|
Təbriklərə bayram arzuları da qatılır
 Altmış
yaşı, otuz səkkiz il iş stajı olan Yunis müəllimi yəqin
ki, bu ildəki qədər təbrik edən olmayıb. Yunis müəllim
bu il "Ən yaxşı müəllim" müsabiqəsində qalib gəlib və
qaliblərin mükafatlandırılması haqqında Prezident
sərəncamı mətbuatda dərc olunandan ona təbriklər
ünvanlanır. Ziyalılar, ağsaqqallar, müəllim yoldaşları
pedaqoji kollektivlər, şagirdləri, vaxtilə dərs dediyi
məzunlar ona telefon açır, görüşünə gəlir, qazandığı
yüksək ada və mükafata görə sevindiklərini bildirirlər.
Beynəlxalq Müəllimlər Gününü qeyd etdiyimiz bu günlərdə
bu təbriklərə həm də bayram arzuları əlavə olunub. Bu
təbriklərin arxasında, sözsüz, Yunis müəllimin
sevib-seçdiyi peşədə qazandığı hörmət, ad-san,
peşəkarlığı, müəllimə məxsus keyfiyyətləri özündə tam
təcəssüm etdirməsi, şagirdlərinə sevgisi, işinə
məsuliyyəti durur.
Yunis Allahqulu oğlu Quliyev 1954-cü ildə Naxçıvan
Muxtar Respublikasının Şahbuz rayonunun Kükü kəndində
ziyalı ailəsində dünyaya göz açıb. Atası A.H.Quliyev
respublikamızın tanınmış ziyalılarından biri, əməkdar
müəllim olub.
Y.Quliyev 60 illik ömrünün 38 ilini gənc nəslin
təlim-tərbiyəsinə həsr edib. O, 1975-ci ildə ADPU-nu
bitirərək öz doğma kəndində əmək fəaliyyətinə başlayıb.
Bu illər ərzində qəlbinin odunu, gözünün nurunu gənc
nəslin tərbiyəsi yolunda sərf edib. Dərs dediyi 1000-dən
çox şagirdin hamısı əsl vətəndaş kimi yetişib, onlardan
500-dən çoxu ali təhsilli mütəxəssisdir, 50 məzun kimya,
kimya-biologiya müəllimi, 10 nəfəri kimya üzrə fəlsəfə
doktoru, bir nəfəri kimya elmləri doktorudur.
Məzunlardan Prezident təqaüdçüsü olanlar da var.
Şagirdlərindən əksəriyyəti öz peşəsinin vurğunu olan,
xalqın sevgisini qazanan sənət sahibləridir. Bu illər
ərzində 100-dən çox şagirdi respublika kimya
olimpiadasının qalibi olub.
Yaradıcı pedaqoq kimi tanınan Y.Quliyev pedaqoji
fəaliyyətini elmi axtarışlarla birləşdirən
müəllimlərdəndir. İndiyədək dövri mətbuatda, radio və
televiziyada 500-dən artıq məqaləsi dərc olunub və
səsləndirilib. "Maddə kütləsinin saxlanması qanununu
M.V.Lomonosov, yoxsa N.Gəncəvi kəşf etmişdir?",
"H.Cavidin fəlsəfi görüşləri", "A.Eynşteynin həyat və
fəaliyyəti", "Bizim ana dilimiz", "N.Gəncəvinin fəlsəfi
dünyası", "Ailə dağılmasın", "Asudə vaxtdan səmərəli
istifadə edək" və s. kimi məqalələri geniş oxucu kütləsi
tərəfindən rəğbətlə qarşılanıb.
