|
Artıq 2013-2014-cü dərs ili başlayıb. Bu tədris ilini
bir sıra yeniliklərlə qarşılayan ölkə ictimaiyyəti son 5
ayda təhsil sahəsində gedən dəyişiklikləri maraqla
izləməkdədir. Hazırda təhsilin müxtəlif sahələrində bir
yeniləşmə, müasirləşmə və canlanma hiss olunmaqdadır. Bu
il orta məktəbləri bitirən şagirdlərin hamısına
attestatın verilməsi, Təhsil Nazirliyi tərəfindən xüsusi
istedada malik uşaqların vaxtından əvvəl I sinfə qəbulu
ilə bağlı yeni Qaydaların tətbiq olunması, 2013-2014-cü
tədris ilində xarici ölkələrin ali təhsil
müəssisələrində "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində təhsil almağa gedən tələbələrin
seçimi ilə bağlı yeniliklər, dövlət başçısının tapşırığı
ilə təhsil naziri Mikayıl Cabbarovun mütəmadi olaraq
bölgələrdə vətəndaşları qəbul etməsi, onların
müraciətlərini dinləməsi, əksər məsələlərin yerindəcə
həllini tapması, bütövlükdə təhsil sahəsində bir sıra
layihələrin reallaşdırılması hər bir kəs tərəfindən
rəğbətlə qarşılanmaqdadır. Təhsil naziri təhsil işçiləri
ilə keçirdiyi müxtəlif görüşlərdə, tədbirlərdə,
müsahibələrində hər zaman məktəb-valideyn
münasibətlərinə xüsusi toxunur, valideynlərin məktəb
həyatında, təhsil ocaqlarının idarəolunması prosesində
iştirakının artırılmasını zəruri hesab edir. Bəs
görəsən övladları orta məktəblərdə təhsil alan
valideynlər bu yeniliklər, həyata keçirilən tədbirlərlə
bağlı nə düşünürlər? Övladlarının təhsil aldıqları orta
məktəblərdə həmin dəyişiklikləri hiss edirlərmi?
Valideynlərin məktəblə əlaqələri hansı səviyyədədir?
Suallarımıza cavab almaq üçün övladları Bakıdakı 7 və 55
nömrəli tam orta məktəblərdə təhsil alan valideynlərin
bir neçəsi ilə görüşüb söhbətləşdik.
 Tamilla
Qasımova (Bakıdakı Məmməd Rahim adına 7 nömrəli tam orta
məktəbin VII sinfinin valideyn komitəsinin sədri):
-
Mən, ilk növbədə, ölkə başçısı cənab İlham Əliyevə bizim
övladlarımızın yüksək təhsil alması üçün yaratdığı bu
gözəl şəraitə görə minnətdarlığımı bildirmək istəyirəm.
Bu il əsaslı təmir olunaraq yüksək səviyyədə
maddi-texniki baza ilə təchiz edilən təhsil ocağı şagird
və müəllimlərlə yanaşı, mən deyərdim ki, valideynlər
üçün də əvəzsiz bir hədiyyədir.
Özüm də təhsil işçisiyəm. Uzun müddət Azərbaycan Dövlət
Neft Akademiyasında kafedra müdiri olmuşam. Son aylarda
təhsil sahəsində həyata keçirilən işlərdən, tətbiq
olunan yeniliklərdən xəbərim var. Mütəmadi olaraq
Azərbaycan Respublikası Təhsil Nazirliyinin saytına
daxil olaraq, demək olar ki, bütün məlumatları oxuyuram.
Bu il orta məktəbləri bitirən şagirdlərin hamısına
attestat verilməsi ilə bağlı qəbul olunan qərar bizim
ürəyimizcə oldu. İlk dəfə olaraq orta məktəblərin bütün
11-ci sinif şagirdlərinə buraxılış imtahanının
qiymətindən asılı olmayaraq yekun dövlət
attestasiyasının nəticələrinə görə attestatın verilməsi,
düşünürəm ki, məzunlara öz arzularını gerçəkləşdirməyə
imkan yaratdı. Onu da bilirəm ki, bu il buraxılış
imtahanlarında "2" qiyməti almış 128 məzun qəbul
imtahanlarında uğurlu nəticələr göstərərək
respublikamızın ali məktəblərinə qəbul olunub. Bunun özu
müsbət haldır.
Təhsil nazirinin bölgələrdə vətəndaşları qəbul etməsi,
onları dinləməsi, əlbəttə, təqdirəlayiqdir. Nazirin sadə
vətəndaşlarla ünsiyyətini, onları narahat edən
məsələlərin yerindəcə həlli ilə bağlı müvafiq
göstərişlərini verməsini təbii ki, yüksək
dəyərləndirirəm.
