Oktyabrın 24-də Təhsil Nazirliyi Təhsil Sisteminin
İnformasiyalaşdırılması İdarəsində "eTwinning Plus"
layihəsinin Azərbaycanda icrası ilə bağlı tədbir
keçirilib. Tədbirdə Təhsil Nazirliyinin və "Mədəd -
Azərbaycan" təşkilatının nümayəndələri, layihəyə
qoşulmuş məktəblərin direktorları və media nümayəndələri
iştirak ediblər.
Tədbiri giriş sözü ilə Təhsil Sisteminin
İnformasiyalaşdırılması İdarəsinin müdiri Samir Məmmədov
açıb və "eTwinning Plus" layihəsinin əhəmiyyətindən
danışıb. Qeyd edilib ki, "eTwinning Plus" Avropa
İttifaqının Fasiləsiz Təhsil Proqramının tərkib hissəsi
olan "eTwinning" layihəsinin genişlənməsidir. Layihə
pedaqoji işçilərə onlayn platforma vasitəsi ilə ünsiyyət
qurmaq, əməkdaşlıq etmək, təhsil layihələri yaratmaq,
icra etmək və Avropada ən maraqlı öyrənmə icmasının bir
hissəsi olmaq imkanı verir. 2013-cü ildən etibarən
Azərbaycan digər 5 ölkə ilə yanaşı Avropa İttifaqının
qonşuluq siyasətinə əsasən "eTwinning Plus" layihəsinə
üzv olub. Tədbirdə Təhsil Sisteminin
İnformasiyalaşdırılması İdarəsinin və "Mədəd -
Azərbaycan" təşkilatının məsul şəxsləri Avropa
Komissiyası ilə əlaqələrin möhkəmlənməsinə xidmət edəcək
bu layihə haqqında ətraflı məlumat verərək layihənin
müəllimlər və şagirdlər üçün əhəmiyyətindən bəhs ediblər.
Daha sonra "eTwinning Plus" layihəsi çərçivəsində
görülmüş və planlaşdırılan işlərdən, layihənin əsas
xüsusiyyətlərindən, layihəyə qoşulan məktəb, müəllim və
şagirdlərin əldə edəcəkləri təcrübə və imkanlardan bəhs
edən təqdimat tədbir iştirakçılarının nəzərinə
çatdırılıb.
Sonra "eTwinning Plus" layihəsinə qoşulmuş bir neçə fəal
müəllim ümumi layihə və layihə çərçivəsində Avropada
iştirak etdikləri tədbirlər haqqında ilkin
təəssüratlarını bölüşərək bu layihəyə qoşulmaqla öz
məktəblərinə nə kimi töhfələr verdikləri barədə
danışıblar. Həmçinin qonaqların sualları
cavablandırılıb və fikirlər dinlənilib.
Tədbir diskussiya şəklində başa çatıb.
Şakir CƏFƏROV |