|
Son illər Astara rayonunda məktəblərin maddi-texniki
bazasının möhkəmləndirilməsi diqqət mərkəzindədir.
Rayon təhsil şöbəsindən verilən məlumata görə, 2005-ci
ildən bəri rayonda 21 yeni məktəb binası tikilib
istifadəyə verilmişdir. Onlardan 13-ü dövlət vəsaiti
hesabına, 5-i Heydər Əliyev Fondu, 2-si Fövqəladə Hallar
Nazirliyi, 1-i isə Yaponiya səfirliyi tərəfindən inşa
olunmuşdur. 2006-cı ildən etibarən rayonda 13 məktəbin
binası əsaslı təmir olunmuşdur. 2013-cü ildə də rayonda
yeni məktəb binalarının tikintisi sürətlə aparılır. İlin
əvvəlindən indiyədək 3 məktəb üçün yeni binanın
tikintisi başa çatdırılmış və onlar istifadəyə
verilmişdir. Bunlar rayonun Motalayataq, Şağləzüzə,
Telman kənd tam orta məktəbləridir. Hər üç məktəb üçün
tikilmiş binalar 220 şagird yerlikdir.
Hazırda rayonun Suparibağ, Əsxənəkəran kənd tam orta
məktəbləri üçün hərəsi 220, Siyaku, Vaqo və Hamuşam kənd
tam orta məktəbləri üçün hərəsi 360, Şüvi kənd tam orta
məktəbi üçünsə 480 şagird yerlik yeni binalar inşa
olunur.
Bunlarla yanaşı, Rüdəkənar kənd ümumi orta məktəbi üçün
180, Anboba və Əzərüd kənd ibtidai məktəblərinin hər
biri üçünsə 80 şagird yerlik yeni binalar tikilməkdədir.
Dövlət vəsaiti hesabına inşa olunan yeni məktəb
binalarının yeni dərs ilində açılması nəzərdə
tutulmuşdur.
Yeni tikilən bütün məktəb binaları zəruri avadanlıqlarla
təmin olunacaq və onlarda tədris üçün normal şərait
yaradılacaqdır.
***
Ölkəmizin bütün bölgələrində olduğu kimi, Saatlı
rayonunda da yeni məktəb binalarının tikintisi və mövcud
binaların əsaslı təmiri istiqamətində ardıcıl iş
aparılır.
Rayon təhsil şöbəsindən aldığımız məlumata görə, hazırda
rayonun iki kəndində yeni məktəb binaları inşa olunur.
Bunlar Əliabad kənd ümumi orta məktəbi üçün tikilən 180
və Qıraqlı kənd ümumi orta məktəbi üçün inşa olunan 220
şagird yerlik məktəb binalarıdır. Bunlardan əlavə, 950
şagird yerlik şəhər 2 nömrəli və 1176 şagird yerlik
Fətəlikənd kənd tam orta məktəblərinin binalarında
əsaslı təmir işləri aparılır. Məktəblərin dördü də yeni
dərs ilində istifadəyə veriləcəkdir. Qeyd olunan tədris
ocaqları təzə inventar və avadanlıqlarla təmin olunmuş,
onlarda yeni tipli istilik sistemləri quraşdırılmışdır.
***
Balakən Rayon Təhsil Şöbəsindən aldığımız məlumatda qeyd
olunur ki, rayonun zəlzələdən ziyan çəkmiş kəndlərində
2013-cü ildə 7 məktəb üçün yeni binaların tikilməsi
planlaşdırılmışdır.
Onlardan 2-si artıq tikilib təhvil verilmişdir. Bunlar
300 şagird yerlik Qarahacılı kənd tam orta məktəbinin və
80 yerlik Qaracabinə kənd ümumi orta məktəbinin
binalarıdır. 5 məktəb üçünsə yeni binaların tikintisi
hazırda davam etdirilir. Belə ki, rayonun Hənifə kənd
tam orta məktəbi üçün 480, Qazma kənd 2 nömrəli tam orta
məktəbi üçün 360, Qazbinə, Şambul və Qullar kənd 2
nömrəli tam orta məktəblərinin hər biri üçünsə 220
şagird yerlik yeni binalar inşa olunur.
Azərbaycan Respublikası Fövqəladə Hallar Nazirliyi
tərəfindən inşa olunan yeni məktəb binalarının hamısının
təzə avadanlıqla təmin olunması nəzərdə tutulub.
Tikilməkdə olan yeni məktəb binaları yeni dərs ilinə
istifadəyə veriləcəkdir.
Bundan başqa, rayon təhsil şöbəsi üçün tikilən yeni
ikimərtəbəli inzibati binada da hazırda son tamamlama
işləri görülür.
Yeni binanın avqustda açılışı gözlənilir.
Yusif ƏLİYEV |
