|
Azərbaycanın qabaqcıl təhsil müəssisələrindən olan Bakı
Slavyan Universitetinin elmi-mədəni əlaqələrinin mühüm
bir hissəsini dünyanın müxtəlif universitetləri və elm
mərkəzləri ilə həyata keçirilən layihələr təşkil edir.
Bu layihələr sırasına Xorvatiyanın Zaqreb Universiteti
ilə əməkdaşlıq da daxil olub.
Oktyabrın 30-da Zaqreb Universitetinin rektoru,
professor Aleksa Byeliş BSU-nun qonağı olub. Tədbirdə
universitetin rəhbər heyəti, müəllimlər və tələbələr
iştirak ediblər. Qonağı universitetin rektoru, AMEA-nın
müxbir üzvü, professor Kamal Abdullayev salamlayaraq
BSU-nun xarici əlaqələrinin daim genişləndiyini nəzərə
çatdırıb, III Bakı Beynəlxalq Humanitar Forumunda
iştirak etmək məqsədilə Azərbaycana səfər etmiş
xorvatiyalı həmkarının bu təhsil ocağına gəlişindən çox
şad olduğunu bildirib. Rektor slavyan xalqlarının dil
və mədəniyyətlərinin tədqiqi və təbliği istiqamətində
təcrübə toplamış BSU-da serb və xorvat dillərinin də
tədris olunmasının artıq vaxtının çatdığını qeyd edib.
Universitetdə ilk dəfə qonaq olan Aleksa Byeliş BSU
kollektivinin ona göstərdiyi diqqət və qayğıya görə
dərin minnətdarlığını bildirib. Universitetlər arasında
olan yeni əməkdaşlıq münasibətlərindən danışan
xorvatiyalı alim bu əməkdaşlığın daha da inkişaf
edəcəyinə əmin olduğunu vurğulayıb. O, rəhbərlik etdiyi
universitet haqqında geniş məlumat verib, BSU-da
fəaliyyət göstərən tədris-mədəniyyət mərkəzləri ilə
tanışlıqdan məmnun olduğunu qeyd edib. Zaqreb
Universitetində də BSU tərəfindən Azərbaycan dili və
mədəniyyəti mərkəzinin yaranmasının təqdirəlayiq bir
hadisə ola biləcəyini nəzərə çatdırıb: "Burada fəaliyyət
göstərən mərkəzlərin təşkili mənə xoş təsir bağışladı.
Bu mərkəzlər Slavyan Universitetinin təhsil və
mədəniyyət göstəricisidir".
Sonra BSU və Zaqreb universitetlərinin rektorları iki
ali təhsil ocaqları arasında yaranan əlaqələri
rəsmiləşdirmək üçün əməkdaşlıq müqaviləsi imzalayıblar.
Müqavilədə tərəflər arasında müəllim, elmi işçi, tələbə
mübadiləsinin həyata keçirilməsi, birgə elmi-tədqiqat
fəaliyyətinin, elmi tədbirlərin konfransların,
seminarların, simpoziumların, kollokviumların təşkili,
elmi məqalə məcmuələrinin hazırlanması və nəşr olunması,
tərəflərin elmi-tarixi ədəbiyyatla qarşılıqlı təmin
olunması nəzərdə tutulub.
Daha sonra beynəlxalq münasibətlər kafedrasının müdiri,
professor Oktay Əliyev Xorvatiyanın tarixindən bəhs edən
"Sloveniya və Xorvatiya: Müharibə və Sülh diplomatiyası"
adlı kitabını qonağa hədiyyə edib.
Qonaq müəllimlərin və tələbələrin suallarını
cavablandırdıqdan sonra tələbələrlə xatirə şəkli
çəkdirib.
Şakir CƏFƏROV |
