|
Ötən həftə Quba rayonunun Hacıqayıb kəndində dövlət
vəsaiti hesabına inşa olunmuş 360 şagird yerlik yeni
məktəb binası istifadəyə verilib. Bu münasibətlə təşkil
olunan mərasimdə rayon icra hakimiyyətinin və təhsil
şöbəsinin nümayəndələri, məktəbin müəllim və şagird
kontingenti, eləcə də kənd sakinləri iştirak ediblər.
Mərasimdə çıxış edənlər ölkəmizdə elm və təhsilin
inkişafına göstərilən yüksək dövlət qayğısı nəticəsində
təhsilin davamlı inkişafı üçün möhkəm zəmin yarandığını
vurğulayıblar.
Bildirilib ki, Qubada da müasir tipli yeni məktəb
binalarının inşası geniş vüsət alıb, son 10 ildə rayonda
tikilmiş və ya əsaslı təmir olunmuş məktəblərin sayı
80-i ötüb.
Çıxış edənlər təhsilin inkişafına göstərilən diqqət və
qayğıya görə Azərbaycan Respublikasının Prezidenti
İlham Əliyevə, Heydər Əliyev Fondunun prezidenti,
YUNESKO-nun və İSESKO-nun xoşməramlı səfiri, Milli
Məclisin deputatı Mehriban xanım Əliyevaya dərin
minnətdarlıqlarını bildiriblər.
Tədbirdə müəllim və şagirdlərin ürək sözləri, kənd
ağsaqqallarının xeyir-duası səslənib, yeni təhsil
müəssisəsinin açılışını bildirən rəmzi lent kəsildikdən
sonra iştirakçılar məktəb binasında tədris üçün
yaradılmış şəraitlə tanış olublar.
İnşasına 2012-ci ilin oktyabrında başlanılmış
ikimərtəbəli təhsil ocağı müasir standartlara cavab
verən bütün avadanlıqlarla təchiz edilib, məktəbin
qızdırılması üçün istilik sistemi qurulub. Təhsil ocağı
sinif otaqları, idman zalı, kitabxana və laboratoriya
ilə təmin olunub, kompüter otağı isə birbaşa İnternet
şəbəkəsinə qoşulub.
Hicran ƏKBƏROVA |
