Vyanada fəaliyyət göstərən Azərbaycan Mədəniyyət
Mərkəzində yeni başlamış 2013/2014-cü tədris ilində
Azərbaycan dili kursları açılmışdır.
AzərTAc xəbər verir ki, həftədə bir dəfə təşkil olunan
kurslarda Azərbaycan dilinə və mədəniyyətinə maraq
göstərən tələbə və gənclər, iş adamları, elmi dairələrin
nümayəndələri qeydiyyatdan keçmişlər. Kursda tələbələrə
müasir Azərbaycan dilinin fonetika, qrammatika və
leksikası tədris ediləcək, eyni zamanda, digər dillərlə
müqayisəli təhlili aparılacaqdır. Kursda tədris ilkin
dövrdə alman dilində aparılsa da tələbələr Azərbaycan
dilində olan mətnləri tərcümə edəcək və bu dilin
qrammatikasına aid tapşırıqları yerinə yetirəcəklər.
Məşğələnin rəhbəri, Vyana Universitetinin doktorantı
Yaqut Abdalla AzərTAc-ın xüsusi müxbiri ilə söhbəti
zamanı bildirmişdir ki, kursların əsas məqsədi
iştirakçılara Azərbaycan dilini tədris etməklə yanaşı,
onlara Azərbaycan haqqında həqiqətləri yaxından
tanıtmaq, ölkəmizin mədəniyyətini təbliğ etməkdir.
Məşğələlərdə Azərbaycan ədəbiyyatından da söz açılacaq,
yazıçıların və şairlərin əsərlərindən nümunələr təqdim
ediləcəkdir. Azərbaycan Mədəniyyət Mərkəzində mövcud
olan yüksək texniki imkanlar sayəsində kurs
iştirakçılarına mütəmadi olaraq Azərbaycanda istehsal
olunmuş sənədli və bədii filmlər göstəriləcək, müxtəlif
məruzələr təşkil olunacaqdır. Eyni zamanda mərkəzin
nəzdindəki zəngin kitabxana tələbələrin sərəncamında
olacaqdır.
Mövcud marağı nəzərə alaraq, yaxın müddətdə Azərbaycan
Mədəniyyət Mərkəzində Avstriyada yaşayan soydaşlarımızın
övladları üçün həftəsonu məktəbi təşkil olunması və
burada azyaşlılara Azərbaycan dili, ədəbiyyatı, tarix,
coğrafiya və mədəni irsimizlə bağlı biliklərin verilməsi
nəzərdə tutulur. |