|
 Bakıdakı
M.Müşfiq adına 18 nömrəli tam orta məktəbdə TuranBank,
"Korporativ Sosial Məsuliyyət" proqramı çərçivəsində
Ümumdünya Uşaq Gününə həsr olunmuş rəsm müsabiqəsi
keçirilib.
Müsabiqənin mövzusu ilə əlaqədar Azərbaycan Rəssamlar
İttifaqının üzvü İlham Səfərlidən bir sıra məsləhətlər
alınıb və rəssamın daha çox üstünlük verdiyi "Azərbaycan
abidələri uşaqların gözü ilə" mövzusu seçilib.
Bir neçə gün davam edən bu müsabiqədə şagirdlər
müxtəlif və hətta unudulmuş abidələrin rəsmlərini istər
karandaş, istər sulu, istərsə də yağlı boya ilə
çəkiblər.
Müsabiqənin son günü məktəbin akt zalında valideynlərin
və pedaqoji kollektivin iştirakı ilə şagirdlərin
rəsmlərindən ibarət sərgi təşkil olunub.
Müsabiqənin qalibləri "TuranBank"ın nümayəndələri,
rəssam və dizaynerlər tərəfindən müəyyən edilib.
Münsiflər heyətinin qərarı ilə 1-ci yeri məktəbin 8-ci
"a" sinif şagirdi Şövkət Zeynalovanın çəkdiyi
"İçərişəhər", 2-ci yeri 6-cı "c" sinif şagirdi Samir
İsmayılovun "Şirvanşahlar sarayı", 3-cü yeri isə 5-ci
"b" sinif şagirdi Sahil Mirzəyevin "Şuşa qalası"
rəsmləri qazanıb. Daha 10 gənc rəssam: 4-cü "b" sinif
şagirdi Kərim Məmmədov "Qız qalası", 5-ci "ç" sinif
şagirdi Nərmin Əliyeva "Qız qalası", 4-cü "b" sinif
şagirdi Xədicə Allazova "Atəşgah",
6-cı "a" sinif şagirdi Rəqsanə Rəşidova "Yusif İbn
Küseyr məqbərəsi", 5-ci "c" sinif şagirdi Aysel Rəhimova
"Şirvanşahlar sarayı", "Qız qalası", "Mərdəkan türbəsi",
6-cı "ç" sinif şagirdi Şirxan Əbilov "Azərbaycanın
tarixi abidələri", 5-ci "a" sinif şagirdi Xəlil Osmanlı
"Nəiminin türbəsi", 6-cı "a" sinif şagirdi Murad Balayev
"Ramana qalası", 7-ci "a" sinif şagirdi Elcan İsmayıllı
"Şəki Xan Sarayı" və 11-ci "d" sinif şagirdi Coşqun
Əhmədovun "İçərişəhər" rəsmləri diplom və hədiyyələrlə
mükafatlandırılıb.
Müsabiqə məktəbin şagird və müəllim heyətinin marağına
səbəb olub. Məktəbin direktoru Vaqif Hüseynli belə
müsabiqələrin çox tərbiyəvi əhəmiyyətə malik olduğunu
bildirib və bu təşəbbüsü irəli sürən "TuranBank"ın
nümayəndə heyətinə, təşkilatçılara təşəkkür edib.
"Azərbaycan abidələri uşaqların gözü ilə" mövzusunda
keçirilən rəsm müsabiqəsinin əsas məqsədi uşaqların
ölkəmizin qədim tarixi abidələri haqda biliklərini
genişləndirmək, istedadlı uşaqları üzə çıxarmaq və
onlara dəstək olmaqdır.
Sifai SƏFƏROVA,
"Azərbaycan müəllimi" |