Nəvəm bu məktəbin VII sinfində təhsil alır. Özüm də
həmin sinfin valideyn komitəsinin sədriyəm. Buradakı
yüksək təlim mühiti, müəllimlərin şagirdlərə olan sağlam
münasibəti məni olduqca qane edir. Fikrimcə, şagirdin
yaxşı oxuması üçün təkcə müəllimin əməyi kifayət deyil.
Bu işdə müəllimlərin ən yaxşı köməkçisi məhz valideynlər
olmalıdırlar. Ona görə də valideyn-müəllim
münasibətlərini fəallaşdırmaq lazımdır. Bu proses
qarşılıqlı əməkdaşlıq şəraitində olmalıdır. Yəni buna
həm müəllim, həm də valideyn can atmalıdır. Düşünürəm
ki, müəllimlə valideynin fikirləri üst-üstə düşərsə, bu,
şagirdlərin istər təlim, istərsə də tərbiyəsində özünün
müsbət nəticələrini verə bilər.
Bilirsiniz ki, dünyanın əksər ölkələrində məktəblərin
saxlanılmasında, təhsil ocağının müəyyən problemlərinin
həllində valideynlər yaxından iştirak edirlər. Məsələn,
məktəbin mühafizəsinin təşkilini valideynlər öz üzərinə
götürür. Rusiyanın özündə bu məsələ valideynlər
tərəfindən həll olunub. Biz də istərdik ki, məktəbin
mühafizəsi işini öz üzərimizə götürək. Təbii ki, biz bu
məsələdə könüllülük prinsipini əsas tuturuq. |
|
 Könül
Əzimova (7 nömrəli tam orta məktəb):
- Övladlarımın ikisi də bu təhsil ocağında oxuyur. Oğlum
VIII, qızım isə V sinifdə. Əslində bu günün valideyni
daha hazırlıqlı, təhsilimizdəki yeniliklərdən xəbərdar
olmalı, ən başlıcası isə üzərinə düşən məsuliyyəti yaxşı
dərk etməlidir. Bir valideyn kimi övladlarımın təhsili
ilə yaxından maraqlanmaqla yanaşı, məktəbin həyatında
baş verən proseslərdə də fəal iştirak etməyə çalışıram.
Mən xüsusi istedada malik uşaqların vaxtından əvvəl I
sinfə qəbulu ilə bağlı Təhsil Nazirliyi tərəfindən
təsdiq olunmuş yeni Qaydalar haqqında fikrimi bildirmək
istəyirəm. Ötən illərdən fərqli olaraq bu il xüsusi
istedada malik uşaqların vaxtından əvvəl I sinfə
qəbulunun rayon (şəhər) təhsil şöbələrinə həvalə
olunması, düşünürəm ki, düzgün bir qərardır. Xüsusilə
müsahibədə valideynlərin iştirakını, onların arzusu ilə
müsahibə zamanı videoçəkilişin aparılmasını müsbət
qiymətləndirirəm.
Cənab nazirin "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində xarici ölkələrin nüfuzlu ali
məktəblərində təhsil almağa gedən tələbələrlə görüşü,
müsahibələrinin birində həmin gənclərin qayğılarının,
ehtiyaclarının diqqət mərkəzində olacağını xüsusi
vurğulaması məni də bir valideyn kimi öz övladlarımın
gələcəkdə xaricdə təhsil almasına ruhlandırır.
Övladlarımın məktəbi "əla" qiymətlərlə başa vuraraq
xarici ölkələrin nüfuzlu ali məktəblərində təhsil
almaları ən böyük arzumdur.
|
|
 Mehriban
Quliyeva
(7
nömrəli
tam orta məktəb):
- 3 uşaq anasıyam. İki qızım Bakı Dövlət Universitetini
bitirib. Hazırda oğlum XI sinifdə oxuyur. Oğlumun istər
təhsilində, istərsə də tərbiyəsində özümü məsuliyyətli
valideynlərdən biri hesab edirəm. Onu da yaxşı bilirəm
ki, təhsilin keyfiyyətinə təsir edən amillər sırasında
ailə birinci yeri tutur. Düşünürəm ki, məhz buna görə də
məktəbin fəaliyyətinin təşkilində, idarə olunmasında,
təlim-tərbiyə prosesində biz valideynlər fəallıq
göstərməliyik. Bir valideyn kimi öz təcrübəmə
əsaslanaraq əminliklə söyləyə bilərəm ki, hər bir
valideyn öz övladının gələcəyinə xüsusi diqqət
göstərərək məktəblə, müəllimlərlə əlaqələrini daha sıx
və daha möhkəm qurarsa, bu onun övladının yüksək savad
almasında, ölkəmiz üçün layiqli bir vətəndaş kimi
formalaşmasında mühüm rol oynayar. Şəxsən mənim özümün
övladımın təhsil aldığı məktəblə, onun müəllimləri ilə
sıx əlaqələrim buna bir əyani nümunədir.
