Naxçıvan
Muxtar Respublikası Mədəniyyət və Turizm Nazirliyinin
"27 sentyabr - Beynəlxalq turizm günü" ilə əlaqədar
Naxçıvan Dövlət Universiteti ilə birgə təşkil etdiyi
"Qədim yurda gənc baxış" adlı tədbir keçirildi.
Tədbiri giriş sözü ilə açan Naxçıvan Dövlət
Universitetinin rektoru, biologiya elmləri doktoru,
professor Saleh Məhərrəmov qeyd etdi ki, 1925-ci ildən
Cenevrədə müxtəlif adlar altında fəaliyyət göstərən
turizm təşkilatı 1970-ci il 27 sentyabr tarixində
Ümumdünya Turizm Təşkilatı kimi formalaşıb. 1979-cu ildə
baş qərargahı Madrid şəhərinə köçən təşkilat 27 sentyabr
- Ümumdünya Turizm Gününü təsis edib. Dünyanın bir çox
ölkəsində bu gün əsl turizm bayramı kimi təntənəli
keçirilir. NDU-da fəaliyyət göstərən turizm ixtisasının
tələbələrinin biliklərini möhkəmləndirmək üçün bu kimi
tədbirlərin universitetdə keçirilməsinin vacibliyi
vurğulandı.
Naxçıvan Muxtar Respublikasının mədəniyyət və turizm
naziri Sarvan İbrahimov qeyd etdi ki, zəngin
mədəni-tarixi irsə, əlverişli təbii şəraitə malik olan
Azərbaycanda turizm sektoru sürətlə inkişaf edir.
Bildirildi ki, ölkədə turizmin inkişafına dair 1-ci
Dövlət Proqramının reallaşdırılması müstəqilliyin ilk
illərində tənəzzülə uğramış bu sektorun dirçəlməsinə
şərait yaratdı. Bu proqram həmçinin beynəlxalq turizm
bazarına inteqrasiyanın təməlini qoydu, milli turizm
kompleksinin rəqabətə davamlılığı yüksəldi. Prezident
İlham Əliyevin təsdiq etdiyi "Azərbaycan Respublikasında
2010-2014-cü illərdə turizmin inkişafına dair Dövlət
Proqramı" və bu proqrama uyğun olaraq həyata keçirilən
çoxsaylı layihələr ölkədə bu sahənin inkişafına yeni
töhfələr verməkdədir. Proqramın başlıca məqsədi ölkədə
yüksək iqtisadi, sosial və ekoloji tələblərə cavab verən
müasir turizm sahəsinin formalaşdırılmasıdır. Nazir
vurğuladı ki, Azərbaycanın ayrılmaz parçası olan muxtar
respublikamızda turizmin inkişafı üçün zəngin potensial
vardır. Ölkə Prezidentinin, muxtar respublika
rəhbərliyinin apardığı quruculuq işləri, turizm
sektoruna göstərilən dövlət qayğısı turizmin
yeniləşməsinə, inkişaf etməsinə və turistlərin muxtar
respublikamıza rahat şəkildə gəlib-getmələrinə şərait
yaradır. Qeyd olundu ki, 2001-ci ildə muxtar
respublikada 5 mehmanxana olmuş, 2012-ci ildə onların
sayı 22-yə çatmışdır. Duzdağ Fizioterapiya Mərkəzi,
Darıdağ Arsenli Su Müalicəxanası kimi təbii müalicə
obyektləri var. "Əshabi-kəhf Ziyarətgahı" Dini Mədəni
Abidə Kompleksi, Ordubad Tarix-Memarlıq Qoruğu, Gəmiqaya
Tarix - Bədii Qoruğu və s. Naxçıvan Muxtar
Respublikasında turizmin inkişafına dövlət qayğısının
bariz nümunəsidir.
Naxçıvan Muxtar Respublikası Mədəniyyət və Turizm
Nazirliyinin Turizm şöbəsinin müdiri Gülbuta Babayeva
"Naxçıvan Muxtar Respublikasının turizm potensialı",
Naxçıvan Dövlət Universitetinin bələdiyyə və turizm
kafedrasının müdiri, fəlsəfə elmləri doktoru, dosent
Hafiz Hüseynov "Turizmin inkişafında kadrların rolu və
kadr hazırlığı sahəsində görülən işlər", Naxçıvan Muxtar
Respublikası Mədəniyyət və Turizm Nazirliyinin
Elmi-metodiki mərkəzinin direktoru Nizami Əzizəliyev
"Xalq yaradıcılığı sahələrinin turizmin inkişafında rolu
və əhəmiyyəti" və "Naxçıvan mətbəxi" kulinariya
mərkəzinin mühəndis-texnoloqu Minayə Bayramovanın
"Turizm və milli mətbəx" mövzularında məruzələri
dinlənildi. "Naxçıvan balladası" adlı film nümayiş
etdirildi.
Sonda tələbələri maraqlandıran suallar cavablandırıldı.
Mina QASIMOVA,
NDU-nun Mətbuat şöbəsinin əməkdaşı |