Qurultayın
qətnaməsini Təhsil Nazirliyi Dərslik və nəşriyyat
şöbəsinin müdir müavini Əsgər Quliyev oxudu
Azərbaycan müəllimlərinin XIV qurultayı müasir təhsil
salnaməsinə "Azərbaycan Respublikasında təhsilin
inkişafı üzrə Dövlət Strategiyası"nda göstərilən
istiqamətlər üzrə qarşıya qoyulan hədəflərə çatmaq
yollarının müəyyən olunduğu, təhsil quruculuğunda yeni
mərhələyə start verildiyi əlamətdar bir tədbir,
yaddaqalan hadisə kimi daxil olur.
Azərbaycan Respublikasının Prezidenti cənab İlham
Əliyevin qurultaya təbrik məktubu dövlət başçısının
təhsil sisteminə və təhsil işçilərinə göstərdiyi diqqət
və qayğının parlaq təzahürü olmaqla yanaşı, müasir
təhsil quruculuğunun aydın sabahına və uğurlu gələcəyinə
nikbinlik duyğuları yaradır.
Azərbaycan Respublikası təhsil nazirinin məruzəsində
Dövlət Strategiyasının məzmunu, məqsədi, islahatın əsas
strateji istiqamətləri, qarşıya qoyulan strateji
hədəflər və tədbirlərin reallaşdırılması yolları
aydınlaşdırılmış, təhsil islahatının perspektiv üçün
əsas fəaliyyət istiqamətləri dəqiq
müəyyənləşdirilmişdir.
Qurultay Azərbaycan Respublikasının Prezidenti cənab
İlham Əliyevin təbrik məktubunda irəli sürülən
konseptual müddəaları və ideyaları müasir təhsil
quruculuğunda əsas proqram sənədi kimi qəbul edərək
məruzədə qarşıya qoyulan vəzifələri, eləcə də məruzə
ətrafındakı çıxışlarda səslənən təklifləri nəzərə alaraq
qeyd edir ki, son illərdə təhsil sahəsində nəzərəçarpan
uğurların əldə olunması bilavasitə ölkənin
modernləşməsinə yönəlmiş sosial-iqtisadi siyasətlə bağlı
olmuşdur. Ötən dövrdə təhsilin infrastrukturunun
müasirləşdirilməsi və təhsilin məzmunca yeniləşdirilməsi
istiqamətində önəmli addımlar atılmış, təhsilin
informasiyalaşdırılması sahəsində irəliləyişə nail
olunmuş, Azərbaycan təhsilinin Avropa təhsil məkanına
inteqrasiyası yönündə tədbirlər həyata keçirilmişdir.
Lakin buna baxmayaraq, hazırda dünyada gedən proseslərə
uyğun təhsildə yeni yanaşmalara tələbat yaranmışdır.
Belə ki, hazırda sürətlə inkişaf edən və yayılan
informasiya-kommunikasiya texnologiyaları, bununla bağlı
geniş vüsət almış qloballaşma prosesləri ölkənin
sosial-iqtisadi və mədəni həyatına ciddi şəkildə təsir
etməkdədir. Ölkənin İnkişaf Konsepsiyasında deyildiyi
kimi, belə bir şəraitdə Azərbaycanın qarşısında duran
əsas vəzifələrdən biri dünya ölkələrinin inkişaf sürəti
ilə müqayisədə geriliyə yol verməməkdən, iqtisadiyyatın
səmərəliliyini və rəqabət qabiliyyətini artırmaqdan,
onun innovasiya əsaslı irəliləyişini təmin etməkdən,
biliklərə əsaslanan iqtisadiyyatın həlledici amili olan
insan kapitalının adekvat inkişafını ön plana çəkməkdən
ibarətdir. Bu çağırış ölkəmizdə müasir təhsil sisteminin
formalaşdırılmasını tələb edir. Bu baxımdan sürətlə
modernləşən Azərbaycanda təhsilin insan kapitalının
inkişafı çağırışlarına cavab verməsi üçün yeni, daha
təsirli addımların atılmasına ehtiyac vardır.
Qurultay hesab edir ki, təhsilin Dövlət Strategiyası
perspektivdə təhsil sahəsində aparılacaq islahatlarda
təhsil işçilərinə yol göstərən konseptual sənəd kimi
yüksək dəyərləndirilməli, irəli sürülən hər bir ideya
təhsil işçiləri tərəfindən dərindən öyrənilməli, onların
gerçəkləşdirilməsi yolunda bilik və bacarıqlarını
əsirgəməməli, təhsili idarəetmə qurumları isə ölkənin
intellektual potensialını bu mühüm dövlət sənədində
müəyyənləşdirilmiş strateji hədəflərə çatmağa səfərbər
etməlidir.
Qurultay təhsil prosesində məzmunun həlledici amil,
təməl prinsip olduğunu vurğulayaraq hesab edir ki,
Dövlət Strategiyasında təhsilin məzmunca
yeniləşdirilməsinə müasir yanaşmalar milli mütərəqqi
ənənələrə, beynəlxalq təcrübəyə, ölkənin sosial-iqtisadi
inkişaf tələblərinə, modernləşmə meyillərinə tamamilə
uyğun olaraq səriştəyə əsaslanan şəxsiyyətyönlü təhsil
məzmununun yaradılmasına yönəlmişdir.