25 dəfə elmi-praktik konfranslarda məruzəsi dinlənilib
və dəfələrlə I yerə çıxıb. 2004-cü ildə Sumqayıtda
keçirilən nüfuzlu beynəlxalq konfransda məruzəsi
dinlənilən, I yerə çıxan və kitab şəklində dərc olunan
yeganə orta məktəb müəllimidir. Tələbə Qəbulu üzrə
Dövlət Komissiyasının qəbul imtahanları ilə bağlı
apardığı təhlilə görə son 12 ildə Naxçıvan Muxtar
Respublikasında bütün fənlər üzrə ən yüksək nəticə
Şahbuz rayonunun Kükü kəndində kimya fənnindən olmuşdur.
Bunda isə Y.Quliyevin xidmətləri şübhəsizdir.
Mütaliəni çox sevən bu ziyalının şəxsi kitabxanasında
2000-dən çox kitab, təqribən bir o qədər də elmi jurnal
var.
Pedaqoji fəaliyyəti Təhsil Nazirliyi tərəfindən
ümumiləşdirilərək yayılan, haqqında ayrıca bülleten
buraxılan Y.Quliyev barədə dövri mətbuatda çoxlu oçerk,
məqalə və şeirlər yazılıb.
Yunis müəllim öz müvəffəqiyyətini məktəb kollektivinin
uğuru, ümumiyyətlə, Naxçıvan MR təhsilinə verilən yüksək
qiymətin nümunəsi hesab edir. Hər il olduğu kimi, bu il
də Naxçıvan MR Ali Məclisinin sədri ali məktəblərə qəbul
imtahanlarında 500-dən çox bal toplayan 312 nəfəri pul
mükafatı və qiymətli hədiyyələrlə mükafatlandırıb.
Bundan başqa, il ərzində yüksək nəticələr göstərən orta
məktəb şagirdlərinə kompüter dəstləri verilib. Şahbuz
rayonundan 102 gənc ali məktəbə qəbul olunub, onlardan
27-si 500-dən artıq bal toplayıb. Kükü məktəbinin
məzunlarından 16 nəfəri ali məktəbə qəbul olunub. Bu,
məktəbin tarixində ən yüksək nəticədir. Şübhəsiz ki,
bunlarda da Yunis müəllimin zəhmət payı çoxdur.
Yunis Quliyev müsabiqədə qalib gəlməsi münasibəti ilə
ona ünvanlanmış təbrikləri respublikamızın Prezidenti
cənab İlham Əliyevin təhsilə verdiyi yüksək qiymətin
bariz nümunəsi kimi qiymətləndirir, bu diqqət və
qayğıya, ümumiyyətlə, dövlətimizə şərəflə qulluq
edənlərə layiqli qiymət verdiyinə
görə ümummilli liderimiz Heydər Əliyevin layiqli
davamçısı, Azərbaycan Respublikasının Prezidenti İlham
Əliyevə dərin minnətdarlığını bildirir.
Qəlbinin odu, gözünün nuru ilə şagirdlərin yoluna bundan
sonra da işıq saçmağı özünün həyat amalı sayan Yunis
müəllimi peşə bayramı münasibəti ilə ürəkdən təbrik
edir, ona şərəfli fəaliyyətində daha böyük uğurlar
arzulayırıq.
Yusif ƏLİYEV
Peşəsinin vurğunu
 Bu
yaşa qədər bu cür düşünmüşəm və yəqin ki, bundan sonra
da belə düşünəcəm ki, ömrümün ən şirin vaxtını məktəb
illərində yaşamışam. Məktəb illərimi tez-tez
xatırlayıram və təbii ki, o illəri mənə xatırladan
dəyərli insanlar olur. Rəna Seyidova belə
insanlardandır. Rəna müəllim gözəl və səfalı Gədəbəy
rayonunun İsalı kəndindən Azərbaycan Dövlət Pedaqoji
Universitetinin ibtidai təhsilin pedaqogikası və
metodikası fakültəsinə və Nəsimi rayon Abdulla Şaiq
adına 54 nömrəli orta məktəbə qədər gün kimi aydın və
saf bir ömür yolu keçib.
