Dünya Bankının maliyyə dəstəyi ilə "Unikal-1" MMC
2013-2014-cü dərs ilində Mingəçevir şəhərindəki orta
məktəblərin V-VI siniflərində coğrafiya və texnologiya
fənlərindən dərs deyəcək müəllimlər üçün təlim kursları
təşkil etmişdir.
17 nömrəli orta məktəbdə keçirilən kurslarda coğrafiya
və texnologiya fənləri üzrə iki qrup fəaliyyət
göstərmişdir. Coğrafiya fənni üzrə təlimləri Təranə
İsmayılova və Xuraman Vəliyeva, texnologiya fənni üzrə
məşğələləri isə Nəzakət Əhmədbəyli və Xuraman Səlimova
aparmışlar.
Təlimlərdə müəllimlərə fənlər üzrə yeni təhsil
proqramının (kurikulumun) strukturu və xüsusiyyətləri,
məzmun tərkibi, fəaliyyət xətti, əsas və
alt-standartların funksiyaları və praktik əhəmiyyəti,
məzmun standartı, onun bilik və fəaliyyət komponentləri,
biliyin kateqoriyaları, fəaliyyət növləri,
alt-standartlara əsasən təlim məqsədlərinin müəyyən
edilməsi, yeni təlim strategiyaları və qiymətləndirmə
mexanizmləri öyrədilmişdir.
Müəllimlərə yalnız nəzəri biliklər deyil, həm də praktik
tapşırıqlar verilmişdir. Hər gün təlimin sonunda
müəllimlər həmin gün öyrəndikləri ilə bağlı formativ
testlər həll etmiş, sonra həmin nəticələrə əsasən
qiymətləndirmə aparılmışdır.
Kursun sonunda müəllimlərə əldə etdikləri ballara əsasən
I, II dərəcəli və dinləyici sertifikatları
verilmişdir.
Hicran ƏKBƏROVA |