Ölkəmizin
tanınmış ümumtəhsil müəssisələrindən olan Təhsil
Nazirliyinin tabeliyindəki İ.Hacıyev adına "Tərəqqi"
texniki-humanitar təmayüllü liseyin birinci siniflərinə
yeni dərs ilində 100 uşaq qəbul olunmuşdur.
Sentyabrın 16-da bu təhsil ocağında keçirilən ənənəvi
Bilik Günü yenicə başladıqları məktəb həyatında onların
ilk bayramı olmuşdur.
Bayram şənliyi Azərbaycanın Dövlət himninin ifası və
Dövlət bayrağının təntənəli şəkildə meydana gətirilməsi
və qaldırılması ilə başlanmışdır. Toplantını açıq elan
edən aparıcı öncə yeni dərs ilinin başlanması və Bilik
Günü münasibəti ilə iştirakçıları, xüsusən də bu günü
hamıdan daha çox intizarla gözləyən birinciləri təbrik
etmiş, onların valideynlərinə gözaydınlığı vermişdir. V
"A" sinfinin şagirdləri həzin musiqi sədaları altında
ifa etdikləri valsla elə ilk dəqiqələrdən şənliyi
canlandırmışlar.
Bayram tədbirinin ssenarisi Təhsil Nazirliyinin
ümumtəhsil məktəblərinin V-XI siniflərində ilk
dərslərin "Mənim vətənim - doğma yurdum" mövzusuna həsr
olunması barədəki əmrinə uyğun olaraq vətənpərvərlik
ruhunda hazırlanmışdı. Yeri gəlmişkən qeyd edək ki,
liseydə nazirliyin həmin əmrinin icrasını təmin etmək
məqsədi ilə xüsusi əmr də imzalanmış, tədbirlər
müəyyənləşdirilmişdir. Bayram tədbirində elə dərs ilinin
ilk günündən şagirdlərin vətənpərvərlik hisslərini
gücləndirmək üçün ölkəmizin son illər əldə etdiyi
uğurlardan, müstəqilliyimizin memarı olan ümummilli
lider Heydər Əliyevin vətən və xalq qarşısındakı
müstəsna xidmətlərindən, ləyaqətli ömür yaşamış bu dahi
şəxsiyyət və görkəmli dövlət xadiminin iradəsi, yorulmaz
səyləri nəticəsində Azərbaycanın demokratik inkişaf
yoluna qədəm qoymasından və hazırda ulu öndərimizin
layiqli davamçısı, ölkə Prezidenti İlham Əliyevin
rəhbərliyi altında bu yolla inamla irəliləməsindən söz
açılmışdır. İqtisadiyyatımızın yüksək inkişaf tempini,
ölkəmizin beynəlxalq aləmdə nüfuzunun artmasını, təhsil,
idman sahələrindəki uğurlarımızı əks etdirən konkret
fakt və rəqəmlər diqqətə çatdırılmış, şagirdlər
tərəfindən vətənpərvərlik mövzusunda şeir və mahnılar
ifa olunmuşdur.
Aparıcı istedadlı şagirdlərin təqdim etdikləri ayrı-ayrı
şeir, mahnı, rəqs nömrələri ilə müşayiət olunan
çıxışında habelə liseyin ötən dərs ilində əldə etdiyi
uğurlar barədə də toplantı iştirakçılarına məlumat
vermişdir. Qeyd olunmuşdur ki, 2012-2013-cü dərs ilində
liseydən məzun olmuş 62 gəncin 54-ü ali məktəblərə qəbul
üçün sənəd vermiş, onlardan 49-u tələbə adını
qazanmışdır. Qəbul faizi 90 olmuşdur.
Məzunlardan Nigar Fərhadlı qəbul imtahanında 685 bal
toplayaraq Azərbaycan Tibb Universitetinə daxil olmuş və
Prezident təqaüdünə layiq görülmüşdür. Daha iki nəfər
600-dən yüksək, 4 nəfər isə 500-dən çox bal
toplamışdır. Məktəbin 7 məzunu xarici ölkələrin, o
cümlədən 1 nəfər Ukraynanın, 3 nəfər Türkiyənin, 1 nəfər
Almaniyanın, 1 nəfər Böyük Britaniyanın və 1 nəfər də
Rusiyanın nüfuzlu ali məktəblərinə qəbul olunmuşdur.