Qurultay tədris prosesində təhsilverənin fenomenal
rolunu, insan kapitalının ahəngdar inkişafının müstəqil
dövlətçilik fəlsəfəsinin əsas hədəfi olduğunu xüsusi
vurğulayaraq qeyd edir ki, aparılacaq islahatlar təhsil
prosesində innovativ təlim metodları və
texnologiyalarını tətbiq edən, təhsilin məzmununun
səmərəli mənimsənilməsini təmin edən səriştəli
təhsilverənin formalaşdırılmasına, müəllim peşəsinin
nüfuzunun yüksəldilməsinə imkan verəcəkdir.
Qurultay hazırda təhsili idarəetmə sahəsində ciddi
problemlərin olduğunu, təhsilin nəticələrinə görə
cavabdehliyin artırılması, təhsilin keyfiyyətini ölçən
göstəricilər sisteminin təkmilləşdirilməsi, təhsilin
maliyyələşdirilməsinin onun keyfiyyətinə yönəldilməsi
sahəsində islahatlara ciddi ehtiyac olduğunu xüsusi qeyd
edərək bəyan edir ki, Dövlət Strategiyasında yer alan
nəticələrə görə cavabdeh, şəffaf və tənzimlənən
mexanizmlərə malik, dövlət-ictimai xarakterli və
dövlət-biznes əməkdaşlığına əsaslanan təhsildə yeni
idarəetmə sisteminin formalaşdırılması istiqamətində
atılacaq addımlar Azərbaycan təhsilində idarəetmənin
Avropa təhsil standartlarına uyğunlaşdırılmasına güclü
təkan verəcək, təhsildə keyfiyyətin yüksəldilməsinə
kömək edəcəkdir.
Qurultay təhsil quruculuğunda müasir tələblərə cavab
verən infrastrukturun yaradılması və təhsilin
maliyyələşdirilməsinin yeni mexanizminin qurulması ilə
bağlı Strategiyada yer alan strateji istiqamətlər və
hədəflərin ölkənin iqtisadi potensialına söykəndiyini və
reallıqları əks etdirdiyini qeyd edərək bildirir ki,
göstərilən istiqamətlərdə nəzərdə tutulan islahatların
gerçəkləşdirilməsi Azərbaycan təhsilinin inkişaf etmiş
ölkələrin təhsil sistemlərinə uyğunlaşdırılmasına,
ömürboyu təhsili təmin edən infrastrukturun və təhsilin
iqtisadi cəhətdən dayanıqlı yeni maliyyələşdirmə
mexanizminin yaradılmasına imkan verəcəkdir.
Qurultay əmin olduğunu bildirir ki, "Azərbaycan
Respublikasında təhsilin inkişafı üzrə Dövlət
Strategiyası"nın reallaşdırılması təhsilin məzmunu, kadr
hazırlığı, təhsili idarəetmə sistemi, təhsilin
infrastrukturu və təhsilin maliyyələşdirilməsinin
beynəlxalq təcrübəyə və ölkənin İnkişaf Konsepsiyasına
uyğun olaraq yenidən qurulmasına imkan verəcək, ölkədə
biliklərə əsaslanan iqtisadiyyatın bərqərar olmasını,
informasiya cəmiyyətinin təşəkkülünü, ölkənin davamlı və
rəqabətqabiliyyətli inkişafını təmin edəcək, müstəqil
Azərbaycan Respublikasının dünyanın iqtisadi cəhətdən
inkişaf etmiş dövlətləri arasında layiqli yer tutmasına
xidmət edəcəkdir.
Qurultay dövlət başçısına qurultay iştirakçılarına
ünvanladığı səmimi təbriklərə və xoş sözlərə görə
minnətdarlığını, hörmət və ehtiramını bildirir, bu
yaxınlarda keçirilən prezident seçkilərində qazandığı
möhtəşəm qələbə münasibəti ilə Zati-alilərini
səmimi-qəlbdən təbrik edir, müstəqil Azərbaycanın
xoşbəxt gələcəyi, təhsilimizin işıqlı sabahı naminə daha
böyük uğurlar arzulayır, təhsil işçilərinin hər zaman
onun daxili və xarici siyasətini dəstəklədiyini bəyan
edir.
Azərbaycan müəllimlərinin XIV qurultayı böyük inam və
nikbinliklə bəyan edir ki, ölkəmizin təhsil işçiləri
əsası ümummilli lider Heydər Əliyev tərəfindən qoyulan
təhsil quruculuğu prosesini Prezident İlham Əliyevin
rəhbərliyi ilə uğurla davam və inkişaf etdirəcək,
Strategiyada qarşıya qoyulan bütün hədəflərə çatmağa
nail olacaq, müasir təhsil sisteminin qurulması kimi
tarixi zəfərə imza atacaqlar.
Hazırladılar: Yusif ƏLİYEV, Hicran ƏKBƏROVA, Niyazi
RƏHİMOV,
"Azərbaycan müəllimi" |