Rəna müəllim insanın əxlaq və xarakterini ucaldan və ona
əbədiyyət şüurunu aşılayan elə bir peşənin sahibidir ki,
yer üzündə ona bərabər ikinci bir peşə sahibi göstərmək
mümkün deyil. Təbii ki, burada söhbət "müəllim"
sözündən getmir, müəllimlikdən gedir. Müqəddəs olan da
"müəllim" sözü deyil, məhz müəllimlikdir. Ona görə ki,
bir peşə nə qədər müqəddəs olursa-olsun, əgər peşə
sahibi öz vəzifəsini layiqincə yerinə yetirmirsə və ya
yetirə bilmirsə burada heç bir müqəddəslikdən söhbət
gedə bilməz. Rəna müəllim öz vəzifəsini və işini
layiqincə yerinə yetirən insanlardandır. Cəmiyyətimiz
ancaq Rəna müəllim kimi bilikli, savadlı, sənətinin
vurğunu olan, öyrətməyi sevən və bacaran müəllimlərin
əlində ucala bilər. Rəna müəllim gənc nəslin
formalaşmasında böyük rol oynayan, neçə-neçə uşaqlara
qələm tutub yazmağı öyrədən, hər il keçdikcə öz
bildiklərini onlarla bölüşən və bölüşdükcə, danışdıqca
daha da zənginləşən dəyərli bir insandır.
Rəna müəllim haqqında ayrı-ayrı adamların bütün fikir və
düşüncələri, arzu və istəkləri demək olar ki, eyni
mənbədən qidalanır. O mənbənin adı sevgidir, o mənbənin
adı müəllimlikdir. Onu tanıyandan sonra düşündüm ki, əsl
müəllim belə olmalıdır. Xalqının, bütövlükdə
bəşəriyyətin gələcəyi, onun əxlaqi kamilliyi, qazandığı
elmi yalnız insanlığın xeyrinə istifadə etmək amalı Rəna
müəllimin düşüncəsinin mayasıdır.
Rəna müəllim bir də ona görə xoşbəxtdir ki, o, 54
nömrəli orta məktəbin kollektivi ilə bir yerdə çalışır.
Məktəbin direktoru Sahibə Abbasovanın xidmətləri və
mütərəqqi fəaliyyəti danılmaz bir faktdır. İnsan bütün
bu faktların şahidi olduqca heyrət edir. Məktəbin
təlim-tərbiyə işləri üzrə direktor müavini Zeynəb
Qasımova haqqında məktəbin müəllim kollektivi və
şagirdlər arasındakı fikirlərdən sonra ürəyimdən külək
kimi bir hiss keçdi: Kaş təzədən doğulaydım, kaş təzədən
məktəbə gedəydim, kaş təzədən 1-ci sinifdə oxuyaydım,
kaş oxuduğum məktəb 54 nömrəli orta məktəb olaydı. Və
kaş ibtidai sinif müəllimim Rəna müəllim olaydı. Kaş
belə işıqlı insanlardan dərs alaydım.
Pərvanə İBRAHİMOVA
Müəllim adımla fəxr edirəm
 Artıq
18 ildir ki, pedaqoji fəaliyyətlə məşğulam. Nəsimi
rayonu 42 nömrəli tam orta məktəbdə çalışmağım mənim iş
həyatımda bir dönüşə çevrildi. Məktəbimizdə müəllimlər
arasında sağlam rəqabət hökm sürməkdədir. Tez-tez "açıq
dərs"lərin, müxtəlif ədəbi-bədii gecələrin təşkil
olunması, müəllimlərin İKT bacarıqlarını
möhkəmləndirməsi üçün kurslarda iştirak etməsi artıq
ənənəyə çevrilmişdir. Bunun üçün bir müəllim kimi mən öz
üzərimdə daim çalışaraq istər metodiki, istərsə də
texnoloji cəhətdən hazırlığımı artırmağa başladım.
