərlik və vətəndaşlıq
tərbiyəsi, onların asudə vaxtının səmərəli təşkili, bu
qəbildən olan gənclər arasında ünsiyyətin, qarşılıqlı
təcrübə və məlumat mübadiləsinin yaradılması məqsədilə
keçirilən builki tədbir Sumqayıt Şəhər İcra
Hakimiyyətinin təşəbbüsü ilə şəhər Gənclər və İdman Baş
İdarəsi tərəfindən Qusar rayonunda baş tutmuşdur.
Sumqayıt Şəhər Gənclər və İdman Baş İdarəsindən
aldığımız məlumata görə, iyul-avqust ayları ərzində
davam edəcək "Yay məktəbi"ndə ümumilikdə 500 nəfər
olmaqla şəhərdə mövcud olan müəssisə və idarələrdə,
gənclər təşkilatları və qurumlarında çalışan fəal və
yaradıcı gənclərin iştirakı planlaşdırılmışdır.
"Yay məktəbi" müstəqil Azərbaycan Respublikasının
banisi, xalqımızın ümummilli lideri Heydər Əliyevin ilk
dəfə qırx dörd il öncə siyasi hakimiyyətə gəldiyi gündən
- iyulun 14-dən Sumqayıt şəhərindəki Heydər Əliyev
Mərkəzindən start götürmüşdür. İştirakçılar Mərkəzlə
tanış olduqdan sonra "Yay məktəbi"nin təntənəli açılış
mərasimi olmuşdur. Tədbirdə Sumqayıt Şəhər Gənclər və
İdman Baş İdarəsinin rəisi Musa Həsənov, Heydər Əliyev
Mərkəzinin direktoru Aygün Zülfüqarlı çıxış edərək "Yay
məktəbi"nin əhəmiyyətini qeyd etmiş, gənclərə uğurlu
fəaliyyət arzulamışlar. Ulu öndər Heydər Əliyevin həyat
və fəaliyyətindən bəhs edən videoçarx nümayiş
etdirilmişdir.
Mərasimdə Qusar rayonuna gəldikdən sonra iştirakçılar
ümummilli lider Heydər Əliyevin, 1918-ci il mart
soyqırımı qurbanlarının xatirəsinə "Qanlı dərə" adlı
yerdə ucaldılmış abidələri ehtiramla ziyarət etmiş,
önünə gül dəstələri qoymuşlar.
"Qanlı dərə" abidəsinin qarşısında Sumqayıt və Qusar
gənclərinin iştirak etdiyi mitinqdə çıxış edən Qusar
Rayon İcra Hakimiyyəti başçısının müavini Elman
Mustafayev Sumqayıt gənclərini salamlayaraq onların əldə
etdikləri uğurların respublikada müsbət əks-səda
doğurduğunu qeyd etmişdir.
Sumqayıt Şəhər Gənclər və İdman Baş İdarəsinin rəisi
Musa Həsənov şəhər icra hakimiyyəti rəhbərliyinin səmimi
salamlarını çatdırmışdır. O, çıxışında gənclərin bu
abidəyə ziyarətinin tarixi keçmişin unudulmaması
məqsədilə təşkil olunduğunu, baş idarənin təşkilatçılığı
ilə son illər yeddi min nəfərə yaxın yeniyetmə və gəncin
Quba rayonundakı "Soyqırımı məzarlığı"nı ziyarət
etdiyini qeyd etmişdir.
Natiqlər erməni millətçiləri tərəfindən 1918-ci ildə
qəzanın 162 kəndinin dağıdıldığını, bunlardan 27-nin
əhalisi ilə birlikdə yandırıldığını, 16 min nəfərdən çox
azərbaycanlının qətlə yetirildiyini, həmin il mayın
18-də Quba qəzasının Digah kəndinin "Qanlı dərə" adlanan
ərazisində Amazaspın quldur dəstələrinin darmadağın
edildiyini qeyd etmişlər. Eyni zamanda çıxışlarda son
illər ölkəmizin iqtisadi potensialının daha da
güclənməsi nəticəsində mümkün olmuş "Yay məktəbi"nin
təşkilinin mühüm əhəmiyyəti nəzərə çatdırılmışdır.
Sonra gənclər Şahdağ Yay Turizm Kompleksinə tanışlıq
gəzintisi etmiş, onların şərəfinə "Qaya Bulaq" və
"Xidir" ailəvi istirahət mərkəzlərində çay və nahar
süfrələri təşkil olunmuş, mənalı istirahətləri
(əyləncəli, şən, maraqlı oyunlar və s.) təmin
edilmişdir.
İştirakçıların hər birinə xüsusi hazırlanmış köynəklər,
papaqlar və s. hədiyyələr, həmçinin "Yay məktəbi"nin
proqramı təqdim olunmuşdur.
Yusif ƏLİYEV |
