|
Azərbaycanın İordaniyadakı səfiri Sabir Ağabəyovun
təşəbbüsü ilə Əmmandakı səfirliyimizdə müxtəlif illərdə,
o cümlədən sovet dövründə Azərbaycanın ali məktəblərində
təhsil almış iordaniyalılarla birinci görüş olmuşdur.
Görüşdə ictimai xadimlər, dövlət qurumlarının
nümayəndələri, professorlar və həkimlər, habelə
səfirliyin əməkdaşları iştirak etmişlər.
Azərbaycanın İordaniyadakı səfiri S.Ağabəyov təbrik
nitqi ilə çıxış edərək istər müstəqillik illərində,
istərsə də Sovet İttifaqı dövründə Azərbaycanın ali
məktəblərində təhsil almış bütün iordaniyalı məzunları
bir yerə toplamaq məqsədi daşıyan bu təşəbbüsü
dəstəklədiklərinə görə görüş iştirakçılarına
minnətdarlığını bildirmişdir. Onun sözlərinə görə, bu
səviyyədə daha sıx ünsiyyət və əlaqələr ölkələrimiz
arasında dostluq münasibətlərinin möhkəmlənməsinə və
inkişafına kömək edəcək, bir-birimizi daha yaxından
tanımağa və xalqlar arasında dialoqu davam etdirməyə
imkan verəcəkdir.
S.Ağabəyov demişdir ki, onun informasiyasına görə,
təxminən 700 iordaniyalı Azərbaycanın ali məktəblərini
bitirmiş və bu rəqəm təkcə təhsildə deyil, həm də
dövlətlərarası səviyyədə ölkələrimiz arasında ənənəvi
sıx əlaqələrin göstəricisidir. Ölkələrimiz arasında
qardaşlıq münasibətlərinin möhkəmlənməsinin təcəssümü
olan İordaniya-Azərbaycan Dostluq Cəmiyyətinin
fəaliyyətindən də söz açan diplomat ümidvar olduğunu
bildirmişdir ki, bu görüş Azərbaycan Ali Məktəblərinin
İordaniyalı Məzunları Cəmiyyətinin yaradılmasının
başlanğıcı olacaqdır.
Filadelfiya Universitetinin professoru, doktor Əmir Əbu
Əli Azərbaycan ali məktəblərinin iordaniyalı məzunları
adından çıxış edərək iki xalq arasında əlaqələrin
inkişafı ideyasına xidmət edən belə təşəbbüsə görə
səfirə dərin minnətdarlığını bildirmişdir. O, xüsusi
vurğulamışdır ki, iordaniyalı məzunların hamısı
Azərbaycana bağlıdır və ölkəmizi hədsiz sevirlər, çünki
burada aldıqları təhsili öz ölkələrinin rifahına
yönəldirlər.
Ə.Ə.Əli demişdir ki, bu gün Azərbaycan bütün dünyada
böyük nüfuzu olan, dinamik inkişaf edən dövlətdir. Natiq
xüsusi vurğulamışdır ki, görüş iştirakçıları bu
təşəbbüsü həyata keçirməyə, tədbirlərdə yaxından iştirak
etməyə, birgə planlar qurmağa və bu istiqamətdə səmərəli
işləməyə hazırdırlar. Ə.Ə.Əli sonda demişdir: "Biz
mümkün olan hər şeyi etməyə, məzunların bu görüşdə
iştirak etməyən hissəsini cəlb etməyə çalışacaq, gələcək
cəmiyyətimizin təsis qurultayına hazırlaşacağıq".
Ölkəmizə səmimi məhəbbət hisslərini ifadə edən natiqlər
iki ölkənin rifahı naminə Azərbaycan səfirliyi ilə fəal
işləməyə hazır olduqlarını bildirmişlər.
AzərTAc |