2011-ci ildə Azərbaycan Respublikası Təhsil Nazirliyi və
"Mədəd" humanitar təşkilatı ictimai birliyi tərəfindən
təşkil edilmiş İKT-nin təhsilə tətbiqi üzrə "İntel"
"Gələcək üçün təhsil" təlim kursu, 2011-ci ildə
Azərbaycan Respublikası Təhsil Nazirliyi və "Smart
Technologies" şirkəti tərəfindən təşkil edilmiş məktəb
müəllimləri və təhsil müəssisələrinin işçiləri üçün
"Dymo/Mimio interaktiv texnologiyaları" ilə tədris təlim
kursunu dinlədiyimə görə sertifikat almış, 2012-ci ildə
"Mir predmetnika" saytında "Tvorçestvo A.Şaiqa"
mövzusunda material təqdim etdiyim üçün, 2012-ci ildə
"Flash dlya prodoljayuşix" kursunu distant yolla
bitirdiyimə gürə sertifikatla təltif olunmuşam. "İnsan
alveri: təhlükələr və qabaqlayıcı təşəbbüslər" üzrə
təlim kursunu bitirmiş, 2012-ci ildə Yenilikçi
Öyrətmənlər kursunu müvəffəqiyyətlə başa vurmuşam.
2012-ci ildə həm həyat bilgisi, həm də Azərbaycan dili
və ədəbiyyat fənni üzrə "Öyrədənlərin öyrədəni"
təlimçilər üçün təlim kursunu bitirərək hər iki fənn
üzrə "təlimçi" statusu almışam. "İnkişaf" elmi
mərkəzinin xətti ilə "Ümumi orta təhsil səviyyəsi üzrə
yeni fənn kurikulumları ilə V-VI sinifdə dərs deyəcək
müəllimlərin təlim kursunda" təlimçi kimi fəaliyyət
göstərirəm. Azərbaycan dili və ədəbiyyat fənləri
aylığının rayon turunun "Açıq dərs" nominasiyasının
qalibi diplomu, pedaqoji sahədə səmərəli fəaliyyətimə,
gənc nəslin təlim-tərbiyəsində qazandığım uğurlara görə
Bakı Şəhəri üzrə Təhsil İdarəsinin Fəxri fərmanı,
Azərbaycan Jurnalist Həmkarlar İttifaqı və "Himmət"
Xeyriyyəçiliyin Təbliği Mərkəzi rəhbərliyinin birgə
qərarı ilə Azərbaycan dilinin, ədəbiyyatının
qorunmasında və mükəmməl tədris olunmasında göstərdiyim
fəaliyyətə görə "Xan qızı Natəvan" mükafatı ilə təltif
olunmuşam. Və bu uğurlarımdan sonra ötən il möhtərəm
Prezidentimizin sərəncamı ilə keçirilən "Ən yaxşı
müəllim" müsabiqəsində iştirak etmək qərarına gəldim.
Birinci mərhələdə 2,1 balla qiymətləndirildim. İkinci
mərhələ mənim üçün daha uğurlu oldu.
"C.Məmmədquluzadənin "Qurbanəli bəy" hekayəsinin
təhlili" mövzusunda keçdiyim "açıq dərs" 9,93 balla
qiymətləndirildi. Həmin dərs "Fəal dərs nümunəsi kimi"
kurikulum proqramını həyata keçirən bəzi təşkilatlara
göndərildi. Nəhayət, üçüncü təqdimat mərhələsində 8,88
bala layiq görüldüm. Beləliklə, 20,91 balla "Ən yaxşı
müəllim " müsabiqəsinin qaliblərindən biri oldum.
