Naxçıvan
Dövlət Universitetində dördüncü çağırış Naxçıvan Muxtar
Respublikası Ali Məclisinin yeddinci sessiyasının
yekunları və NDU qarşısında duran vəzifələrə həsr
olunmuş yığıncaq keçirilmişdir.
Yığıncağda universitetin rektoru, biologiya elmləri
doktoru, professor Saleh Məhərrəmov məruzə edərək
sessiyada 2013-cü ilin birinci yarısında Naxçıvan Muxtar
Respublikasının sosial-iqtisadi inkişafının yekunları,
Naxçıvan Muxtar Respublikasının 2012-ci il dövlət
büdcəsinin icrasının təsdiq edilməsi məsələlərinin
müzakirə olunması, 2013-cü ilin birinci yarısında
Naxçıvan Muxtar Respublikasının dinamik sosial-iqtisadi
inkişafı ilə bağlı göstəricilərin diqqətə çatdırılması
barədə məlumat vermişdir. Qeyd olunmuşdur ki, muxtar
respublika rəhbərinin diqqət və qayğısı ilə bu
sosial-iqtisadi inkişafdan universitet də kifayət qədər
bəhrələnmiş, maddi-texniki bazanın gücləndirilməsi,
universitetin müasir tədris avadanlıqları,
informasiya-kommunikasiya texnologiyaları vasitələri
ilə təchiz olunması, təhsilin və tədrisin dünya
standartları səviyyəsində qurulması, universitetin
beynəlxalq əlaqələrinin inkişafı istiqamətində
əhəmiyyətli addımlar atılmışdır. Rektor Naxçıvan Muxtar
Respublikası Ali Məclisinin sədri Vasif Talıbovun
sessiyadakı proqram xarakterli məruzəsində elm və
təhsilin inkişafı, savadlı, hərtərəfli dünyagörüşə malik
mütəxəssislərin yetişdirilməsi məqsədilə təhsil
ocaqlarında İKT-nin imkanlarından və interaktiv
metodlardan istifadəyə üstünlük vermək, kompüter
biliklərinin və xarici dillərin tədrisini diqqət
mərkəzində saxlamaq kimi qarşıya qoyulan mühüm
vəzifələrdən, təhsilin və tədrisin məzmun və keyfiyyətcə
daha da yüksək səviyyədə qurulmasına nail olmaq
məqsədilə görüləcək işlərdən danışmışdır.
Universitetin tədris işləri üzrə prorektoru, filologiya
üzrə fəlsəfə doktoru, dosent Seyid Surə universitetdə
2013-cü ilin birinci yarısında tədris sahəsində əldə
olunan nailiyyətlərlə bağlı məruzə etmişdir. Məlumat
verilmişdir ki, 2012-2013-cü tədris ilində
universitetdə təhsil alanların sayı 211 nəfər xarici
vətəndaş da daxil olmaqla 4851 nəfər olmuşdur.
2012-2013-cü tədris ilində universitetin bakalavr
səviyyəsində 56, magistratura səviyyəsində isə 41
ixtisas üzrə yüksək ixtisaslı mütəxəssislər hazırlanıb.
2013-cü ildə universitet məzunlarının sayı 1099 nəfər
olmuşdur ki, onlardan 977 nəfəri bakalavr, 122 nəfəri
isə magistr səviyyəsinə aiddir. 2013-cü tədris ilində
Naxçıvan Dövlət Universitetinin bakalavriat səviyyəsində
tədrisin kredit sistemi ilə təşkili qaydalarındakı
islahatlar davam etdirilmişdir. Naxçıvan Dövlət
Universitetində "Tədrisin kredit sisteminə uyğun
qurulması qaydaları"na uyğun olaraq 2012-1013-cü tədris
ilindən Boloniya prosesinin bütün tələbləri həyata
keçirilmişdir.
Tələbə
və müəllimlərin mobilliyinin təmin olunması
istiqamətində tədbirlər həyata keçirilmiş, Koreyanın
Kim-Çonq, Türkiyənin Ərzurum Atatürk Universiteti,
Ərdahan Universiteti, Gürcüstanın Batumi Dövlət
Universiteti, Litvanın Klaypeda Universiteti,Sosial
Elmlər Kolleci, İspaniyanın Santyaqo De Kompostella
universitetləri ilə razılaşdırılmış müqavilələr əsasında
tələbə mobilliyinə start verilmişdir. Naxçıvan Dövlət
Universiteti tələbə və müəllim mobilliyini
gerçəkləşdirən Mövlana Mübadilə Proqramına qatılan
Azərbaycanın ilk ali təhsil ocağı olmuşdur. Semestr
imtahanlarının elektron vasitələrlə test üsulu ilə
keçirilməsi, elektron test banklarının hazırlanması,
proqramlaşdırma və qiymətləndirmə meyarlarını əhatə edən
"Elektron təhsil" layihəsinin həyata keçirilməsi ilə
bağlı tədbirlər görülmüş, 2012-2013-cü tədris ilinin
ikinci semestrində 269 semestr imtahanı, 46 dövlət
imtahanı elektron qaydada keçirilmişdir. Boloniya
prosesinin tələblərinə uyğun olaraq 2012-2013-cü tədris
ilinin ikinci semestrində imtahanlardan kəsilən
tələbələrin kredit borclarını ödəməsi məqsədilə yay
məktəbi təşkil edilmiş, tədrisdə İKT-nin tətbiqi
istiqamətində mühüm işlər görülmüşdür. Bütün bunların
nəticəsində Naxçıvan Dövlət Universitetində 2012-2013-cü
ilin qış və yay imtahan sessiyasının müvəffəqiyyət və
keyfiyyət göstəriciləri ölkənin orta təhsil
göstəricilərindən yüksək olmuşdur.
Yığıncaqda universitetin iqtisad fakültəsinin dekan
müavini, iqtisad üzrə fəlsəfə doktoru, dosent Müslüm
Cabbarzadə, memarlıq və mühəndislik fakültəsinin dekanı,
texnika üzrə fəlsəfə doktoru, dosent Cavanşir Zeynalov,
fəlsəfə və sosiologiya kafedrasının müdiri, fəlsəfə üzrə
fəlsəfə doktoru, dosent Novruzəli Rəhimov, Universitet
Tələbə Gənclər Təşkilatının sədri Arzu Abdullayev çıxış
etmişlər. Çıxışlarda bildirilmişdir ki, ümummilli lider
Heydər Əliyevin əsasını qoyduğu sosial-iqtisadi inkişaf
strategiyası bu gün Azərbaycan Respublikasının
Prezidenti İlham Əliyev tərəfindən uğurla davam və
inkişaf etdirilir.
Yığıncağa universitetin rektoru, biologiya elmləri
doktoru, professor Saleh Məhərrəmov yekun vurmuşdur.
Mehriban SULTAN |