|
Dekabrın 4-də Bakı Dövlət Universitetində Azərbaycan
Milli Elmlər Akademiyasının həqiqi üzvü, Respublika
Dövlət Mükafatı laureatı, əməkdar elm xadimi, "Şöhrət"
ordenli, Prezident təqaüdçüsü, fizika-riyaziyyat elmləri
doktoru, professor Bəhram Mehralı oğlu Əsgərovun anadan
olmasının 80, elmi, pedaqoji və ictimai fəaliyyətinin
isə 55 illiyi münasibətilə tədbir keçirilib. Tədbiri
giriş sözü ilə açan universitetin rektoru, akademik Abel
Məhərrəmov Bəhram Əsgərovun mənalı həyat yolu və elmi
fəaliyyətindən danışıb.
Bildirib ki, 1933-cü ildə anadan olan Bəhram müəllim
1952-ci ildə orta məktəbi müvəffəqiyyətlə bitirərək Bakı
Dövlət Universitetinin fizika-riyaziyyat fakültəsinin
fizika şöbəsinə daxil olub. Universitetdə təhsil aldığı
müddətdə adlı təqaüdçü olub. Aspirantura təhsilini SSRİ
Elmlər Akademiyası Yarımkeçiricilər İnstitutunda alıb.
Bu institutda o, professor A.İ.Anselmin rəhbərliyi
altında mükəmməl elmi məktəb keçib, bərk cismlər
nəzəriyyəsinin aktual problemləri - metallar və
yarımkeçiricilərdə termomaqnit effektlərin kvant
nəzəriyyəsi ilə məşğul olub. 1966-cı ildə Bakı Dövlət
Universitetinin fizika fakültəsinin molekulyar fizika
kafedrasında işə başlayıb. 1971-ci ildə bərk cismlər
fizikası kafedrasını yaradıb, 1972-ci ildə kafedranın
professoru olub və indiyə qədər həmin kafedranın
rəhbəridir.
Bəhram Əsgərovun əsərləri, elmi araşdırmaları barədə
məlumat verən rektor bildirib ki, onun bir sıra işləri
daha mürəkkəb dispersiya qanunlu, yəni real enerji
spektrli yarımkeçiricilərdəki kinetik effektlərin
klassik nəzəriyyəsinə həsr olunub.
Fizika fakültəsinin dekanı, professor Məmmədəli
Ramazanov məruzəsində alimin elmi fəaliyyətindən
danışıb. Bildirib ki, 1994-2004-cü illərdə Bakı Dövlət
Universitetinin elmi işlər üzrə prorektoru, 1998-ci ildə
bir ilə yaxın müddətdə Bakı Dövlət Universitetinin
rektoru vəzifəsini icra edən Bəhram müəllim hazırda
Azərbaycan Respublikası Prezidenti yanında Ali
Attestasiya Komissiyasının Rəyasət Heyətinin üzvüdür.
Bir çox illər respublika Təhsil Nazirliyinin "Fizika"
ixtisası üzrə elmi-metodik şurasının sədri, elmlər
doktoru elmi dərəcəsi verən Elmi Şuraların sədri və
həmsədri olub. Bəhram müəllimin elmi-təşkilati, pedaqoji
və ictimai fəaliyyəti dövlət tərəfindən yüksək
qiymətləndirilib.
Sonra akademik Ziyad Səmədzadə, professorlar - Misir
Mərdanov, Qəzənfər Paşayev, Adil Qəribov və başqaları
çıxış edərək yubilyarı təbrik edib, ona cansağlığı, uzun
və məhsuldar ömür arzulayıblar.
BDU-nun Mətbuat və informasiya şöbəsi |
