|
 Xəbər
verildiyi kimi, bu il mayın 19-dan 24-dək İndoneziyanın
paytaxtı Cakartada Beynəlxalq layihə olimpiadası (İSPRO
- İnternational Science Projekt Olimpiad) keçirilmişdir.
Dünyanın 24 ölkəsinin məktəblilərinin iştirak etdiyi
olimpiadada Azərbaycanı Mingəçevir, Gəncə və Lənkəran
özəl türk liseylərinin şagirdləri təmsil etmişlər. 93
layihə təqdim olunan yarışma kifayət qədər gərgin və
güclü rəqabət şəraitində keçmişdir. Qalibləri İndoneziya
Təhsil Nazirliyinin nümayəndələri müəyyənləşdirmişlər. 5
gün davam etmiş olimpiadanın açılış mərasimi İndoneziya
Dövlət Universitetində olmuşdur.
Mingəçevir Özəl Türk Liseyindən aldığımız məlumata görə,
əvvəlcə olimpiadada iştirak edən şagirdlər üçün öz
ölkələrini tanıtmaq məqsədi ilə stendlər təşkil
olunmuşdur. Bu fürsətdən Mingəçevir Özəl Türk Liseyinin
şagirdləri də məharətlə istifadə edərək üç stendlə
ölkəmizi tanıtmağa çalışmışlar. Onların təşkil etdikləri
stendlərin birində Azərbaycanın bütün şəhər və rayonları
haqqında məlumat yerləşdirilmiş, iki və üçüncü
stendlərdə isə layihə və maketlər öz əksini tapmışdır.
Olimpiadaya təqdim olunan layihələ
r 3 kateqoriya olmaqla kimya, biologiya və fizika
fənlərini əhatə etmişdir. Mingəçevir Özəl Türk Liseyinin
şagirdləri olimpiadaya kimya fənni kateqoriyasında
hazırladıqları layihə ilə qatılmışlar. Bu kateqoriya
üzrə müxtəlif dövlətlərdən 33 layihə medallar uğrunda
mübarizə aparmışdır. Həmin layihələr içərisində MÖTL-nin
şagirdləri Yaqub Cabbarlı və Rauf Abdullazadənin işləri
də tələbkar münsiflər heyətinin diqqətini cəlb etmiş və
onlar olimpiadanın bürünc medallarına layiq görülmüşlər.
Şagirdlərlə birlikdə onların müəllimi Ahmet Kara da
bütünc medal almışdır.
Yaqub Seymur oğlu Cabbarlı 1999-cu il iyunun 22-də
Yevlax rayonunun Xaldan qəsəbəsində anadan olmuşdur.
2005-ci ildə Xaldan kompleks orta məktəbində I sinfə
qəbul olunmuşdur. Həmin məktəbdə təhsil aldığı 6 il
ərzində bütün fənlərdən qiymətləri "əla" olmuşdur.
2011-ci ildə imtahan verərək Bakı Özəl Türk Liseyinin
Mingəçevir filialına daxil olmuşdur. Yaqub liseydəki
təhsili və olimpiadadakı qələbəsi haqqında deyir:
"Liseydə oxuduğum müddətdə kimya fənninə maraq
göstərdiyimə görə bu fənn üzrə olimpiadalara cəlb
olunmuşam. Beynəlxalq olimpiadada ilk uğurum bu il olub.
Belə ki, bu il mayın 19-25-də İndoneziyada keçirilən
İSPRO olimpiadasında iştirak etmiş, 3-cü yerə layiq
görülmüşəm. İndoneziyanın paytaxtı Cakartada
Azərbaycanın üçrəngli bayrağını qələbəm münasibəti ilə
dalğalandırdığım üçün özümü xoşbəxt hiss edirəm. Bu
uğuruma görə təhsil aldığım liseyin müəllimlərinə
minnətdaram".
Rauf Hakim oğlu Abdullazadə 1999-cu il avqustun 19-da
Qəbələ rayonunda anadan olmuşdur. 2005-ci ildə
Mingəçevir şəhər 4 nömrəli tam orta məktəbdə I sinfə
getmişdir. 2006-cı ildə təhsilini Bakıdakı 281 nömrəli
tam orta məktəbdə davam etdirmişdir.
2011-ci ildə Bakının Xətai rayonunda yerləşən "Araz"
kurslarında 6 aylıq hazırlıq keçdikdən sonra imtahan
verərək Mingəçevir Özəl Türk Liseyinə qəbul olunmuşdur.
Hazırda liseyin 9-cu sinfində oxuyur.
Yaqub və Raufun beynəlxalq olimpiadada təqdim etdikləri
layihənin əsas mövzusu ətraf mühitin qorunmasından,
tullantı maddələrin yenidən istehsalata qaytarılmasından
bəhs edirdi. Konkret olaraq bu layihə Azərbaycanda
bioplastik maddənin inkişafı, bunun üçün ölkəmizdə
zavodların qurulması barədə idi. Plastik qablar istehsal
edən və plastikləri istifadə olunduqdan sonra yenidən
istehsalata qaytaran zavodların Azərbaycanda olmaması
layihənin əsas özəlliklərindən idi.
Cakartada olimpiada zamanı maket üzərində sərgilənən
layihədə Kür çayı ətrafında tikilmiş Bioplastik zavod,
insanların istirahəti üçün park və Azərbaycan bayrağı öz
əksini tapmışdır.
Olimpiada həm də məktəblilərin yaddaşında özünün zəngin
mədəni-kütləvi tədbirlər, gəzintilər proqramı ilə
qalmışdır. Digər iştirakçılar kimi ölkəmizin gənc
təmsilçiləri də İndoneziyanın gəzməli, görməli yerləri
ilə tanış olmaq imkanı qazanmışlar. İndoneziyanın
paytaxtından 100 km məsafədə yerləşən Safari zooparkı
isə onların xüsusilə marağına səbəb olmuşdur.
Beynəlxalq olimpiada günlərində Yaqub və Rauf digər
ölkələrdən gəlmiş həmyaşıdları ilə ünsiyyət qurmaq,
dostlaşmaq imkanından da səmərəli istifadə etmiş, bir
sıra ölkələrin nümayəndələri ilə dostluq əlaqələri
yaratmışlar.
Yusif ƏLİYEV |
