|
 İnsan
həyatda addımlayarkən istəklərinin reallaşacağı barədə
çox düşünür. Sanki həyat özü insanı məqsədinə və
istəyinə doğru çəkir. Mən də həyatda kim olacağım
haqqında çox düşünmüşdüm. Amma bu şərəfli və
məsuliyyətli sənətə belə gənc yaşımda yiyələnəcəyim
haqqında fikirləşməmişdim. Həmin məsuliyyətli və şərəfli
peşə müəllimlikdir.
Mən, Hacıyeva Aysel Vəliyəddin qızı 1990-cı ildə Bakı
şəhərində anadan olmuşam. 1996-cı ildə Nərimanov
rayonunda yerləşən 258 nömrəli tam orta məktəbin birinci
sinfinə getmişəm və 2007-ci ildə bu məktəbi bitirmişəm.
Həmin ildə Bakı Slavyan Universitetinin "İbtidai
təhsilin pedaqogikası və metodikası" ixtisasına daxil
olmuşam. 2011-ci ildə universiteti fərqlənmə diplomu ilə
bitirdikdən sonra Bakı Slavyan Universitetinin
magistraturasına daxil olmuşam. 2013-cü ildə
universiteti magistr kimi də fərqlənmə ilə bitirmişəm.
Bakı Slavyan Universitetinin təhsil, elm həyatında fəal
iştirak etdiyimə görə universitetin "Fəxri məzunu" adı
ilə təltif olunmuşam.
İndi isə müəllimlik həyatına necə qədəm qoyduğumdan söz
açım. Mən magistraturanı bu il bitirəndə Azərbaycan
Respublikası Təhsil Nazirliyinin müəllimlərin işə qəbulu
üzrə apardığı müsabiqə barədə eşitmişdim və bilirdim ki,
artıq 3 ildir, müsabiqə keçirilir. Ona görə də
müsabiqənin şərtləri ilə yaxından tanış olmaq üçün
Təhsil Nazirliyinin saytına daxil oldum. İmtahanın
şərtləri ilə tanış oldum və elektron ərizəni doldurdum.
Daha sonra mənim şəxsi səhifəmə imtahanın yeri və vaxtı
barədə məlumat gəldi. İmtahan günü çox həyəcanlı idim.
İmtahan zalına daxil oldum, kompüter qarşısında
əyləşdim, imtahana başladım. Kompüterdə 35 sual var idi
və imtahana 1 saat vaxt verilmişdi. Suallara cavab
verdikdən sonra "imtahanı başa çatdır" düyməsini basdım.
Monitorda balım əks olundu: 34.38 bal. Bir gün sonra isə
şəxsi səhifəmə hansı məktəbə düşməyim barədə məlumat
gəldi. Həmin məktəb hazırda işlədiyim Binəqədi rayonu
ərazisində yerləşən 83 nömrəli məktəb-liseydir. Çox
sevinirdim, həm də inana bilmirdim. Amma indi mən həmin
məktəbin balaca fidanlarının ibtidai sinif müəllimiyəm.
Sentyabrın əvvəli 83 nömrəli məktəb-liseyə yollandım.
Məktəbin direktoru Yaqut Sadıqova məni qarşıladı, öz
təbrik, istək, arzu və məsləhətlərini bildirdi. Daha
sonra mən məktəbin gözəl müəllim kollektivi ilə tanış
oldum. Onu da qeyd edim ki, çox həyəcanlı idim, amma
ibtidai siniflər üzrə direktor müavini Xalidə müəllim və
məktəbin müəllim kollektivi məni o qədər gözəl
qarşıladılar ki, həyəcanlı olduğumu belə unutdum.
Mən bu gün çox sevinirəm ki, ölkəmizdə təhsilə belə
yüksək qayğı və diqqət göstərilir. Ən savadlı
müəllimləri məhz belə bir müsabiqə yolu ilə işə qəbul
edir və onların müəllimlik istedadını üzə çıxarırlar.
Peşəmin çox məsuliyyətli olduğunu dərk edirəm. Uşaqları
da çox sevirəm. İnanıram ki, işimin öhdəsindən uğurla
gələcəyəm.
Hər il oktyabrın 5-ni Beynəlxalq Müəllimlər Günü kimi
qeyd edirik. Hər birimizin layiqli vətəndaş kimi
yetişməyində müəllimlərimizin əvəzsiz xidmətləri
olmuşdur. Kim deyərdi ki, bir vaxtlar öz müəllimlərini
təbrik edən kiçikyaşlı Ayseli vaxt gələcək müəllim kimi
onu kiçikyaşlı şagirdləri təbrik edəcək?! Bu bayram
mənim üçün çox vacib və əlamətdardır. Çünki onu müəllim
kimi ilk dəfə qeyd edirəm. Mən bayramda ilk növbədə bu
şərəfli adı qazanmağıma köməklik göstərən ibtidai sinif
müəllimimi təbrik edirəm. Çünki mənim ibtidai sinif
müəllimi kimi şərəfli peşəyə yiyələnməyimdə ən əsas və
birinci vasitəçi o olubdur. Daha sonra 83 nömrəli
məktəb-liseyin direktoru Yaqut Sadıqovanı və onun
şəxsində bütün müəllim kollektivini peşə bayramımız
münasibətilə təbrik edirəm.
Müəllim!!! Bu adın mənəvi yükünü təmiz vicdanla daşıyan,
əsl müəllim adına layiq olan bütün müəllimləri təbrik
edirəm!
Aysel HACIYEVA,
Bakı şəhəri 83 nömrəli məktəb-liseyin ibtidai sinif
müəllimi |