İnsan öz əməyinin qiymətləndirildiyini görəndə tutduğu
işə məsuliyyəti daha da artır. Müsabiqənin təşkili,
qiymətləndirilməsi, obyektivliyi biz müəllimlərə verilən
ən böyük hədiyyədir, dəyərdir. Prezidentimiz tərəfindən
təhsilimizə göstərilən qayğıdır. Bu bir faktdır ki,
Prezidentimizin əsas məqsədi Azərbaycan gənclərini
dünyanın ən inkişaf etmiş ölkələrinin gəncləri ilə eyni
səviyyəyə çatdırmaqdır. Mənim də müəllim kimi bir
amalım var: günbəgün qüdrətlənən Azərbaycanımızın
gələcəyi üçün sağlam düşüncəli, vicdanlı vətəndaş
yetişdirmək.
Qarşıdan 5 oktyabr - Beynəlxalq Müəllimlər Günü gəlir.
Bu il bu bayramı müsabiqə qalibi kimi qeyd etmək mənim
üçün çox sevinclidir. Əlbəttə, mən bu sevinci tək
yaşamıram. Mənim bütün bu uğurlarımda əməyi olan
müəllimlərimi - məktəbimizin direktoru Firəngiz
Həmidovanı, Bakı Pedaqoji Kadrların İxtisasartırma və
Yenidənhazırlanma İnstitutunun Azərbaycan dili və
ədəbiyyatı kafedrasının müdiri Aydın Paşayevi, baş
müəllim Bəybala Abbaslını və bütün həmkarlarımı bayram
münasibəti ilə ürəkdən təbrik edirəm.
Ən əsası təhsilə, Azərbaycan müəlliminə və gənc nəslə
göstərdiyi qayğı və diqqətə görə Azərbaycan Respublikası
Prezidenti cənab İlham Əliyevə dərin minnətdarlığımı
bildirirəm.
Natəvan HACIYEVA,
Bakıdakı 42 nömrəli tam orta məktəbin Azərbaycan dili və
ədəbiyyat müəllimi
Müəllim sözünün ziyası
 Bütün
zamanların ən şərəfli, müqəddəs peşələrindən sayılan
müəllim sözünün ziyası, nuru hər birimizin ürəyinə bir
rahatlıq gətirib, ruhuna öz şöləsi ilə işıq salıb.
Müəllim sözünün qüdrəti qılıncdan belə kəsərli olub.
Uzun illər müqəddəs sözlərini, dəyərli məsləhətlərini,
vətəndaşlıq mövqelərini inciyə çevirib yaşadanlar,
muncuq misralarla, sətirlərlə bizə çox incə məqamlardan
bəhs edirlər. Müəllimlər şagirdlərin hərtərəfli bilik
almaları, vətənə, dövlətə layiqli övlad olmaları üçün
bütün bilik və bacarıqlarını sərf edirlər. Şagirdinin
hər cür şıltaqlığına, əziyyətinə dözmək, kədəri ilə
kədərlənib, sevinci ilə sevinmək müəllimlərin üzərinə
düşən ağır, lakin şərəfli bir yükdür. Ümummilli lider
Heydər Əliyev həmişə müəllim əməyini yüksək
qiymətləndirərək demişdir: "Hər birimizdə müəllimin
hərarətli qəlbinin bir zərrəciyi vardır. Məhz müəllim
doğma yurdumuzu sevməyi, hamının rifahı naminə vicdanla
işləməyi müdrikliklə və səbirlə bizə öyrətmiş və
öyrədir".
Gəncə şəhəri 37 nömrəli tam orta məktəbin müəllimi,
peşəsini sevən, uşaqlarla işləməkdən zövq alan Ləzifə
İsmayılova da belə ziyalılarımızdandır.
