|
Suraxanı rayonunun Hövsan qəsəbəsindəki 76 nömrəli tam
orta məktəb əsaslı təmirdən sonra istifadəyə
verilmişdir.
Bilik Günündə keçirilən təntənəli açılış mərasimində
rayon icra hakimiyyətinin başçısı, Milli Məclisin
deputatları və ictimaiyyət nümayəndələri iştirak
etmişlər.
Məktəbin direktoru Tehranə Tağıyeva tədbiri açaraq
qonaqları salamlamışdır. Kollektivin yeni tədris ilinə
tam hazır olduğunu bildirən məktəbin direktoru
2013-2014-cü tədris ilində şagirdlərin əsaslı təmir
edilmiş, müasir avadanlıqlarla təchiz olunmuş məktəbdə
təhsil alacaqlarını sevindirici hal kimi
dəyərləndirmişdir.
Suraxanı Rayon İcra Hakimiyyətinin başçısı İlqar Abbasov
son illərdə Azərbaycanın təhsil sistemində həyata
keçirilən çox əhəmiyyətli islahatlardan söz açmış, bu
illər ərzində yaradılmış möhkəm bazanın təhsilin
inkişafına xidmət etdiyini söyləmişdir. O, Azərbaycan
xalqının ümummilli lideri Heydər Əliyev tərəfindən əsası
qoyulmuş təhsil strategiyasının bu gün Prezident İlham
Əliyev tərəfindən uğurla davam etdirildiyini xüsusi
vurğulamışdır.
Qeyd olunmuşdur ki, təhsil müəssisələrində çalışan
işçilərin əməkhaqlarının və tələbələrin təqaüdlərinin
artırılması ilə bağlı Azərbaycan Respublikası
Prezidentinin sərəncamları, Bakıətrafı qəsəbələrin
sosial-iqtisadi inkişafı ilə bağlı Dövlət Proqramı,
Heydər Əliyev Fondunun prezidenti, YUNESKO-nun və
İSESKO-nun xoşməramlı səfiri, Milli Məclisin deputatı
Mehriban xanım Əliyevanın təşəbbüsü ilə həyata keçirilən
"Yeniləşən Azərbaycana yeni məktəb" və digər irimiqyaslı
layihələr qarşıya qoyulan vəzifələrin icrasına, tədris
müəssisələrinin maddi-texniki bazasının möhkəmlənməsinə
yönəldilmişdir.
Bildirilmişdir ki, ötən tədris ilində Suraxanı rayonu
ərazisində yerləşən təhsil müəssisələrində fəaliyyət
göstərən pedaqoji işçilər bir sıra nailiyyətlər
qazanmışlar. 2012-2013-cü tədris ilində rayonun 34 orta
ümumtəhsil məktəbini və xarici dillər təmayüllü
gimnaziyanı 1899 şagird bitirmiş, onlardan 992 nəfəri
tələbə adını qazanmışdır. 49 nəfər 600-dən yuxarı bal
toplamış, beş məzun isə Prezident təqaüdçüsü adına
layiq görülmüşdür.
Tədbirdə çıxış edənlər göstərilən diqqət və qayğıya görə
dövlət başçısına öz minnətdarlıqlarını bildirmişlər.
Sonra ilk zəng çalınmışdır. Rayonun bütün məktəblərinin
V-XI siniflərində vətənpərvərlik mövzusunda "Mənim
Vətənim - doğma yurdum" adlı ilk dərs keçilmişdir.
Şagirdlərə son illərdə ölkəmizdə, şəhərimizdə, eləcə də
Suraxanı rayonunda aparılan genişmiqyaslı
abadlıq-quruculuq işləri, o cümlədən dövlət tərəfindən
Azərbaycan təhsilinə göstərilən diqqət və qayğı ilə
bağlı ətraflı məlumat verilmiş, bu uğurlardan bəhs edən
xüsusi kitab hədiyyə edilmişdir.
Hicran ƏKBƏROVA |
