|
Sentyabrın 16-da Azərbaycan Respublikasının Prezidenti
yanında Dövlət İdarəçilik Akademiyasında Bilik Günü
münasibətilə tədbir keçirilmişdir. Azərbaycan
Respublikasının Dövlət himni səsləndirildikdən sonra
tədbiri DİA-nın rektoru, akademik Urxan Ələkbərov açaraq
tələbə, magistrant və müdavim adını qazananları, onların
valideynlərini, bütün təhsil işçilərini Bilik Günü
münasibəti ilə təbrik edərək gənclərə uğurlar
arzulamışdır.
Rektor müstəqil dövlətimizin qurucusu ulu öndər Heydər
Əliyevin təhsilin inkişafına daim böyük önəm verdiyini,
ümummilli liderin siyasətinin hazırda Azərbaycan
Respublikasının Prezidenti cənab İlham Əliyev tərəfindən
uğurla davam etdirildiyini bildirmişdir. Natiq çıxışında
ölkə başçısının təhsillə bağlı imzaladığı bir çox
sənədlərin əhəmiyyətini diqqətə çatdırmışdır. Ölkəmizdə
gənclərə göstərilən dövlət qayğısından, Dövlət
İdarəçilik Akademiyasının qazandığı uğurlardan bəhs edən
Urxan Ələkbərov qeyd etmişdir ki, rəhbərlik etdiyi ali
təhsil ocağı gənc nəslin elm və təhsilində, təlim-tərbiyəsində,
idarəçi kadrların hazırlanmasında öz nüfuzu və
istiqaməti olan müəssisələrdəndir. Rektor tələbələrə
müraciət edərək demişdir: "Bu gün respublikamızın siyasi
və iqtisadi sahədə əldə etdiyi uğurları, beynəlxalq
nüfuzunu qoruyub saxlamaq, onu daha kreativ və innovativ
metodlarla inkişaf etdirmək sizin əlinizdədir. Çalışın
ki, yaradılan şəraitdən səmərəli istifadə edib yüksək
bilik və bacarığa nail olasınız, sizə olan etimadı
doğruldasınız".
Son illərdə respublikamızın inkişaf tempinin, uğurlu
statistik göstəricilərinin hər birimizdə qürur hissi
oyatdığını deyən rektor ölkə başçısının məqsədyönlü
siyasətinin insan potensialının inkişafına yönəldiyini
qeyd etmişdir.
Çıxışda daha sonra bildirilmişdir ki, müasir dövrdə
dövlətin gücü və qüdrəti təkcə onun təbii sərvətləri ilə
deyil, o cümlədən elmi-intellektual, insan potensialı
ilə müəyyən edilir.
Dövlət İdarəçilik Akademiyasının məqsədinin hazırladığı
kadrların müasir tələblərə cavab verməyi bacarmaları,
yeni kreativ nəslin formalaşmasında iştirakı və ölkədə
həyata keçirilən uğurlu işlərə öz töhfəsini vermək
olduğunu söyləyən rektor bu yolda hər kəsə
müvəffəqiyyətlər arzulamışdır.
Tədbirdə Dövlət İdarəçilik Akademiyasının siyasi
idarəetmə fakültəsinin dekanı, dosent Zaur Bağırov,
inzibati idarəetmə fakültəsinin dekanı, dosent Eldar
Azadov, builki ali məktəblərə qəbul imtahanlarında 700
bal toplamış, Prezident təqaüdünə layiq görülmüş Nərmin
Məmmədli, Nərminə Murğuzova, 677 bal toplamış İlahə
Süleymanlı, valideyn Ədalət Əfəndiyev və digərləri çıxış
edərək ölkədə təhsilə göstərilən dövlət qayğısından
danışmış, öz sevinclərini, ən xoş arzularını və
təbriklərini bölüşmüşlər.
Samirə KƏRİMOVA |
