"İrəli" İctimai Birliyinin təşkilatçılığı və Azərbaycan
Respublikası Gənclər və İdman Nazirliyinin dəstəyi ilə
bu ilin 5-8 fevral tarixlərində Bakıda "Gənc liderlər
üçün qış universiteti-kreativ başlanğıc" adlı layihə
həyata keçiriləcəkdir. Layihə bu dəfə paytaxtın ən
kreativ 100 gənc liderini bir araya gətirəcək. 4 gün
davam edəcək layihə çərçivəsində gənclər kreativ
potensialın kəşfi və inkişaf etdirilməsi, gənclər
siyasəti, şəxsi inkişaf strategiyasının qurulması,
liderlik bacarıqlarının inkişafı, eyni zamanda gəncləri
əhatə edən müxtəlif mövzular üzrə ölkənin ən aparıcı
ekspertləri ilə ünsiyyətdə və fikir mübadiləsində olmaq
imkanı əldə edəcəklər. 5 komandaya bölünməsi nəzərdə
tutulan iştirakçılar layihə müddətində bir-biri ilə
yarışacaqlar.
Məlumat üçün bildirək ki, "İrəli" İctimai Birliyinin
ənənəvi olaraq keçirdiyi yay və qış universitetləri gənc
liderlərin aşkarlanmasını, müxtəlif sahələr üzrə onların
bilik və bacarıqlarının artırılmasını, fəal vətəndaş
kimi yetişmələrini, eyni zamanda gənc liderlərdən ibarət
şəbəkələrin formalaşmasını təmin edir. Universitet
layihələri hər ilin qış və yay aylarında bir dəfədən az
olmayaraq keçirilir.
2009-cu ildən başlayaraq indiyədək Qazax, Sabirabad
şəhərlərində "Gənc liderlər üçün yay universiteti",
Oğuz, Qəbələ və Gəncə şəhərlərində isə "Gənc liderlər
üçün qış universiteti" layihələri həyata keçirilib ki,
bu layihələrdə də ümumilikdə 600 gənc iştirak edib.
Samirə KƏRİMOVA,
"Azərbaycan müəllimi" |