Bayram tədbirində çıxış edən liseyin direktoru,
respublikanın əməkdar müəllimi Məhbubə Məmmədova yeni
dərs ilinin başlanması və Bilik Günü münasibəti ilə
şagirdləri və pedaqoji kollektiv üzvlərini təbrik etmiş,
yeni dərs ilində şagirdlərə daha səylə oxumağı,
vətənpərvər ruhda böyüməyi, müəllimlərə isə daha
məsuliyyətlə çalışmağı, ölkəmizin gələcək inkişafı,
xalqımızın rifah halının yüksəldilməsi naminə yorulmaz
fəaliyyətində Azərbaycan Prezidentini hər zaman
dəstəkləyən vətənpərvər gənc nəsil yetişdirməyi tövsiyə
etmişdir.
Ölkəmizdə gənclərə, təhsilə və təhsil işçilərinə böyük
diqqət və qayğı göstərildiyini qeyd edən M.Məmmədova bu
günlərdə ölkə Prezidenti İlham Əliyevin sərəncamları ilə
təhsil işçilərinin əməkhaqqının və tələbələrin
təqaüdlərinin artırılmasını, eləcə də Prezidentin gənc
nəslin sosial, fiziki, intellektual və mənəvi
inkişafının təmin edilməsinə, vətənpərvərlik ruhunda
tərbiyə olunmasına, ictimai fəallığının artırılmasına,
innovativ ideyaların və yaradıcı təşəbbüslərin
reallaşdırılmasına yönəlmiş layihələri uğurla həyata
keçirən Azərbaycan Respublikasının Prezidenti yanında
Gənclər Fondunun fəaliyyətinin dəstəklənməsi ilə bağlı
bu ilin martında imzaladığı sərəncamı göstərilən diqqət
və qayğının bariz təzahürü kimi dəyərləndirmişdir.
Direktor Heydər Əliyev Fondunun, onun prezidenti,
Azərbaycanın birinci xanımı Mehriban Əliyevanın
təhsilimizin inkişafı naminə gördüyü işləri, o cümlədən
Fondun "Yeniləşən Azərbaycana yeni məktəb" layihəsi
çərçivəsində həyata keçirdiyi tədbirləri xüsusi qeyd
etmişdir. Göstərdikləri bu yüksək diqqət və qayğıya görə
Azərbaycan Prezidenti İlham Əliyevə, Heydər Əliyev
Fondunun prezidenti, Milli Məclisin deputatı Mehriban
Əliyevaya liseyin kollektivi adından minnətdarlıq
bildirilmişdir.
Direktor təbrik çıxışında son dövrlərdə ölkəmizin
təhsil sistemində baş verən yeniliklərə də toxunmuş,
yüksək intellektli, işgüzar, qətiyyətli gənclərin Təhsil
Nazirliyində rəhbər vəzifələrə irəli çəkilməsinə
sevindiklərini bildirmişdir. Məktəb rəhbərləri
qarşısında qoyulan yeni tələblərin onların, eləcə də
pedaqoji kollektiv üzvlərinin məsuliyyətini artırdığını
söyləyən direktor son günlər atılan bir sıra humanist
addımlara, xüsusən də orta məktəb məzunlarına
attestatların verilməsi, 6 yaşı tamam olmamış xüsusi
istedadlı uşaqların məktəblərə qəbulu üzrə yeni
qaydaların tətbiqinə görə Təhsil Nazirliyinə
liseylərinin müəllim, şagird kollektivləri və
valideynləri adından minnətdarlığını bildirmişdir.
Çıxışının sonunda M.Məmmədova dərsə davamiyyət,
nizam-intizam, məktəbli forması ilə bağlı valideynlərə
və şagirdlərə, xüsusən də XI sinif şagirdlərinə tövsiyə
və tapşırıqlarını vermişdir.
Bayram mərasimində liseyin pedaqoji kollektiv üzvlərinin
qarşıdan gələn prezident seçkilərində ölkəmizi böyük
inamla yeni qələbələrə aparan Prezident İlham Əliyevi
dəstəkləyəcəkləri fikri ifadə olunmuşdur. Sonra ilk zəng
çalınmış və şagirdlər siniflərdə öz yerlərini tutmuşlar.
"Mənim Vətənim - doğma yurdum" mövzusunda ilk dərslər
liseydə uğurla keçmişdir. Tədbirdə valideynlər, liseyin
keçmiş məzunları iştirak etmişlər.
Yusif ƏLİYEV |