Uşaqlara tükənməz sevgi Ləzifə İsmayılovanı 1980-ci ildə
Gəncə Dövlət Universitetinə gətirmişdir. Orta məktəbi
fərqlənmə diplomu ilə bitirən Ləzifə müəllim təhsil
aldığı universitetdə də tezliklə nümunəvi, öncül tələbə
kimi ad çıxarmış, müəllim və yoldaşlarının sevimlisinə
çevrilmişdir. Əsl ziyalı xanıma xas keyfiyyətləri özündə
cəmləşdirən Ləzifə İsmayılova ali təhsilini başa
vurduqdan sonra fəaliyyətə başladığı Gəncə şəhər 37
nömrəli tam orta məktəbdə həm kollektivin, həm də
uşaqların və valideynlərin əzizi olub, onların rəğbətini
və hörmətini qazanmışdır. 24 illik pedaqoji təcrübəsi
müddətində bir gün də olsun tələbkarlıq, nümunəvilik,
işinə məsuliyyət, yenilik, daim axtarışda olmaq hissləri
onu tərk etməmişdir. 6 buraxılış sinfinə rəhbərlik edən,
50 illik ömür yolunda əslində hər bir şagirdini qolları
üstünə alaraq onlara ömründən nur paylayan Ləzifə
müəllimin şərəf dolu həyat yolunu heç nə ilə əvəz etmək,
dəyişmək, unutmaq mümkün deyil. Ləzifə müəllimi bu nuru
həm də həyat yoldaşı, bir məktəbdə çiyin-çiyinə
çalışdıqları Akif Namazova, 3 ali təhsilli övladına da
verə bilib. O, ailəsini şagirdləri, şagirdlərini də
ailəsi qədər sevib. Ona uğur gətirən də elə bu olub.
Beynəlxalq Müəllimlər Günü ərəfəsində üzümü Ləzifə
müəllimə, onun simasında ölkəmizin bütün müəllimlərinə
tutaraq deyirəm: "Bayramınız mübarək, əziz müəllimlər".
PƏRVANƏ
Ən yaxşı müəllim kimi peşə bayramımızı qarşılamağım
ikiqat sevindiricidir
 1962-ci
ildə Ağcabədi rayonunda ziyalı ailəsində anadan olmuşam.
1978-ci ildə Ağcabədi şəhər 11 nömrəli tam orta məktəbi
əla qiymətlərlə bitirmişəm. Uşaqlıqdan tarixçi, tarix
müəllimi olmaq arzusunda olmuşam. Bu arzumu
reallaşdırmaq üçün elə həmin il sənədlərimi Azərbaycan
Dövlət Pedaqoji İnstitutuna (hazırkı Azərbaycan Dövlət
Pedaqoji Universitetinə) vermiş və tarix fakültəsinə
qəbul olunmuşam. 1983-cü ildə institutu fərqlənmə
diplomu ilə bitirmişəm. Təyinatla Ağcabədi rayonundakı
Üzeyirkənd orta məktəbinə müəllim təyin olunmuşam. Bir
il orada müəllim işlədikdən sonra ailə vəziyyətimlə
əlaqədar Bakı şəhərinə köçmüşəm. 1988-ci ildə Bakı
şəhəri Nizami rayonundakı 129 nömrəli tam orta məktəbə
müəllim təyin olunmuşam. 1994-cü ilə kimi həmin məktəbdə
tarix müəllimi işləmişəm. Müəllim kimi formalaşmağımda
bu məktəbdəki fəaliyyətimin mühüm rolu olmuşdur. 1994-cü
ildə N.Nərimanov rayonunda yaşamağımla əlaqədar 82
nömrəli tam orta məktəbə dəyişilmiş və pedaqoji
fəaliyyətimi burada davam etdirmişəm. Həmin vaxtdan
indiyə kimi bu məktəbdə çalışıram. Bir pedaqoq kimi bu
məktəbdə çox şey öyrənmiş və pedaqoji ustalığa
yiyələnmişəm. O zamankı məktəb direktoru, tanınmış
təhsil işçisi Babaxan Muradovdan, məktəbimizin hazırkı
direktoru Vaqif Mehdiyevdən, təlim - tərbiyə işləri üzrə
direktor müavini Aida Qasımovadan, həmkarlarım Almaz
Nəsibovadan, Nərgiz Quliyevadan və digər müəllimlərdən
pedaqoji peşə fəaliyyətinin bir çox incəliklərini
öyrənmişəm.
