M.V.Lomonosov adına Moskva Dövlət Universitetinin Bakı
filialının kimya fakültəsinin dördüncü kurs tələbələri
Azərbaycan Respublikası Dövlət Neft Şirkətinin (ARDNŞ)
"Ekol Mühəndislik Xidmətləri" Qapalı Səhmdar
Cəmiyyətində (QSC) istehsalat təcrübəsinə başlamışlar.
AzərTAc xəbər verir ki, burada tələbələrə "Ekol
Mühəndislik Xidmətləri" QSC-nin yaranma tarixi,
maddi-texniki bazası, əsas fəaliyyət sahələri və həyata
keçirdiyi ekoloji layihələr haqqında geniş məlumat
verilmişdir.
İstehsalat təcrübəsi müddətində tələbələr neft emalı
zavodlarında formalaşan neft məhsulları və digər kimyəvi
maddələrlə çirklənmiş axıntı sularının təmizlənməsi
üsulları, neftşlamın emalı texnologiyaları, eləcə də
qurğuların iş prinsipi ilə yaxından tanış olacaqlar.
Eyni zamanda, tələbələr torpaqların rekultivasiyası
departamentinin yaşıllıq sahələrində ağaclara göstərdiyi
aqrotexniki xidmətlərlə, həmçinin QSC-də ətraf mühitin
mühafizəsi istiqamətində həyata keçirilən ekoloji
layihələrlə tanış ediləcəklər. |