Təhsil naziri Mikayıl Cabbarov mətbuata verdiyi ilk
geniş müsahibəsində Azərbaycanın təhsil sisteminin və
təhsil infrastrukturunun inkişaf səviyyəsinin dünyanın
aparıcı təhsil sistemləri səviyyəsinə çatdırılmasının
əsas məqsədlərdən biri olduğunu qeyd edib. Onu da
vurğulayıb ki, təhsil sistemi milli dəyərlərə və peşəkar
kompetensiyalara malik Azərbaycan vətəndaşı
yetişdirməlidir.
Biz də bir valideyn olaraq öz övladlarımızın məhz belə
bir vətəndaş kimi formalaşmasını arzu edirik. |
|
 Mehriban
Xanbəyli (55 nömrəli tam orta məktəb):
- Son illər respublikamızda təhsil sahəsində bir çox
islahatlar aparılır. Bir vətəndaş kimi bu islahatların
keçirilməsini yüksək qiymətləndirirəm. Yeni məktəb
binaları tikilir və bu biz valideynləri çox sevindirir.
Dövlət tərəfindən təhsilə xüsusi diqqət və qayğı var.
Təhsil naziri Mikayıl Cabbarov nazir təyin edildikdən
sonra təhsilimizdə yeni bir canlanma hiss olunur. Mən
onun vətəndaşları müxtəlif bölgələrdə qəbul edərək
problemlərini dinləməsini və qanun çərçivəsində həmin
problemlərin həllinə çalışmasını təqdirəlayiq hal hesab
edirəm. Hazırda təhsilimizdə olan bir sıra neqativ
halların aradan qaldırılmasına, şagirdlərin intellektual
səviyyəsinin artmasına zəmin yaradılır. Məsələn, bu
yaxınlarda mətbuatdan təhsil nazirinin məktəblərdə
şagirdlərin qidalanması barədə verdiyi tapşırıqları
oxudum. Bu, çox ciddi məsələdir. Bir çox məktəblərdə
mənşəyi məlum olmayan yeyinti məhsulları satılırdı ki,
bu da şagirdlərin sağlamlığına ciddi ziyan vururdu.
Şübhəsiz ki, təhsilimizdə bir sıra problemlər də
mövcuddur. Bunlardan ən əsası isə şagirdlərin dərslərlə
çox yüklənməsidir. Ümid edirik ki, yeni nazirimiz bu
kimi problemlərə də nəzər yetirəcək.
|
|
 Rəna
Qurbanova (55 nömrəli tam orta məktəb):
- Səmimi olaraq demək istəyirəm ki, hazırda təhsilimiz
yeni bir dövrə qədəm qoyur. Bu da biz valideynləri çox
sevindirir. Hər bir valideyn öz övladının gələcəyini
düşünərək onun yaxşı təhsil alması üçün çalışmalıdır.
Biz valideynlər məktəblə daim sıx əlaqədə olmalı, mövcud
problemlərin həlli istiqamətində öz üzərimizə düşən
vəzifələri yerinə yetirməliyik. Hazırda Təhsil Nazirliyi
fəaliyyətini daha da gücləndirərək ciddi addımlar atır
ki, bu da valideynlər tərəfindən müsbət qarşılanır.
Problemlərin həllinə çalışan təhsil naziri Mikayıl
Cabbarov şagirdlərin cəmiyyətimizə yararlı bir vətəndaş
kimi yetişdirilməsi yolunda məktəblərə ciddi nəzarət
edir. Onun son vaxtlar imzaladığı əmrlərdən biri də
məktəblərdə "Şahmat" fənninin tədrisinə xüsusi diqqət
verilməsidir. "Şahmat" oyunu şagirdlərin əqli
inkişafında və intellektual səviyyəsinin yüksəlməsində
əhəmiyyətli rol oynayır. Məni narahat edən məsələlərdən
biri isə şagirdlərin həm fiziki, həm də mənəvi cəhətdən
verilən tapşırıqları yerinə yetirməkdə çətinlik
çəkmələridir. Düşünürəm ki, şagirdlərin üzərindən bu
yükü götürmək üçün verilən tapşırıqlar
azalmalıdır.
|