Mən pedaqoji fəaliyyətimin ilk vaxtlarından bir müəllim
kimi həmişə şagirdləri düşünməyə, axtarışa sövq edib,
onların təfəkkürünə yol açmağa çalışmışam. Dərs dediyim
şagirdlərdə tarixə, xüsusən Azərbaycan tarixinə böyük
maraq oyatmışam. Çalışıram tədris prosesini elə təşkil
edim ki, o, şagirdlərdə idrak fəallığı yaratsın, onlarda
biliklərə yiyələnmək həvəsi doğursun. Şagirdlər təkcə
tarixi faktları və hadisələri mexaniki olaraq yadda
saxlamasınlar, onların yarandığı dövrü, şəraiti düzgün
dərk edə və qiymətləndirə bilsinlər. Hadisə və faktları
təhlil etmək qabiliyyətlərinə yiyələnsinlər. Uzunillik
təcrübəm göstərir ki, belə tədris zamanı mexaniki
əzbərləmə, hafizə deyil, düşüncə, təfəkkür ön plana
keçir. Müasir təhsilimizin əsas qayəsi də məhz bundan
ibarətdir.
Açığını deyim ki, bütün müəllimlər kimi mən də
respublikamızda son illər həyata keçirilən və pedaqoji
ictimaiyyətin böyük rəğbətlə qarşıladıığı "Ən yaxşı
müəllim" müsabiqəsində iştirak etmək arzusunda olmuşam.
Lakin daha yaxşı nailiyyətlərlə bu müsabiqəyə qoşulmaq
istəyim yalnız bu il fikrimi reallaşdırmaq arzusunu daha
da gücləndirdi və müsabiqədə iştirak etmək qərarına
gəldim.
Çox ciddi olan müsabiqə şərtləri ilə tanışlığım ona
hazırlıq ərəfəsində öz bilik və bacarığımı bir daha
götür-qoy etmək imkanımı genişləndirdi, müsabiqədə
iştirak etdim və qalib oldum.
Müsabiqə mənə çox şey verdi. Maddi həvəsləndirmə müəllim
üçün böyük kömək, həvəsləndirmə vasitəsi olsa da, mən
onu nəzərdə tutmuram. Bu olar da, olmaz da. Başlıca
məsələ müəllim əməyinə verilən qiymət, onun uzunillik
fədakar əməyinin dövlət tərəfindən qiymətləndirilməsi,
ona verilən yüksək dəyərdir. Bunu heç bir maddiyyatla
müqayisə etmək olmaz.
Cənab Prezidentimiz möhtərəm İlham Əliyevin verdiyi
sərəncamda öz adımı oxumaqdan aldığım sevinc hissi məndə
gələcək işlərimdə daha məsuliyyətli olmaq, daha böyük
uğurlar əldə etmək üçün səylə çalışmaq inamımı daha da
artırdı.
Belə bir müsabiqənin keçirilməsi, yəni hər il yaxşıların
ən yaxşısının seçilməsi müəllimə, məktəbə və bütövlükdə
təhsilimizə göstərilən qayğı və diqqətin təzahürüdür.
Bunun üçün dövlətimizin başçısına, hökumətimizə və
respublika Təhsil Nazirliyinə öz minnətdarlığımı
bildirirəm. Bu həm də gələcək fəaliyyətim, yeni
nailiyyətlər üçün məsuliyyət deməkdir.
Pedaqoji fəaliyyətimdə əsas məqsədim məhz bu müsabiqəyə
hazırlıq olmasa da, bir neçə il öncədən gördüyüm işlərin
çoxu müsahibənin birinci mərhələsinin şərtlərini
ödəyirdi. Müxtəlif təlim kurslarının iştirakçısı olmuş,
təcrübəmlə bağlı respublikamızın pedaqoji mətbuatında
məqalələrlə çıxışlar etmişəm.
