Şəmkirdə "Russkiy mir" Fondunun dəstəyi ilə "Rus
dilində danışmağı öyrənək" adlı ödənişsiz rus dili
kursları açılıb. Kursların təşkilatçısı "Azərbaycanın
Rusiya (sovet) Ali Məktəblərinin Məzunları
Assosiasiyası" ictimai birliyidir. Assosiasiyanın sədri
Üzeyir Əliyevin bildirdiyinə görə, bu assosiasiyanın
"Russkiy mir" Fondu ilə artıq ikinci birgə layihəsidir.
2011-ci ildə Daşkəsən rayonunda "Dostluq" yay humanitar
düşərgəsi layihəsi həyata keçirilib.
Yeni layihə Şəmkir və ətraf rayonların sakinləri
arasında böyük maraqla qarşılanıb. Kurslara hazırlıq 3
ay çəkmiş, Şəmkirin tarixi mərkəzində yer seçilib,
buklet, vərəqə və bannerlər çap olunub.
Kursların ən yaxşı rəmzi üçün uşaqlar arasında müsabiqə
keçirilib.
Kurslarda rus dili ilə bərabər, Rusiyanın mədəniyyəti və
tarixi öyrəniləcəkdir. Yaşından asılı olmayaraq hər bir
şəxs kurslara yazıla bilər.
Təşkilat tərəfindən kurslar üçün xüsusi biliklərə malik,
əcnəbi dil kimi rus dilinin tədrisində təcrübəsi olan ən
yaxşı müəllimlər seçilib.
"Azərbaycanın Rusiya (sovet) Ali Məktəblərinin Məzunları
Assosiasiyası"nın sədri Üzeyir Əliyev açılış mərasimində
Azərbaycanda rus dilinin təbliğinə göstərdiyi etimada və
dəstəyə görə "Russkiy mir" Fonduna minnətdarlığını
bildirib.
Şakir CƏFƏROV |