|
Naxçıvan Dövlət Universitetində 20 Yanvar - Ümumxalq
hüzn günü kitab və rəsm sərgiləri, digər ənənəvi silsilə
tədbirlərlə qeyd olundu. Bu münasibətlə təşkil olunan
mərasimdə əvvəlcə Azərbaycan xalqının milli müstəqilliyi
uğrunda qurban getmiş şəhidlərin ruhu dərin ehtiramla
yad edildi. Mərasimi giriş sözü ilə açan rektor,
professor Saleh Məhərrəmov 20 Yanvarın Azərbaycan
xalqının milli azadlıq hərəkatı və müstəqillik tarixində
şanlı səhifə olduğunu bildirdi. Qeyd olundu ki,
ümummilli lider Heydər Əliyevin xalqımıza qarşı
törədilmiş bu faciəyə siyasi-hüquqi qiymət
verilməsində, şəhidlərin xatirəsinin əbədiləşdirilməsi
və şəhid ailələrinin sosial şəraitlərinin
yaxşılaşdırılmasında mühüm xidmətləri olmuşdur. Bu
siyasət bu gün Azərbaycan Respublikasının Prezidenti
İlham Əliyev tərəfindən uğurla davam etdirilir.
Sonra ümumi tarix kafedrasının dosenti, tarix üzrə
fəlsəfə doktoru Abdulla Mustafayev "20 Yanvar faciəsinin
tarixi, sosial-siyasi kökləri və ibrət dərsləri", hüquq
fənləri kafedrasının müdiri, tarix üzrə fəlsəfə doktoru,
dosent Şükür Məmmədov "20 Yanvar hadisələri beynəlxalq
hüquq prizmasında", Tələbə Elmi Cəmiyyətinin sədri,
hüquqşünaslıq ixtisası üzrə III kurs tələbəsi Ramazan
Abdullayev "Qəhrəmanlıq tariximizin 20 Yanvar səhifəsi"
mövzusunda məruzə etdilər.
Azərbaycanın Milli Qəhrəmanı, Qarabağ müharibəsi şəhidi
Səyavuş Həsənovun qardaşı Məhəmməd Həsənov şəhid
ailələri adından çıxış edərək şəhid ailələrinə daim
diqqət və qayğı göstərən dövlət başçısına və xalqımıza
minnətdarlığını bildirdi.
Tədbirdə slayd və fotosərgi, qısametrajlı sənədli film
nümayiş etdirildi, şeirlər bədii qiraət olundu.
Mehriban SULTAN,
NDU-nun Mətbuat şöbəsinin müdiri |