"Fəal təlim" (2003), "Mimio XI. İnteraktiv lövhə ilə
tədris" (2010), "İnformasiya-kommunikasiya
texnologiyalarının köməyi ilə tədris prosesinin
təşkili" (2010), İntel "Gələcək üçün təhsil" (2011),
"Öyrədənlərin öyrədəni" (2012), "İnkişaf" Elmi
Mərkəzinin apardığı "Təlimçilər üçün təlim" (2012)
kurslarını keçməyimi təsdiqləyən sertifikatlarım var.
2002-2003-cü tədris ilində N.Nərimanov rayonu üzrə
"Pedaqoji mühazirələr" müsabiqəsinin, 2003-2004-cü
tədris ilində isə rayon üzrə "İlin ən yaxşı müəllimi"
müsabiqəsinin qalibi olmuşam.
Bakı Şəhəri üzrə Təhsil İdarəsinin 2012-2013-cü tədris
ilində keçirdiyi "Azərbaycan tarixi fənn aylığı"
müsabiqəsində "Ən yaxşı dərs layihəsi" nominasiyası üzrə
I və "Müəllimin ən yaxşı açıq dərsi" nominasiyası üzrə
III yerə layiq görülərək fəxri fərmanlar və mükafatlar
almışam.
TQDK-nın tarix fənni üzrə ekspert şurasının üzvüyəm.
Təbii ki, bunlar hamısı müsabiqənin ilk mərhələsində
nəzərə alındı.
Müsabiqənin ikinci mərhələsində sınaq dərslərinin
keçirilməsinə ciddi hazırlıq tələb olunurdu. Müsabiqənin
çətin olacağı aydın idi.
Dərsim Bakı şəhərindəki 1 nömrəli tam orta məktəbin VIII
sinfində oldu. Bu dərsləri qiymətləndirəcək komissiya
üzvləri respublikamızın tanınmış pedaqoqları,
metodistləri və qabaqcıl tarix müəllimləri idi.
Müsabiqədə ən böyük çətinlik məktəbin, dərs apardığım
sinfin tanış olmaması idi. Lakin müəllimin işinin
güzgüsü onun apardığı dərsin səviyyəsi olduğunu
bildiyimdən bu mərhələyə ciddi hazırlaşdım. Dərsimdə
müasir təlim texnologiyalarından, fəal təlim
metodlarından geniş istifadə etdim. Deyəsən, yaxşı
alındı. Dərsim komissiya üzvlərini razı salmışdı. Mümkün
10 baldan 9,66 bal topladım.
Ən həyəcanlı, ən qısa vaxt ərzində bir yenilikçi müəllim
kimi özünü göstərə bilmək, özünü ifadə etmək imkanının
olduğu III mərhələ gözlədiyimdən də demokratik bir
səviyyədə keçdi. Hər şey şəffaf, heç bir təsir, təzyiq
olmadan həyata keçdi. Bu mərhələdə mümkün 10 baldan 9,84
bal topladım. Bundan yaxşı nə ola bilərdi? Burada
əyləşən təhsil bilicilərinin heç kimə fərq qoymadan
hamıya eyni bir meyardan yanaşdıqlarının şahidi oldum.
Demək olar ki, nəinki yüksək bal toplayan həmkarlarım,
hətta yüksək bal toplamayanlar da bu nəticələrdən razı
idilər.
Yaxınlaşan müəllim gününü ilin "Ən yaxşı müəllim"
müsabiqəsinin qaliblərindən biri kimi qarşılamağım
ikiqat sevindiricidir. Qalib olduğum günlərdə olduğu
kimi, bu gün də müəllim yoldaşlarımdan, dostlar və
qohumlardan, ən çoxu isə şagirdlərimdən təbriklər
gözləyirəm. Məncə, müəllimin ən önəmli təbriki
şagirdlərinin minnətdarlıq hissi ilə onu yada
salmalarıdır.
Nuriyyə İLYASOVA,
Bakıdakı 82 nömrəli tam orta məktəbin müəllimi |
